ຕຳຫລວດເຜີຍຂໍ້ມູນທີ່ຮົ່ວໄຫລສົ່ງຜົນເສຍຫາຍຕໍ່ຄະດີລະເບີດແມນເຊສເຕີ
ລອນດອນ 25 ພຶດສະພາ: ຕຳຫລວດອັງກິດກ່າວໃນວັນທີ 25 ພຶດສະພານີ້ວ່າ: ຂໍ້ມູນຮົ່ວໄຫລຈາກການສອບສວນໃນຄະດີລະເບີດຂ້າໂຕຕາຍຢູ່ເມືອງແມນເຊສເຕີ ສົ່ງຜົນກະທົບຕໍ່ຮູບຄະດີ, ພາຍຫລັງຝຣັ່ງ ແລະ ອາເມລິກາເຜີຍແຜ່ອອກໄປ.
ໂຄສົກໜ່ວຍປາບປາມກໍ່ການຮ້າຍຢູ່ອັງກິດ ຖະແຫລງວ່າ: ທີມສອບສວນອັງກິດມີຄວາມເຊື່ອໃຈໃນປະເທດຫຸ້ນສ່ວນດ້ານຄວາມໝັ້ນຄົງ ໂດຍການແລກປ່ຽນຂໍ້ມູນວົງໃນ ແລະ ຂ່າວລັບດ້ານການກໍ່ການຮ້າຍ ເພື່ອປົກປ້ອງປະຊາຊົນທັງໃນ ແລະ ຕ່າງປະເທດ, ແຕ່ເມື່ອມີການລະເມີດຄວາມໄວ້ວາງໃຈທີ່ມີຕໍ່ກັນ ຈະກະທົບຕໍ່ການພົວພັນ, ສົ່ງຜົນເສຍຫາຍຕໍ່ການສອບສວນຂອງອັງກິດ, ບັນທອນຄວາມເຊື່ອໃຈຂອງເຫຍື່ອ, ພະຍານ ແລະ ຄອບຄົວຜູ້ປະສົບເຫດ. ຂະນະທີ່ສະຖານີໂທລະພາບ BBC ອັງກິດ ລາຍງານວ່າ: ຕຳຫລວດອັງກິດໄດ້ຢຸດການແລກປ່ຽນຂໍ້ມູນກັບເຈົ້າໜ້າທີ່ລັດຖະບານອາເມລິກາແລ້ວ ເນື່ອງຈາກຂໍ້ມູນຄວາມລັບທີ່ຮົ່ວໄຫລຫລາຍເລື່ອງມາຈາກໜ່ວຍຂ່າວລັບອາເມລິກາ ແລະ ເປັນການເຜີຍແຜ່ຫລັກຖານທີ່ຍັງບໍ່ໄດ້ຮັບອະນຸຍາດຈາກເຈົ້າໜ້າທີ່ໃນລະຫວ່າງສອບສວນການກໍ່ການຮ້າຍ. ກ່ອນໜ້ານີ້ ໜັງສືພິມນິວຢອກທາມ ສື່ດັງຂອງອາເມລິກາລາຍງານເຜີຍແຜ່ພາບລັບພິເສດຈາກການສອບສວນຄະດີລະເບີດຂ້າໂຕຕາຍຢູ່ເມືອງແມນເຊສເຕີຂອງອັງກິດ ໂດຍອ້າງວ່າມາຈາກເຈົ້າໜ້າທີ່ອາເມລິກາ ເປັນພາບຊິ້ນສ່ວນກະເປົາໃສ່ລະເບີດ, ຕະປູ ແລະ ຊິ້ນສ່ວນເຄື່ອງຂອງເຊິ່ງເປັນອຸປະກອນປະກອບລະເບີດ ລວມທັງຂໍ້ມູນພິເສດອື່ນໆ.
