Unitel ນໍາສະເໜີເຕັກໂນໂລຊີທັນສະໄໝໃນງານ Lao ICT EXPO 2019

ໃນໂອກາດເຂົ້າຮ່ວມງານວາງສະແດງເຕັກໂນໂລຊີສື່ສານຂໍ້ມູນຂ່າວສານ(Lao ICT EXPO 2019)ທີ່ໄດ້ຈັດຂຶ້ນໃນລະຫວ່າງວັນທີ 25-30 ມິຖຸນານີ້,ທີ່ໂຮງແຮມ ດອນຈັນພາເລດ ນະຄອນຫລວງວຽງຈັນ, ບໍລິສັດສະຕາ ໂທລະຄົມເຊິ່ງເປັນຜູ້ໃຫ້ບໍລິການດ້ານໂທລະຄົມມະນາຄົມແຖວຫນ້າໃນລາວດ້ວຍເຄືອຂ່າຍທີ່ກ້ວາງຂວາງ ແລະ ຫນ້າເຊື່ອຖືທີ່ສຸດ, ໄດ້ນໍາຜະລິດຕະພັນເຕັກໂນໂລຊີຂໍ້ມູນຂ່າວສານທີ່ທັນສະໄຫມຈາກຫວຽດນາມໃນ 4 ຂົງເຂດວຽກງານມາວາງສະແດງໃຫ້ມູນຊົນກໍຄືສັງຄົມໄດ້ເຫັນຄື: ວຽກງານການຄຸ້ມຄອງໂທລະຄົມລະບົບເຊື່ອມໂຍ່ງ,ໂອນຖ່າຍ ແລະ ວິໄຈຂໍ້ມູນດາຕ້າ (E-Government),ລະບົບຄຸ້ມຄອງທາງດ້ານສາທາລະນະສຸກ, ລະບົບຄຸ້ມຄອງການບໍລິຫານທຸລະກິດແລະ ລະບົບຄຸ້ມຄອງຖານຂໍ້ມູນວຽກງານດ້ານການສຶກສາ (E-Learning).

ທ່ານ ລີວ ແມງ ຮ່າ (Luu Manh Ha)ອໍານວຍການບໍລິສັດສະຕາໂທລະຄົມ ໃຫ້ຮູ້ວ່າ: ວາງສະແດງຄັ້ງນີ້ທາງບໍລິສັດໄດ້ນໍາສະເຫນີລະ ບົບເຕັກໂນໂລຊີ ITC ທີ່ທັນສະໄຫມຈາກຫວຽດນາມ 4 ຂົງເຂດວຽກງານທີ່ພວມຖືກນໍາໃຊ້ຢ່າງກວ້າງຂວາງຢູ່ຫວຽດນາມໂດຍສະເພາະ E-Government ລະບົບເຊື່ອມໂຍ່ງ,ໂອນຖ່າຍ ແລະ ວິໄຈຂໍ້ມູນທີ່ເປັນລະບົບທີ່ໄດ້ຮັບການພັດທະນາຂຶ້ນໃຫມ່, ເຊິ່ງໄດ້ນໍາໃຊ້ໃນຂະແຫນງການຂອງລັດ ແລະ ຫົວຫນ່ວຍທຸລະກິດໂດຍຫວຽດເທວໂກຣໂບຣກຣຸບໄດ້ຜັນຂະຫຍາຍໃນຂອບເຂດ 11 ປະເທດ.

ສ່ວນເຕັກໂນໂລຊີລະບົບຄຸ້ມຄອງທາງດ້ານສາທາລະນະສຸກ ປັດຈຸບັນນັບແຕ່ການກວດສຸຂະພາບ, ສັກຢາກັນພະຍາດ ແລະ ປະຫວັດຂອງຄົນເຈັບອື່ນໆ ເຊິ່ງລະບົບດັ່ງກ່າວແມ່ນຈະຊ່ວຍຄຸ້ມຄອງຈັດເກັບຖານຂໍ້ມູນຕ່າງໆໄວ້ ແລະ ບົ່ງມະຕິພະຍາດ ຫລື ການໃຫ້ຢາຕ່າງໆໄດ້ຢ່າງຊັດແຈ້ງ ແລະ ທັນສະໄຫມວ່ອງໄວຂຶ້ນຕື່ມອີກ.ສໍາລັບລະບົບຄຸ້ມຄອງການບໍລິຫານທຸລະກິດຈະຊ່ວຍຄຸ້ມຄອງການບໍລິ ຫານຫົວຫນ່ວຍທຸລະກິດຕ່າງໆໃຫ້ມີຄວາມທັນສະໄຫມກ້າວກະໂດດຂຶ້ນສູ່ອາຊຽນ, ມີການບໍລິຫານທີ່ກ້າວໄກວ່ອງໄວຂຶ້ນ.

ສ່ວນລະບົບຄຸ້ມຄອງຖານຂໍ້ມູນວຽກງານດ້ານການສຶກສາ E-Learning ເຊິ່ງຫວຽດນາມເປັນປະເທດຫນຶ່ງ ທີ່ມີຊື່ສຽງໃນດ້ານການສຶກສາທີ່ທັນສະໄຫມ ແລະໄດ້ນໍາລະບົບດັ່ງກ່າວມາ ສະເຫນີເພື່ອນໍາໃຊ້ໃນລາວ ເພື່ອຊ່ວຍຄຸ້ມຄອງນັບແຕ່ການຕິດຕາມນັກຮຽນ-ນັກສຶກສາ,ຜົນຄະແນນຂອງນັກຮຽນລວມເຖິງພຶດຕິກໍາຕ່າງໆເພື່ອຊ່ວຍຍົກລະດັບວຽກງານການສຶກສາຂອງລາວທຽບເທົ່າສາກົນຫລາຍຂຶ້ນ.

ທ່ານ ລີວ ແມງ ຮ່າ ໃຫ້ຮູ້ຕື່ມວ່າ: ບໍລິສັດສະຕາ ໂທລະຄົມ ບໍ່ພຽງແຕ່ສະຫນອງບໍລິການດ້ານໂທລະຄົມມະນາຄົມເທົ່ານັ້ນ ແຕ່ເປັນຜູ້ສະຫນອງດ້ານເຕັກໂນໂລຊີຂໍ້ມູນຂ່າວສານທີ່ທັນສະໄຫມເພື່ອໃຫ້ລັດຖະບານ ແລະສັງຄົມໄດ້ຮັບຮູ້ເຖິງຄວາມອາດສາມາດທ່າແຮງດ້ານເສດຖະກິດໃນການພັດທະນາເຕັກໂນໂລຊີຂໍ້ມູນຂ່າວສານໃນອຸດສາຫະກໍາຍຸກ 4.0ໃຫ້ທັນສະໄຫມຫລາຍຂຶ້ນ.

ຢູນີເທວ ແມ່ນເຄື່ອຂ່າຍທີ່ສະ ຫນອງບໍລິການດ້ານໂທລະຄົມໃນລາວ, ເປັນເຄື່ອຂ່າຍທີ່ມີຂອບເຂດສົ່ງສັນຍານທີ່ກວມພື້ນທີ່ກວ້າງຂວາງທີ່ສຸດ, ເປັນເຄື່ອຂ່າຍທີ່ເຊື່ອຖືໄດ້, ຢູນີເທວແມ່ນເຄື່ອງຫມາຍການຄ້າຂອງບໍລິສັດສະຕາໂທລະຄົມ, ໂດຍການຮ່ວມທຶນລະຫວ່າງ ບໍລິສັດ ລາວເອເຊຍໂທລະຄົມ ແລະ ບໍລິສັດ ຫວຽດເທວໂກຣໂບຣ ກຣຸບ ແຫ່ງ ສສຫວຽດນາມ.