ກະຊວງກະສິກໍາ-ປ່າໄມ້ ເລັ່ງຄວບຄຸມການລະບາດຂອງສັດຕູພືດຢູ່ຫຼາຍທ້ອງຖິ່ນ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ການຄວບຄຸມ ການລະບາດຂອງຕັກແຕນຝູງໄມ້ປ່ອງຢູ່ 5 ແຂວງພາກເໜືອ ໄດ້ສືບຕໍ່ຢ່າງຕໍ່ເນື່ອງ,  ປັດຈຸບັນໄດ້ຕັ້ງຄະນະວິຊາການ ສົມທົບກັບພາກສ່ວນກ່ຽວຂ້ອງ ເພື່ອປ້ອງກັນ ແລະ ຄວບຄຸມ ຕິດຕາມການລະບາດຂອງຕັກແຕນດັ່ງກ່າວ. ສໍາລັບຢູ່ແຂວງຫົວພັນ ຕັກແຕນຝູງໄມ້ປ່ອງໄດ້ລະບາດຢູ່ 9 ເມືອງ, 67 ບ້ານ, 147 ຈຸດວາງໄຂ່ ແລະ ໄດ້ສີດຢາປ້ອງກັນ ແລະ ກໍາຈັດແລ້ວ 22 ບ້ານ, 36 ຈຸດ. ຜ່ານການຕິດຕາມເຝົ້າລະວັງຢູ່ບ້ານນາເມືອງ, ນາຄາວ ເມືອງວຽງໄຊ ແລະ ບ້ານສົບບັ້ນ ເມືອງຊຽງຄໍ້ ເຫັນວ່າຍັງບໍ່ມີຄວາມເສຍຫາຍໃຫ້ແກ່ພືດ (ເຂົ້າໄຮ່ ແລະ ສາລີ) ຍ້ອນມີການປ້ອງກັນ ແລະ ກໍາຈັດ ໄດ້ຢ່າງທັນການ, ສ່ວນແຂວງອື່ນໆ ແມ່ນຍັງສືບຕໍ່ຕິດຕາມເຝົ້າລະວັງການເຄື່ອນຍ້າຍຝູງຕັກແຕນຈາກພື້ນທີ່ໜຶ່ງໄປຫາພື້ນທີ່ອື່ນ ເພື່ອກະກຽມການປ້ອງກັນ ແລະ ກໍາຈັດ ໃຫ້ທ່ວງທັນສະພາບການ.

ກະຊວງກະສິກໍາ ແລະ ປ່າໄມ້ ໃຫ້ຮູ້ຕື່ມວ່າ: ສ່ວນສະພາບການລະບາດຂອງບົ້ງຝູງສາລີ ໄດ້ລະບາດຢູ່ 7 ແຂວງຄື: ນະຄອນຫຼວງວຽງຈັນ, ໄຊຍະບູລີ, ອຸດົມໄຊ, ຊຽງຂວາງ, ແຂວງວຽງຈັນ, ບໍລິຄໍາໄຊ ແລະ ແຂວງສະຫວັນນະເຂດ, ມີເນື້ອທີ່ສາລີທີ່ໄດ້ຮັບຄວາມເສຍຫາຍ ທັງໝົດ ປະມານ 3.385 ເຮັກຕາ ໃນຈໍານວນ 27 ບ້ານ, 14 ເມືອງ, ໃນນັ້ນ, ລະບາດໜັກກວ່າໝູ່ແມ່ນຢູ່ 7 ບ້ານ ຂອງເມືອງປາກລາຍ ແຂວງໄຊຍະບູລີ ເຊິ່ງມີເນື້ອທີ່ສາລີຖືກທໍາລາຍ ທັງໝົດ 2.728 ເຮັກຕາ.