ລາວ-ຫວຽດນາມເພີ່ມທະວີຮ່ວມມືວຽກງານຕ້ານອາຊະຍາກໍາ

  ໃນວັນທີ 8-11 ກໍລະກົດນີ້, ໄດ້ມີກອງປະຊຸມປຶກສາຫາລືການຮ່ວມມືໃນວຽກງານສະກັດກັ້ນ ແລະ ຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມລະຫວ່າງ ສປປ ລາວ ແລະ ສສ ຫວຽດນາມຄັ້ງທີ 10. ຝ່າຍລາວນໍາໂດຍທ່ານພົນຈັດຕະວາ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕໍາຫລວດກະຊວງປ້ອງກັນຄວາມສະຫງົບ ແລະ ຝ່າຍຫວຽດນາມນໍາໂດຍທ່ານພັນເອກ ວູ້ ກວັກຖັງ ຮອງຫົວໜ້າຫ້ອງການອົງການສືບສວນ-ສອບສວນກະຊວງຕໍາຫລວດ.

  ກອງປະຊຸມຄັ້ງນີ້, ສອງຝ່າຍຮ່ວມກັນສະຫລຸບຕີລາຄາການຮ່ວມມືໃນວຽກງານຕ້ານອາຊະຍາກໍາ ແລະ ຮັກສາຄວາມເປັນລະບຽບຮຽບຮ້ອຍໃນສັງຄົມໃນໄລຍະຜ່ານມາ, ໂດຍສະເພາະການຜັນຂະຫຍາຍບົດບັນທຶກກອງປະຊຸມຮ່ວມມືໃນຄັ້ງທີ 9 ເຊິ່ງເຫັນວ່າສອງຝ່າຍໄດ້ເອົາໃຈໃສ່ຮ່ວມມືກັນໃນຫລາຍດ້ານ ເປັນຕົ້ນ: ວຽກປະສານງານແລກປ່ຽນຂໍ້ມູນຂ່າວສານດ້ານອາຊະຍາກໍາ, ການກວດກາພິສູດເປົ້າໝາຍອາຊະຍາກໍາປະເພດຕ່າງໆທີ່ຝ່າຍຫວຽດນາມສະເໜີຝ່າຍລາວຊ່ວຍກວດກາຈໍານວນ 21 ເລື່ອງ, ໃນນີ້ສາມາດແກ້ໄຂໄດ້ແລ້ວ 8 ເລື່ອງ, ນອກນີ້ກໍຮ່ວມກັນມ້າງຄະດີຕ່າງໆໄດ້ 20 ເລື່ອງ, ກັກຜູ້ຕ້ອງຫາໄດ້ 39 ຄົນ (ຍິງ 3 ຄົນ), ຢຶດຂອງກາງປະເພດຕ່າງໆ ເຊັ່ນ: ເຮໂຣອິນ 182 ແທ່ງເທົ່າກັບ 63,7 ກິໂລ, ຢາບ້າ 7 ແສນກວ່າເມັດ, ຢາໄອສ 56 ກິໂລ, ຝິ່ນ 12 ກວ່າກິໂລ, ອາວຸດເສິກ 11 ກະບອກ, ພ້ອມກະສູນຈໍານວນໜຶ່ງ, ລົດໃຫຍ່ 8 ຄັນ, ລົດຈັກ 4 ຄັນ ແລະ ຊັບສີນອື່ນໆອີກຈໍານວນໜຶ່ງ. ພ້ອມນີ້ສອງຝ່າຍກໍໄດ້ຕົກລົງເຫັນດີເປັນເອກະພາບນໍາກັນໃນການເພີ່ມທະວີການຮ່ວມມືໃຫ້ຫລາຍຂຶ້ນ ເປັນຕົ້ນແມ່ນວຽກງານແລກປ່ຽນຂໍ້ມູນຂ່າວສານດ້ານອາຊະຍາກໍາ, ການແກ້ໄຂບັນຫາຢາເສບຕິດ, ການຕ້ານການຄ້າມະນຸດ, ການກະທໍາຜິດດ້ານເສດຖະກິດ, ການສືບສວນ-ສອບສວນຄະດີອາຍາ, ການນໍາຈັບເປົ້າໝາຍກະທໍາຜິດ ແລະ ວຽກງານອື່ນໆ, ພ້ອມທັງເພີ່ມທະວີວຽກງານສຶກສາອົບຮົມປະຊາຊົນທີ່ຢູ່ລຽບຊາຍແດນໃຫ້ຮັບຮູ້ເຂົ້າໃຈລະບຽບກົດໝາຍຂອງສອງປະເທດ ເພື່ອຮັບປະກັນໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ປະກອບສ່ວນເຂົ້າໃນການເສີມຂະຫຍາຍສາຍພົວພັນພິເສດທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ.