ກຽມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 64 ປີໃຫ້ຟົດຟື້ນ
ຮອງປະທານສູນກາງສະຫະພັນແມ່ຍິງລາວ (ສຍລ) ໃຫ້ຮູ້ວ່າ: ການສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວຄົບຮອບ 64 ປີ (20 ກໍລະກົດ 1955-20 ກໍລະກົດ 2019) ນີ້, ຈະມີກິດຈະກໍາສໍາຄັນ ຄື: ການຈັດປາຖະກະຖາ, ການສຳມະນາ, ຢ້ຽມຢາມຫໍພິພິທະພັນ, ອານຸສອນສະຖານ ແລະ ຫໍມູນເຊື້ອຕ່າງໆ ຂອງສະຫະພັນແມ່ຍິງບັນດາແຂວງ, ກະຊວງ, ອົງການຈັດຕັ້ງມະຫາຊົນ ແລະ ສະຖາບັນຕ່າງໆ ເພື່ອເປັນການເຜີຍແຜ່ມູນເຊື້ອ ແລະ ຜົນງານການເຕີບໃຫຍ່ຂະຫຍາຍຕົວຂອງສະຫະພັນແມ່ຍິງລາວ. ນອກນີ້, ກໍໃຫ້ມີການສ້າງຂະບວນການສິລະປະວັນນະຄະດີ, ການແຂ່ງຂັນກິລາ, ງານວາງສະແດງຜະລິດຕະພັນກະສິກຳ-ຫັດຖະກຳ ແລະ ກິດຈະກໍາອື່ນໆ ທີ່ຕິດພັນກັບຂະບວນການລວມຂອງພັກ ແລະ ຂອງຊາດໃຫ້ກວ້າງຂວາງ ແລະ ມີບັນຍາກາດຟົດຟື້ນ, ຮັບປະກັນໄດ້ດ້ານເນື້ອໃນບົນຈິດໃຈປະຢັດມັດທະຍັດ ແລະ ມີຄວາມເປັນລະບຽບຮຽບຮ້ອຍດີ ຄື: ໃນວັນທີ 11 ກໍລະກົດນີ້, ສະຫະພັນແມ່ຍິງລາວຮ່ວມກັບອົງການກາແດງລາວ ໄດ້ຈັດກິດຈະກຳບໍລິຈາກເລືອດຢູ່ທີ່ສູນການຄ້າວຽງຈັນເຊັນເຕີນະຄອນຫລວງວຽງຈັນ, ເຊິ່ງກໍເຫັນວ່າມີພະນັກງານ, ທະຫານ, ຕໍາຫລວດ ແລະ ເອື້ອຍນ້ອງແມ່ຍິງຈາກອົງການຈັດຕັ້ງຕ່າງໆຂອງພັກ-ລັດ ແລະ ມວນຊົນເຂົ້າຮ່ວມເປັນຈໍານວນຫລາຍ. ສ່ວນວັນທີ 17 ກໍລະກົດ ກໍຈະມີພິທີວາງກະຕ່າດອກໄມ້ທີ່ອານຸສາວະລີນັກຮົບນິລະນາມ ແລະ ການແຂ່ງຂັນຍິງປືນທີ່ສະໜາມຍິງປືນ 24 ເມສາ ແລະ ໃນວັນທີ 19 ກໍລະກົດ ກໍຈະມີພິທີໂຮມຊຸມນຸມໃຫຍ່ສະເຫລີມສະຫລອງວັນປະຫວັດສາດສໍາຄັນດັ່ງກ່າວຢູ່ນະຄອນຫລວງວຽງຈັນ.
ທ່ານຮອງສະຫະພັນແມ່ຍິງລາວ ໃຫ້ຮູ້ວ່າ: ສະຫະພັນແມ່ຍິງແມ່ນອົງການຈັດຕັ້ງໜຶ່ງໃນລະບົບການເມືອງຂອງພັກ, ມີພາລະບົດບາດຊຸກຍູ້ສົ່ງເສີມເພື່ອໃຫ້ແມ່ຍິງໄດ້ເຮັດໜ້າທີ່ໃນການເປັນຕົວແທນແຫ່ງສິດຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍ, ເຕົ້າໂຮມຄວາມສາມັກຄີ ແລະ ເສີມຂະຫຍາຍສິດເປັນເຈົ້າຂອງແມ່ຍິງລາວປະກອບສ່ວນເຂົ້າໃນພາລະກິດປະຕິວັດພັດທະນາແມ່ຍິງ, ປະຕິບັດສິດສະເໝີພາບຍິງ-ຊາຍ ແລະ ປົກປັກຮັກສາມູນເຊື້ອທີ່ເປັນເອກະລັກຂອງແມ່ຍິງໃຫ້ຍືນຍົງ.
