ຄອບຄົວບໍ່ເຂົ້າໃຈ ລົມແນວໃດບໍ່ໃຫ້ຜິດກັນ.
– ກ່ອນທີ່ຈະເລີ່ມລົມ ຄິດກ່ອນວ່າຕ້ອງການຫຍັງ : ກ່ອນທີ່ຈະເລີ່ມລົມ ທ່ານຄວນທີ່ຈະຄິດກ່ອນວ່າແມ່ນຫຍັງແມ່ນສິ່ງທີ່ທ່ານຕ້ອງການຈາກການລົມກັນໃນເທື່ອນີ້ ? ແລະ ລົມແຕ່ເລື່ອງນັ້ນເລື່ອງດຽວ, ຢ່າເອົາຫລາຍໆເລື່ອງໄປໃຫ້ພວກເຂົາພ້ອມກັບບາດດຽວ ເພາະນອກຈາກຈະສ່ຽງເຮັດໃຫ້ການລົມກັນລົ້ມເຫລວແລ້ວ ຍັງອາດຈະເຮັດໃຫ້ເກີດການຜິດຖຽງກັນຂຶ້ນໄດ້.
– ລົມກັນ ບໍ່ແມ່ນຜິດຖຽງກັນ : ການຜິດຖຽງກັນບໍ່ໄດ້ເຮັດໃຫ້ອັນໃດດີຂຶ້ນ, ບໍ່ຊ່ວຍເຮັດໃຫ້ໄດ້ຂໍ້ສະຫລຸບ ທັງຍັງເຮັດໃຫ້ສະຖານະການຮຸນແຮງຂຶ້ນກ່ວາເກົ່ານຳອີກ ສະນັ້ນ ທ່ານຢາກໄດ້ໃນສິ່ງທີ່ຕ້ອງການ ຫລື ຢາກໃຫ້ຄອບຄົວຂອງທ່ານຮັບຟັງ ທ່ານຄວນທີ່ຈະໃຈເຢັນ, ລົມດ້ວຍເຫດຜົນ, ບໍ່ໃຊ້ອາລົມ, ເຮັດໃຫ້ພວກເຂົາເຫັນເຖິງຈຸດຢືນຂອງທ່ານ ແຕ່ໃນທາງກົງກັນຂ້າມ ທ່ານກໍ ຄວນທີ່ຈະຟັງພວກເຂົາແດ່ ແລະ ຜ່ອນສັ້ນຜ່ອນຍາວໄປຕາມແຕ່ລະກໍລະນີ ຫລື ເງື່ອນໄຂທີ່ທັງສອງຝ່າຍຍອມຮັບໄດ້, ສະແດງໃຫ້ເຫັນວ່າທ່ານໃຫຍ່ພໍທີ່ຈະຕັດສິນໃຈໄດ້ແລ້ວ ແລະໃຫຍ່ພໍທີ່ຈະຮັບຜົນຂອງຄວາມຜິດພາດຈາກການຕັດສິນໃຈເອງ.
– ໃຊ້ຄຳເວົ້າດີໆ : ໃຊ້ຄຳເວົ້າດີໆ ພະຍາຍາມຫລີກເວັ້ນຄຳເວົ້າທີ່ເຮັດໃຫ້ພວກເຂົາບໍ່ພໍໃຈຫລາຍກ່ວາເກົ່າ ເຊັ່ນ : ຈາກທີ່ຈະເວົ້າວ່າ ພວກເຂົາບໍ່ເຄີຍໃຫ້ທ່ານໄດ້ເຮັດ ຫລື ຄິດຫຍັງດ້ວຍຕົນເອງເລີຍ ຫລື ພວກເຂົາບໍ່ເຄີຍເຂົ້າໃຈທ່ານເລີຍ ປ່ຽນມາເປັນ ທ່ານຢາກໃຫ້ພວກເຂົາຮັບຟັງທ່ານ ເຖິງວ່າອາດຈະເຮັດໃຫ້ພວກເຂົາບໍ່ຖືກໃຈກໍຕາມ, ແຕ່ທ່ານກໍຍັງຢາກໄດ້ຮັບການຊ່ວຍເຫລືອ, ໄດ້ຮັບຄຳແນະນຳຈາກພວກເຂົາຢູ່, ເຮັດໃຫ້ພວກເຂົາຮູ້ສຶກວ່າເຖິງທ່ານຈະເລືອກທາງເດີນຂອງໂຕເອງ, ແຕ່ກຳລັງໃຈຈາກພວກເຂົາກໍສຳຄັນທີ່ຈະເຮັດໃຫ້ທ່ານໄປໄດ້ເຖິງຝັນ.
– ເປີດໃຈ, ເຮັດຄວາມເຂົ້າໃຈຄວາມຄິດຂອງຄອບຄົວນຳ : ບາງເທື່ອເຮົາກໍມັກຈະຍຶດຖືແຕ່ຄວາມຄິດເຫັນຂອງໂຕເອງເປັນຫລັກ ໂດຍທີ່ບໍ່ເປີດໃຈ ຫລື ເຮັດຄວາມເຂົ້າໃຈທັດສະນະຄະຕິ, ຄວາມຄິດເຫັນຂອງຄອບຄົວເລີຍ. ກ່ອນທີ່ຈະຖຽງຫຍັງ ຄວນຟັງພວກເຂົາເວົ້າໃຫ້ຈົບກ່ອນ ເພາະເຖິງວ່າຄວາມຄິດເຫັນຂອງທ່ານ ແລະ ຄອບຄົວຈະບໍ່ກົງກັນ, ແຕ່ພວກເຂົາກໍພຽງແຕ່ຢາກໃຫ້ສິ່ງທີ່ດີທີ່ສຸດກັບທ່ານ ເຖິງວ່າສິ່ງນັ້ນທ່ານອາດຈະບໍ່ຕ້ອງການ ຫລື ບໍ່ເໝາະສົມກັບທ່ານກໍຕາມ.
