ນະຄອນຫລວງວຽງຈັນ ເຂັ້ມງວດມາດຕະການປ້ອງກັນເຊື້ອພະຍາດອະຫິວາໝູອາຟຣິກາກວດພົບຢູ່ພາກໃຕ້ຂອງລາວ
ພະແນກກະສິກໍາ ແລະ ປ່າໄມ້ ນະຄອນຫລວງວຽງຈັນໄດ້ຍົກລະດັບມາດຕະການກວດກາ ແລະປ້ອງກັນເຊື້ອພະຍາດອະຫິວາໝູອາຟຣິກາ ພາຍຫລັງພົບວ່າມີການກວດພົບພະຍາດດັ່ງກ່າວຢູ່ແຂວງສາລະວັນ ເພື່ອບໍ່ໃຫ້ເຊື້ອພະຍາດດັ່ງກ່າວແຜ່ລາມອອກສູວົງກວ້າງອັນໄດ້ສົ່ງຜົນກະທົບຕໍ່ການຜະລິດໝູ ແລະ ການດໍາລົງຊີວິດຂອງປະຊາຊົນ.
ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໄດ້ໃຫ້ຮູ້ໃນວັນທີ 24 ມິຖຸນານີ້ວ່າ ປັດຈຸບັນ ທີມງານກວດກາ ກໍໄດ້ວາງກຳລັງລົງກວດ 24 ຊົ່ວໂມງ ຢູ່ແຕ່ລະເສັ້ນທາງເລກທີ 13 ເໜືອ ແລະ 13 ໃຕ້ ແລະ ບັນດາຊາຍແດນທີ່ຕິດຈອດກັບປະເທດໃກ້ຄຽງເພື່ອເຂັ້ມງວດກວດກາການນຳເຂົ້າໝູທີ່ມາຈາກຕ່າງແຂວງກ່ອນນຳມານະຄອນຫລວງວຽງຈັນ ສ່ວນຢູ່ຕາມທ້ອງຕະຫລາດກໍໄດ້ມີໜ່ວຍງານສັດຕະວະແພດລ ງກວດກາຢູ່ເປັນປະຈຳຢ່າງໃກ້ຊິດ, ຖ້າພົບກໍລະນີສົງໄສແມ່ນຢຶດສິນຄ້າມາກວດກາທັນທີ, ແນໃສ່ບໍ່ໃຫ້ເກີດການແຜ່ລະບາດເປັນວົງກວ້າງ.
ພະຍາດອະຫິວາໝູອາຟຣິກາ ເປັນພະຍາດທີ່ຮ້າຍແຮງ ແລະ ແຜ່ລາມໄວສຳລັບໝູທຸກຊະນິດ, ທຸກເພດ, ທຸກອາຍຸ ເຊິ່ງມັນມີຄວາມທົນທານສູງຕໍ່ສະພາບແວດລ້ອມ, ບໍ່ມີຢາກັນ ຫຼື ປິ່ນປົວໂດຍກົງ ອັດຕາການຕາຍຂອງໝູທີ່ຕິດເຊື້ອພະຍາດນີ້ສູງເຖິງ100% ແຕ່ບໍ່ຕິດໃສ່ຄົນ.
