ຖອດຖອນບົດຮຽນການຄ້າຊີວະນາໆພັນ

ກອງປະຊຸມ ຄະນະຊີ້ນຳໂຄງການ ສົ່ງເສີມການຄ້າຊີວະນາໆພັນ ຢູ່ ສປປ ລາວ ໄດ້ຈັດຂຶ້ນໃນວັນທີ 11 ກໍລະກົດນີ້ ທີ່ນະຄອນຫລວງວຽງຈັນ, ເພື່ອລາຍງານຄວາມຄືບໜ້າ ຂອງການຈັດຕັ້ງປະຕິບັດໂຄງການ ປະຈຳ 6 ເດືອນຕົ້ນປີ ແລະ ປຶກສາຫາລື ກ່ຽວກັບຜົນໄດ້ຮັບ,​ ຂໍ້ຫຍຸ້ງຍາກ, ບົດຮຽນທີ່ຖອດຖອນໄດ້ ແລະ ແຜນຈັດຕັ້ງປະຕິບັດໂຄງການດັ່ງກ່າວ ຮ່ວມກັບຄູ່ຮ່ວມງານທີ່ກ່ຽວຂ້ອງ ຂັ້ນສູນກາງ,​ ຂັ້ນແຂວງ ແລະ ເມືອງ.

ຫົວໜ້າພະແນກມາດຕະຖານ ກົມປູກຝັງ ກະຊວງກະສິກຳ ແລະ ປ່າໄມ້ ກ່າວວ່າ: ໂຄງການສົ່ງເສີມການຄ້າຊີວະນາໆພັນຢູ່ລາວ ເປັນໂຄງການທີ່ໄດ້ຮັບການອະນຸມັດ ໃນທ້າຍປີ 2018 ຜ່ານ​ມາ ໂດຍມີເປົ້າໝາຍ ປະກອບສ່ວນພັດທະນາ ຂະແໜງການຊາ ແລະ ຜະລິດຕະພັນຊາ ໃຫ້ສາມາດເຂົ້າເຖິງຕະຫລາດສົ່ງອອກທີ່ມີມູນຄ່າສູງ ນອກຈາກນັ້ນ ຍັງມີຜະລິດຕະພັນອື່ນໆທີ່ກ່ຽວຂ້ອງກັບຊີວະນາໆພັນ, ​ເພີ່ມປະກອບສ່ວນ ພັດທະ ນາກະສິກຳ ຢູ່ ລາວ ໂດຍສະເພາະ ແມ່ນການຜະລິດກະສິກຳເປັນສິນຄ້າ ເພື່ອການສົ່ງອອກ ແລະ ໄດ້ເລີ່ມຈັດຕັ້ງປະຕິບັດ ຮ່ວມກັບຄູຮ່ວມງານທັງພາກລັດ ແລະ ເອກະຊົນ. ມີທັງໝົດ 23 ກິດຈະກຳຫລັກ, ໂດຍໄດ້ຈັດຕັ້ງປະຕິບັດຕາມແຜນ​ແລ້ວ 20 ກິດຈະກຳຫລັກ ເປັນຕົ້ນໄດ້ສຳເລັດການສະໜັບສະໜູນດ້ານວິຊາການ ທີ່ຈຳເປັນສຳລັບການສົ່ງອອກ ແລະ ການປະຕິບັດມາດຕະຖານ ກະສິກຳອິນຊີ ແລະ ການຄ້າເປັນທຳສາກົນ ໃຫ້ແກ່ 2 ໂຮງງານຊາ ຢູ່ແຂວງຜົ້ງສາລີ, ອຳນວຍຄວາມສະດວກ ໃນການສ້າງຕະຫລາດໃໝ່ ໃຫ້ແກ່ບໍລິສັດຜູ້ສົ່ງອອກ 5 ແຫ່ງ ມີຕະຫລາດຊາ ຢູ່ເຢຍລະມັນ,​ ຕວັກກີ ແລະ ສະວິດ​ເຊີແລນ, ຕະຫລາດໝາກແຄ່ນ ສະກັດນໍ້າມັນ ແລະ ກິ່ນ ຢູ່ ປະເທດຝຣັ່ງ ແລະ ມຽນມາ, ພ້ອມນັ້ນ, ຍັງໄດ້ສືບຕໍ່ສະໜັບສະໜູນ 2 ບໍລິສັດປຸງແຕ່ງຊາ ຢູ່ ແຂວງຜົ້ງສາລີ ໃນການປະຕິບັດມາດຕະຖານອິນຊີ ແລະ ການຄ້າເປັນທຳສາກົນປະຈຳປີ 2019.