ຊາວພຸດລາວຮ່ວມໃສ່ບາດບຸນເຂົ້າພັນສາດ້ວຍຈິດໃຈເຫລື້ອມໃສ

ເຊົ້າວັນທີ 16 ກໍລະກົດນີ້, ຊຶ່ງກົງກັບມື້ຂຶ້ນ 15 ຄໍ່າເດືອນ 8 ລາວ ແລະ ເປັນມື້ເຂົ້າພັນສາຂອງພະສົງຕາມປະເພນີທີ່ໄດ້ສືບທອດກັນມາ, ຕາມຮີດ 12 ຄອງ 14 ຂອງຊາວພຸດລາວເຮົາ, ຊຶ່ງວັດວາອາຮາມຕ່າງໆໃນຂອບເຂດທົ່ວປະເທດຕ່າງກໍໄດ້ຈັດພິທີຕັກບາດຖວາຍສັງຄະທານແກ່ພະສົງຄືດັ່ງທຸກໆປີຜ່ານມາດ້ວຍບັນຍາກາດຄືກຄື້ນ.

   ໂດຍໃນເຊົ້າຂອງວັນດັ່ງກ່າວ, ໄດ້ມີຊາວພຸດທະສາສະນິກະຊົນທັງຍິງ-ຊາຍ, ເດັກນ້ອຍ, ຜູ້ໃຫຍ່, ເຖົ້າແກ່ອາວຸໂສ ໄດ້ຖືຂັນ-ໂອ ທີ່ເຕັມໄປດ້ວຍວັດຖຸປັດໄຈ, ທູບທຽນ, ດອກໄມ້ບູຊາ ມາຮ່ວມໃສ່ບາດ ແລະ ຟັງເທສະໜາຢ່າງພ້ອມພຽງຮຽງໜ້າ ແລະ ໄດ້ນຳເອົາເຄື່ອງປັດໄຈໃສຍະທານຂອງຕົນໄປມອບແດ່ພະສົງສຳມະເນນ ເພື່ອລະນຶກເຖິງຄຸນຂອງພະຣັດຕະນະໄຕຣ 3 ປະການຄື: ຄຸນພະພຸດ, ພະທຳ ແລະ ພະສົງ, ພ້ອມທັງອຸທິດສ່ວນບຸນກຸສົນໄປເຖິງດວງວິນຍານຂອງບັນພະບູລຸດ, ຄຸນບິດາ-ມານດາ, ຄູບາ-ອາຈານ ແລະ ຍາດພີ່ນ້ອງທີ່ລ່ວງລັບໄປແລ້ວນັ້ນ ໃຫ້ມາຮັບເອົາເຄື່ອງປັດໄຈທານຕ່າງໆດັ່ງກ່າວ, ພ້ອມນີ້ ກໍຍັງມີຜູ້ມີຈິດໃຈໃສສັດທາເປັນຈຳນວນຫລາຍທີ່ຮ່ວມບໍລິຈາກເພື່ອອຸປະຖໍາບຳລຸງພະພຸດທະສາສະໜາ ເປັນຕົ້ນແມ່ນການສ້າງກຸຕິ, ສາລາຢູ່ຕາມວັດວາອາຮາມຕ່າງໆໃຫ້ເຫລື້ອມໃສຕະຫລອດໄປ.

  ຕາມພຸດທະປະຫວັດ ບັນທຶກໄວ້ວ່າ: ບຸນເຂົ້າພັນສາ ເປັນວັນອາສານລະຫະບູຊາ ເຊິ່ງໝາຍເຖິງການບູຊາມື້ເພັງ 15 ຄໍ່າເດືອນ 8, ເປັນມື້ທີ່ມີພະສົງກຳເນີດໃນພຸດທະສາສະໜາ ແລະ ຄົບອົງປະກອບສາມຢ່າງຄື ພະພຸດ, ພະທຳ ແລະ ພະສົງ. ໄລຍະເຂົ້າຈຳພັນສາຂອງພະສົງເປັນເວລາ 3 ເດືອນ ທີ່ໄດ້ສືບທອດກັນມາແຕ່ສະໄໝພຸດທະການ, ຊຶ່ງການເຂົ້າພັນສານີ້, ແມ່ນເປັນຄຳຂໍຮ້ອງຂອງຊາວກະສິກອນໃນສະໄໝພຸດທະການທີ່ຕ້ອງການໃຫ້ພະສົງສາວົກຂອງພະສຳມາສຳພຸດທະເຈົ້າຢຸດທຽວສັນຈອນໄປມາໃນໄລຍະລະດູຝົນ, ເນື່ອງຈາກວ່າເປັນລະດູທຳການຜະລິດຂອງຊາວກະສິກອນ, ອາດເຮັດໃຫ້ເຄື່ອງປູກ ແລະ ໄຮ່ນາຕາກ້າເກີດຄວາມເສຍຫາຍ, ເມື່ອພະສຳມາສຳພຸດທະເຈົ້າໄດ້ຮັບຮູ້ເຊັ່ນນັ້ນແລ້ວ, ຈຶ່ງໄດ້ວາງຂໍ້ບັນຍັດອອກມາວ່າ: ຫ້າມບໍ່ໃຫ້ພະສົງສາວົກທຽວສັນຈອນໄປມາໃນໄລຍະລະດູຝົນ, ໂດຍໃຫ້ຈຳພັນສາ ເພື່ອບຳເພັນພຽງຈະເລີນເມດຕາພາວະນາຢູ່ຕາມອາຣາມ ຫລື ວັດວາຂອງໃຜລາວເປັນໄລຍະເວລາ 3 ເດືອນ ນັບແຕ່ມື້ຂຶ້ນ 15 ຄ່ຳເດືອນ 8 ຈົນເຖິງມື້ຂຶ້ນ 15 ຄໍ່າເດືອນ 11 ເພັງ, ຊຶ່ງໄລຍະເຂົ້າພັນສານັ້ນ ແມ່ນຫ້າມພະສົງເຄື່ອນຍ້າຍສັນຈອນໄປ-ມາ ຫລື ພັກແຮມຄ້າງຄືນຢູ່ວັດອື່ນທີ່ບໍ່ແມ່ນວັດຂອງຕົນໃນຍາມວິການ, ເວັ້ນເສຍແຕ່ກໍລະນີຈຳເປັນແຕ່ບໍ່ໃຫ້ເກີນ 7 ວັນ, ຖ້າຫາກພະສົງອົງໃດຢູ່ຈຳພັນສາບໍ່ຄົບ 3 ເດືອນຕາມກຳນົດ, ຖືວ່າພັນສາຂາດ ແລະ ພະອົງນັ້ນບໍ່ມີພັນສາເລີຍໃນປີນັ້ນ.