ວຽກງານແກ້ໄຂຄວາມທຸກຍາກ ແລະ ພັດທະນາຊົນນະບົດແມ່ນໜ້າທີ່ຂອງທຸກຄົນ

ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ກ່າວໃນກອງປະຊຸມຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ ໃນວັນທີ 28 ມິຖຸນານີ້ ທີ່ນະຄອນຫຼວງວຽງຈັນ ວ່າ: ການພັດທະນາຊົນນະບົດ ຫຼື ການຫັນເສດຖະກິດທໍາມະຊາດໄປສູ່ເສດຖະກິດສິນຄ້າ ແມ່ນບາດກ້າວບຸກທະລຸໃນການແກ້ໄຂຄວາມທຸກຍາກຂອງປະຊາຊົນດ້ວຍການຂຸດຄົ້ນ ແລະ ສຸມແຫຼ່ງທຶນຕ່າງໆ, ຊຶ່ງທັງໝົດນີ້ແມ່ນໜ້າທີ່ ແລະ ຄວາມຮັບຜິດຊອບຂອງທົ່ວພັກ, ທົ່ວລັດແລະ ທົ່ວປວງຊົນ ແລະ ພວກເຮົາດໍາເນີນກອງປະຊຸມທົບທວນ ການເຂົ້າຮ່ວມພັດທະນາຊົນນະບົດ ຂອງບັນດາຫົວໜ່ວຍທຸລະກິດ, ຜູ້ປະກອບການ ແລະ ປະຊາຊົນບັນດາເຜົ່າ ໂດຍຜ່ານຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກທົ່ວປະເທດ ໃນຄັ້ງນີ້,ເພື່ອກະກຽມໃຫ້ແກ່ກອງປະຊຸມຄັ້ງທີ XI ຂອງພັກ.
ໂອກາດນີ້, ທ່ານ ຄໍາໝັ້ນສູນວິເລີດ ລັດຖະມົນຕີ ກະຊວງພາຍໃນ, ຮອງປະທານຄະນະຊີ້ນໍາລະດັບຊາດກ່ຽວກັບການແຂ່ງຂັນ-ຍ້ອງຍໍຮັກຊາດ ແລະ ພັດທະນາ ກ່າວວ່າ:ກອງປະຊຸມຄັ້ງນີ້, ຈັດຂຶ້ນເພື່ອສືບຕໍ່ຊຸກຍູ້ຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງ ສູ່ລວງເລິກໃນທົ່ວປະເທດ, ໂດຍມີຈຸດປະສົງເພື່ອເຊີນຜູ້ປະກອບການທີ່ດໍາເນີນທຸລະກິດຢູ່ ສປປລາວ ປະກອບສ່ວນທາງດ້ານກໍາລັງແຮງ ແລະ ຫົວຄິດປະດິດສ້າງ ເຂົ້າຮ່ວມໃນການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ.
ຍ້ອນລັດຖະບານເຫັນໄດ້ວ່າ ພາກທຸລະກິດມີກໍາລັງແຮງ, ມີນໍ້າໃຈຮັກຊາດ,ມີທຶນ, ມີຄວາມສາມາດໃນການດໍາເນີນທຸລະກິດ, ມີເຄືອຂ່າຍທາງທຸລະກິດ, ມີຕະຫຼາດ, ມີກົນໄກການຈະລາຈອນສິນຄ້າ ແລະ ການບໍລິການທີ່ມີຄຸນນະພາບ ແລະ ມີຄວາມມຸ່ງມາດປາຖະໜາ ທີ່ຈະປະກອບສ່ວນເຂົ້າໃນການພັດທະນາຊົນນະບົດເພື່ອແກ້ໄຂ ຄວາມທຸກຍາກຂອງປະຊາຊົນບັນດາເຜົ່າ ດັ່ງທີ່ເຄີຍມີຕົວແບບທີ່ດີ ແລະ ມີນັກພັດທະນາດີເດັ່ນແຫ່ງຊາດມາແລ້ວ.
ສໍາລັບເນື້ອໃນການພັດທະນາຊົນນະບົດ ເພື່ອແກ້ໄຂຄວາມທຸກຍາກທີ່ສະເໜີໃຫ້ພາກທຸລະກິດມີ ຄື: ເຂົ້າຮ່ວມພັດທະນາຊົນນະບົດຮອບດ້ານຕາມທິດສ້າງຊົນນະບົດໃໝ່, ເຂົ້າໄປດໍາເນີນກິດຈະກໍາຕ່າງໆໃນການລົງທຶນໃສ່ສົ່ງເສີມການຜະລິດເປັນສິນຄ້າແລະ ການບໍລິການ, ເຂົ້າຮ່ວມພັດທະນາພື້ນຖານໂຄງລ່າງຮັບໃຊ້ການຜະລິດ ແລະ ການບໍລິການ, ເຂົ້າຝຶກອົບຮົມຍົກລະດັບວິຊາຊີບ, ພັດທະນາຊາວກະສິກອນ ແລະ ຖັນແຖວວິຊາການ ໃຫ້ຊໍານິຊໍານານ.ຂະບວນການຄັ້ງນີ້, ຕ້ອງໄດ້ສຸມໃສ່ໃນການລະດົມບັນດາຜູ້ປະກອບການໃນການເຂົ້າຮ່ວມລົງທຶນຮ່ວມກັບປະຊາຊົນ ໂດຍສະເພາະແມ່ນຊຸກຍູ້ໃຫ້ຜູ້ປະກອບການຂະໜາດກາງ ແລະ ຂະໜາດນ້ອຍຊ່ວຍໃຫ້ເຂົາເຈົ້າມີທ່າແຮງໃນ
ການຜະລິດ, ການປຸງແຕ່ງ ແລະ ການຊອກຫາຕະຫຼາດເຊິ່ງສອດຄ່ອງກັບທິດຂະບວນການແຂ່ງຂັນຮັກຊາດ ແລະພັດທະນາຕິດພັນກັບການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ.
ຖ້າຫາກບັນດານັກທຸລະກິດ, ຜູ້ປະກອບການ ແລະພັດທະນາກອນຮ່ວມແຮງຮ່ວມໃຈກັບບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນແຕ່ລະຂັ້ນ ດ້ວຍນໍ້າໃຈຮັກຊາດອັນແທ້ຈິງ, ພ້ອມກັບການສະໜັບສະໜູນຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນ ສືບຕໍ່ເພີ່ມກໍາລັງເຫື່ອແຮງ, ສະຕິປັນຍາ, ທຶນຮອນ, ເຕັກນິກ ແລະ ວິຊາການເຂົ້າໃສ່ການພັດທະນາຊົນນະບົດ, ແນ່ນອນພວກເຮົາຈະສາມາດແກ້ໄຂໄດ້ຄວາມທຸກຍາກຂອງປະຊາຊົນຕາມຄາດໝາຍກໍານົດໄວ້.