ລາວເພີ່ມບັນຊີຜະລິດຕະພັນໄມ້ທໍາມະຊາດເພື່ອສົ່ງອອກ

ລັດຖະບານໄດ້ເຫັນດີຮັບຮອງການເພີ່ມບັນຊີລາຍການຜະລິດຕະພັນໄມ້ທຳມະຊາດເພື່ອສົ່ງອອກຈາກ 6 ເພີ່ມຂຶ້ນເປັນ 9 ລາຍການ, ຂະນະດຽວກັນ ກໍເຫັນດີໃຫ້ອະນຸຍາດໃຫ້ປະຊາຊົນ ຫລື ຜູ້ປະກອບການທີ່ມີໄມ້ປູກເຊັ່ນ: ໄມ້ວິກ, ກະຖິນນະລົງ, ຢາງພາລາ ແລະ ໄມ້ສັກ ສາມາດສົ່ງອອກໄມ້ໄດ້ທຸກຮູບແບບໂດຍມີການປຸງແຕ່ງ ຫລືບໍ່ປຸງແຕ່ງກໍໄດ້ ເພື່ອແກ້ໄຂບັນຫາໄມ້ຕົກຄ້າງຢູ່ໂຮງງານປຸງແຕ່ງໄມ້ ແລະ ໄມ້ປູກທີ່ມີຈໍານວນຫລາຍ. ສ່ວນໄມ້ປູກປະເພດຫວ່ງຫ້າມອື່ນໆໃຫ້ປະຕິບັດຕາມຮູບແບບທີ່ກຳນົດໃນລາຍການຜະລິດຕະພັນໄມ້ທຳມະຊາດ) ແຕ່ໃຫ້ມີການຄຸ້ມຄອງຢ່າງຮັດກຸມ ເພື່ອບໍ່ໃຫ້ມີຊ່ອງຫວ່າງເອົາໄມ້ປະເພດອື່ນອອກ.
  ການເຫັນດີເປັນເອກະພາບໃນບັນຫາດັ່ງກ່າວມີຂຶ້ນໃນກອງປະຊຸມລັດຖະບານເປີດກວ້າງຄັ້ງທີ 1 ປະຈໍາປີ 2019 ໃນວາລະຂອງການສະຫລຸບການຈັດຕັ້ງປະຕິບັດຄໍາສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້ ໃນໄລຍະ 3 ປີຜ່ານມາ. ໂດຍກອງປະຊຸມໄດ້ຕີລາຄາວ່າ: ເຖິງວ່າຄະນະສະເພາະກິດ ແລະ ທຸກພາກສ່ວນໄດ້ເອົາໃຈໃສ່ປະຕິບັດໜ້າທີ່ຂອງຕົນຢ່າງຈິງຈັງ ແລະ ເຂັ້ມງວດກໍຕາມ, ແຕ່ກໍເຫັນວ່າຍັງມີສະພາບການລັກລອບຂຸດຄົ້ນ ແລະ ສົ່ງອອກໄມ້ເກີດຂຶ້ນ, ສະນັ້ນຈຶ່ງມອບໃຫ້ຄະນະສະເພາະກິດສືບຕໍ່ໃນວຽກງານດັ່ງກ່າວຢ່າງເຂັ້ມງວດກວ່າເກົ່າ, ພ້ອມທັງໃຫ້ຊີ້ນໍາໃຫ້ບັນດາເຈົ້າແຂວງແຕ່ລະທ້ອງຖິ່ນເອົາໃຈໃສ່ຕິດຕາມເຂັ້ມງວດເພື່ອບໍ່ໃຫ້ມີການລັກລອບຕັດໄມ້ເກີດຂຶ້ນອີກ.