ຫາລືມາດຕະຖານເພີ່ມວິຕາວິນແຮ່ທາດໃສ່ອາຫານ

ໃນວັນທີ 3-4 ກໍລະກົດນີ້,ຄະນະກໍາມະການໂພຊະນາການແຫ່ງຊາດ ໄດ້ຈັດກອງປະຊຸມປຶກສາຫາລື ດ້ານວິຊາການມາດຕະຖານ ການເພີ່ມວິຕາມິນແຮ່ທາດໃສ່ອາຫານ ຢູ່ສປປ ລາວ ໂດຍມີ ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ທ່ານ ຣາກັນ ທອງກູລຮອງຜູ້ອໍານວຍການ ແລະຕາງຫນ້າອົງການອາຫານໂລກແຫ່ງ ສະຫະປະຊາຊາດ ປະຈໍາລາວ, ມີຜູ້ຕາງຫນ້າ ຈາກບັນດາກະຊວງ ແລະ ຂະແຫນງການ ທີ່ກ່ຽວຂ້ອງ ເຂົ້າຮ່ວມ.

ທ່ານ ພູທອນ ເມືອງປາກກ່າວວ່າ: ໃນໄລຍະຜ່ານມາລັດຖະບານລາວ ໄດ້ປະສົບຜົນສໍາເລັດໃນການສົ່ງເສີມການນໍາໃຊ້ເກືອເສີມທາດໄອໂອດີນເພື່ອປ້ອງກັນພະວະການຂາດສານອາຫານໄອໂອດີນ.

ນອກຈາກນີ້, ໂອກາດໃນການເພີ່ມສານອາຫານໃນອາຫານອື່ນໆເຊັ່ນ: ເຂົ້າ, ນ້ໍາມັນ, ອາຫານຈໍາພວກເສັ້ນ, ຊອດປຸງແຕ່ງອາຫານ ແລະ ຜະລິດຕະພັນຈາກນົມ ແມ່ນຈະຕ້ອງຄໍານຶງເຖິງເຊັ່ນດຽວກັນ, ດັ່ງນັ້ນ ຈຶ່ງຕ້ອງການ ການສະຫນັບສະຫນູນຈາກຜູ້ມີສ່ວນຮ່ວມໃນການແກ້ໄຂບັນຫາດັ່ງກ່າວ, ເຊິ່ງກອງປະຊຸມວິຊາການຄັ້ງນີ້ ແມ່ນບາດກ້າວສໍາຄັນ ເພາະເປັນຂັ້ນຕອນທໍາອິດໃນການກໍານົດມາດຕະຖານການ ເພີ່ມສານອາຫານໃນປະເທດລາວ.

ທ່ານ ຣາກັນ ທອງກູລກ່າວວ່າ: ການເພີ່ມສານອາຫານ ແມ່ນຫນຶ່ງໃນວິທີທີ່ມີປະສິດທິພາບຫລາຍທີ່ສຸດ ເພື່ອປັບປຸງການເຂົ້າເຖິງຈຸລີນຊີຂອງປະຊາກອນລາວທົ່ວປະເທດ, ສໍາຄັນທີ່ສຸດແມ່ນໄວຫນຸ່ມຍິງ ແລະ ແມ່ຍິງ ໃນໄວຈະເລີນພັນທີ່ມີຄວາມສ່ຽງຫລາຍທີ່ສຸດ ແລະ ຂັ້ນຕອນທໍາອິດຂອງພວກເຮົາ ຄື ການທົບທວນມາດຕະຖານແຫ່ງຊາດແລະ ຮຽນຮູ້ຈາກປະສົບການຂອງບັນດາປະເທດໃກ້ຄຽງດ້ວຍວິທີນີ້ ພວກເຮົາຈະສາມາດກະກຽມການສ້າງກົດຫມາຍ ແລະ ລະບຽບການທີ່ເຫມາະສົມ ໃນການເພີ່ມສານອາຫານ ເຊິ່ງຈະເປັນການປະກອບສ່ວນເຂົ້າ ໃນການພັດທະນາ ແລະ ປັບປຸງສຸຂະພາບຂອງປະຊາຊົນໃນລາວ ຢ່າງມີຄວາມຫມັ້ນຄົງ ແລະ ຍືນຍົງ.