ເລື່ອງດີໆຕໍ່ໄປນີ້ຈະເກີດຂຶ້ນ ເມື່ອທ່ານເລີ່ມຕົກຂຸມຮັກໃຜຈັກຄົນ
ເວົ້າກັນວ່າ ຄົນເຮົາເມື່ອເລີ່ມຕົກຂຸມຮັກ ຫລື ຫລົງຮັກໃຜຈັກຄົນ ມັກຈະບໍ່ຄ່ອຍເປັນໂຕຂອງໂຕເອງ ແລະ ມີອາການຜິດປົກກະຕິດ້ານຄວາມຮູ້ສຶກຫລາຍຢ່າງ, ແຕ່ເມື່ອສິ່ງດີໆໄດ້ເກີດຂຶ້ນແລ້ວ ຍ່ອມເປັນເລື່ອງລາວທີ່ງົດງາມສະເໝີ. ສະນັ້ນ, ມາເບິ່ງ ວ່າທ່ານກຳລັງຢູ່ໃນອາການຕົກຂຸມຮັກ ຈະມີເລື່ອງຫຍັງດີໆທີ່ເກີດຂຶ້ນຕາມມາອີກແດ່.
– ທ່ານມີແຮງຈູງໃຈທີ່ເຮັດໃຫ້ຢາກຕື່ນຂຶ້ນມາໃຊ້ຊີວິດທຸກມື້ : ບໍ່ວ່າຈະແມ່ນຄວາມປະທັບໃຈ, ຖືກໃຈ, ຫລົງ, ມັກ, ໂຣແມນຕິກ ຫລື ເປັນຄວາມຮັກໃນຮູບແບບໃດ ຍ່ອມເຮັດໃຫ້ໃຜຫລາຍຄົນມີແຮງຈູງໃຈຢາກຕື່ນຂຶ້ນມາໃຊ້ຊີວິດດ້ວຍກັນທັງໝົດ ເພາະຄວາມຮັກກໍປຽບດັ່ງກຳລັງໃຈດີໆຢ່າງໜຶ່ງ. ການໄດ້ຕື່ນມາພົບ ຫລື ຕື່ນມາເຫັນໜ້າຄົນທີ່ຕົນເອງຮູ້ສຶກດີນຳ ຄົງເປັນສິ່ງທີ່ສາມາດສ້າງຄວາມສຸກ ແລະ ຮອຍຍິ້ມໄດ້ແນ່ນອນ.
– ທ່ານມີຄວາມສຸກແມ່ນແຕ່ກັບສິ່ງນ້ອຍໆ : ຈາກທີ່ເຄີຍເປັນຄົນບໍ່ຄ່ອຍສົນໃຈ ຫລື ມີຄວາມສຸກັບສິ່ງອ້ອມໂຕຫລາຍພໍປານໃດ ອິດທິພົນຂອງການຕົກຂຸມຮັກ ຫລື ຫລົງຮັກນີ້ຈະສາມາດປ່ຽນທ່ານໃຫ້ກາຍເປັນຄົນເບິ່ງໂລກງາມຂຶ້ນມາໄດ້ເລີຍ ເພາະເມື່ອຫົວໃຈດວງນ້ອຍຖືກດຶງຂຶ້ນມາໃຫ້ເຕັ້ນແຮງອີກຄັ້ງ ກໍອາດໝາຍຄວາມວ່າ ຕໍ່ຈາກນີ້ໄປຫລາຍສິ່ງຫລາຍຢ່າງ ລວມໄປເຖິງ ຄວາມທຸກທີ່ເຄີຍມີຢູ່ກໍຈະຫລຸດຜ່ອນລົງ ແລະ ມີຄວາມສຸກຫລາຍຂຶ້ນໄປນຳ.
– ທ່ານຢາກພັດທະນາໂຕເອງໃຫ້ຄູ່ຄວນກັບເຂົາຫລາຍຂຶ້ນ : ເຮົາເຊື່ອວ່າໜ້ອຍຄົນທີ່ຈະບໍ່ປ່ຽນແປງໂຕເອງເລີຍເວລາມີຄວາມຮັກ ແລະ ມັນກໍຄົງຈະມີບໍ່ໜ້ອຍ ຖ້າຫາກຄວາມຮັກເປັນອີກໜຶ່ງສາເຫດເຮັດໃຫ້ທ່ານຢາກພັດທະນາຕົນເອງໄປໃນທິດທາງທີ່ດີຍິ່ງຂຶ້ນ ເຊິ່ງນອກຈາກມັນຈະເຮັດໃຫ້ໂຕທ່ານໄດ້ກ້າວໜ້າໄປພົບກັບສິ່ງໃໝ່ໆແລ້ວ ຍັງສາມາດເຮັດໃຫ້ຝ່າຍກົງຂ້າມເບິ່ງເຫັນນຳວ່າ ທ່ານເປັນຄົນທີ່ມີຄວາມພະຍາຍາມ ແລະ ຄູ່ຄວນກັບເຂົາຫລາຍກ່ວາໃຜໆ.
