ແຂວງໄຊສົມບູນ ພວມເລັ່ງຂຸດຄົ້ນຫຼາຍທ່າແຮງເພື່ອພັດທະນາເສດຖະກິດ

ແຂວງໄຊສົມບູນ ພວມເລັ່ງຂຸດຄົ້ນຫຼາຍທ່າແຮງ ທີ່ມີຢູ່ພາຍໃນແຂວງ, ໂດຍສະເພາະດ້ານກະສິກໍາ, ການທ່ອງທ່ຽວ, ການພັດທະນາພະລັງ ງານນ້ຳ, ພະລັງງານບໍ່ແຮ່ແລະ ການບໍລິການທາງຜ່ານເພື່ອເປັນພື້ນຖານໃຫ້ແກ່ການພັດທະນາການກະຕຸ້ນເສດຖະກິດ ໃຫ້ມີການຂະຫຍາຍຕົວຢ່າງຕໍ່ເນື່ອງ.

ທ່ານ ຄໍາລຽງ ອຸທະໄກສອນ ເຈົ້າແຂວງໄຊສົມບູນໃຫ້ສໍາພາດໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງຄັ້ງທີ I ປີ 2019ເມື່ອບໍ່ດົນມານີ້ວ່າ: ການພັດທະນາເສດຖະກິດ-ສັງຄົມຂອງແຂວງໃນຜ່ານມາ ແມ່ນສາມາດບັນລຸໄດ້ຕາມແຜນການທີ່ລັດຖະບານກໍານົດໃຫ້, ແຕ່ເນື່ອງຈາກແຂວງໄຊສົມບູນຍັງມີຫລາຍດ້ານຫຍຸ້ງຍາກເປັນຕົ້ນແມ່ນ ທັນມີຖານລາຍຮັບຫລາຍ ແລະ ຫມັ້ນຄົງຄືກັບແຂວງອື່ນໆ.

ສະນັ້ນເພື່ອເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວໃນຕໍ່ຫນ້າຈະໄດ້ສຸມໃສ່ພັດທະນາຂົງເຂດກະສິກໍາ, ເຊິ່ງຖື ເປັນທ່າແຮງໃຫຍ່ແລະ ສໍາຄັນ, ປັດຈຸບັນໄດ້ມີການໂຄສະນາເພື່ອດຶງດູດເອົານັກລົງທຶນທັງພາຍໃນ ແລະຕ່າງປະເທດ ໃຫ້ເຂົ້າມາລົງທຶນພັດທະນາໃນດ້ານດັ່ງກ່າວໃຫ້ຫຼາຍຂຶ້ນ, ໄປຄຽງຄູ່ກັບການພັດທະນາທ່ອງທ່ຽວເນື່ອງຈາກມີອາກາດຫນາວເຢັນ, ສົດຊື່ນ, ປອດ ໂປ່ງ ແລະທໍາມະຊາດສວຍ ງາມ.ປັດຈຸບັນ ແຂວງໄຊສົມບູນ ມີແຫລ່ງທ່ອງທ່ຽວທັງຫມົດ 74 ແຫ່ງ ທີ່ຈະສາມາດພັດທະນາໃຫ້ເປັນແຫລ່ງທ່ອງທ່ຽວໄດ້.

ນອກນັ້ນ, ຍັງມີແຫລ່ງທ່ອງທ່ຽວທີ່ເປັນປະຫວັດສາດຄື: ເຂດພູຫມອກ ແລະ ລ້ອງແຈ້ງ, ເຊິ່ງເປັນສະຖານທີ່ລືຊື່ດ້ານການປົດປ່ອຍປະເທດຊາດ, ແຕ່ວ່າມາຮອດປັດຈຸບັນສະຖານທີ່ເຫລົ່ານັ້ນຍັງບໍ່ທັນໄດ້ຮັບການພັດທະນາເທື່ອ.

ພ້ອມດຽວກັນນັ້ນ, ກໍຈະສຸມໃສ່ການພັດທະນາເຂື່ອນພະລັງງານໄຟຟ້າ. ມາຮອດປັດຈຸບັນມີແລ້ວ 26 ແຫ່ງ, ສ້າງສໍາເລັດແລະ ຜະລິດໄຟຟ້າແລ້ວ 6ແຫ່ງ, ກຽມຈະຜະລິດໃນເດືອນສິງຫານີ້ 2 ແຫ່ງ ຄື ເຂື່ອນໄຟຟ້ານ້ໍາງຽບ 1 ແລະ ເຂື່ອນໄຟຟ້ານ້ໍາຝາຍໃຫຍ່.

ສໍາລັບທ່າແຮງດ້ານການພັດທະນາບໍ່ແຮ່, ເຊິ່ງຖືວ່າເປັນອີກຫນຶ່ງທ່າແຮງທີ່ນັກລົງທຶນທັງພາຍໃນ ແລະ ຕ່າງປະເທດໃຫ້ຄວາມສົນໃຈເຂົ້າມາລົງທຶນດ້ານນີ້, ປັດຈຸບັນໄດ້ມີຫລາຍແຫ່ງ ທີ່ໄດ້ມີການດໍາເນີນການພັດທະນາມາແລ້ວ ເປັນຕົ້ນແມ່ນ ບໍ່ຄໍາພູເບ້ຍ ແລະ ບໍ່ອື່ນໆ ທີ່ຕັ້ງຢູ່ພາຍໃນແຂວງໄຊສົມບູນ. ນອກນັ້ນ, ແຂວງໄຊສົມບູນ ຈະສຸມໃສ່ພັດທະນາໂດຍຫັນຈາກແຂວງທາງຕັນໃຫ້ກາຍເປັນແຂວງທາງຜ່ານ,ເນື່ອງຈາກວ່າເປັນແຂວງຕັ້ງຢູ່ໃຈກາງຂອງບັນດາແຂວງອື່ນໆ.

ມາຮອດປັດຈຸບັນການທະລຸເສັ້ນທາງພື້ນຖານໂຄງລ່າງ ຍັງບໍ່ທັນມີຫລາຍພໍເທົ່າໃດແລະ ໃນອະນາຄົດ ແມ່ນຈະສຸມໃສ່ພັດທະນາພື້ນຖານໂຄງລ່າງເພື່ອເຮັດໃຫ້ໄຊສົມບູນເປັນແຂວງບໍລິການທາງຜ່ານ, ຫາກວ່າມີການທະລຸເສັ້ນທາງຈາກໄຊສົມບູນ ໄປສູ່ແຂວງຊຽງຂວາງ ຈະເຮັດໃຫ້ບັນດາແຂວງພາກເຫນືອ ຜ່ານໄຊສົມບູນເຂົ້າສູ່ນະຄອນຫລວງວຽງຈັນ, ພ້ອມນັ້ນຍັງມີແຜນຈະເປີດ ຫລື ທະລຸເສັ້ນທາງອອກຈາກແຂວງ ໄປໃສ່ຕະຫລາດວັງວຽງ ເພື່ອກຽມຮອງຮັບໂຄງການເສັ້ນທາງລົດໄຟລາວ-ຈີນທີ່ຈະເປີດໃຫ້ບໍລິການໃນປີ2021 ນີ້, ເຊິ່ງນັບວ່າເປັນທາງຫນຶ່ງ ທີ່ຈະເປັນການສົ່ງເສີມການຜະລິດເປັນສິນຄ້າຂອງປະຊາຊົນ, ເປັນການດຶງດູດນັກທ່ອງທ່ຽວ ຈາກວັງວຽງເຂົ້າສູ່ແຂວງໄຊສົມບູນ ແລະ ເຮັດໃຫ້ບັນດາແຂວງພາກເຫນືອ ຜ່ານໄຊສົມບູນເຂົ້າສູ່ວຽງຈັນ ຫລືອອກສູ່ທິດຕາເວັນອອກ, ເຊິ່ງຈະເຮັດໃຫ້ການບໍລິການທາງຜ່ານ ແລະ ປະຊາຊົນຜະລິດສິນຄ້າອອກມາແລ້ວໄດ້ຂາຍ ອັນຈະເປັນການເພີ່ມລາຍໄດ້ ໃຫ້ປະຊາຊົນພາຍໃນແຂວງໄດ້ປັບປຸງຊີວິດການເປັນຢູ່ດີຂຶ້ນ.