ສະພາຮັບຮອງເອົາຮ່າງກົດໝາຍວ່າດ້ວຍ ການຄຸ້ມຄອງໄພພິບັດ (ສະບັບສ້າງໃໝ່)

    ຮ່າງກົດໝາຍວ່າດ້ວຍ ການຄຸ້ມຄອງໄພພິບັດ (ສະບັບສ້າງໃໝ່) ໄດ້ຖືກຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII, ໃນວັນທີ 24 ມິຖຸນານີ້, ໂດຍການເປັນປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ. ພາຍຫຼັງທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ສະເໜີຮ່າງກົດໝາຍວ່າດ້ວຍ ການຄຸ້ມຄອງໄພພິບັດ (ສະບັບສ້າງໃໝ່) ຕໍ່ກອງປະຊຸມວ່າ: ໃນໄລຍະຜ່ານມາ ໄດ້ມີນິຕິກໍາເປັນບ່ອນອີງໃນການຄຸ້ມຄອງພຽງແຕ່ ດໍາລັດວ່າດ້ວຍຈັດຕັ້ງ ແລະ ການເຄື່ອນໄຫວຂອງຄະນະກໍາມະການປ້ອງກັນ ແລະ ຄວບຄຸມໄພພິບັດ ສະບັບເລກທີ 75/ນຍ ລົງວັນທີ 28 ກຸມພາ 2018 ແຕ່ເຫັນວ່າ ການກຽມພ້ອມ, ການສະກັດກັ້ນ, ການຫຼຸດຜ່ອນຄວາມສ່ຽງ, ການໂຕ້ຕອບ, ຊອກຄົ້ນ ຫຼືຄົ້ນຫາ, ກູ້ໄພ, ການຊ່ວຍເຫຼືອບັນເທົາທຸກສຸກເສີນ, ການຟື້ນຟູບູລະນະ ແລະ ກໍ່ສ້າງຄືນໃໝ່ຫຼັງໄພິບັດ ທີ່ເກີດຈາກທໍາມະຊາດ ຫຼືມະນຸດສ້າງຂຶ້ນນັ້ນ ຍັງບໍ່ທັນໄດ້ກໍານົດລະອຽດ ແລະ ຍັງບໍ່ມີຄວາມເປັນເອກະພາບກັນ, ບາງຂະແໜງການຍັງບໍ່ຕອບສະໜອງໄດ້ຕາມທິດທາງ ແລະ ແນວທາງນະໂຍບາຍເທົ່າທີ່ຄວນ.

ສ່ວນເຫັນຜົນ ແລະ ຄວາມຈໍາເປັນ ໃນການສ້າງຮ່າງກົດໝາຍສະບັບນີ້ຂຶ້ນ ເພື່ອເຮັດໃຫ້ວຽກຄຸ້ມຄອງໄພພິບັດ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ ແລະ ທັນສະໄໝ ແນໃສ່ເຝົ້າລະວັງ, ຫຼຸດຜ່ອນຜົນກະທົບທີ່ເກີດຈາກໄພພິບັດຕໍ່ສຸຂະພາບ, ຊີວິດ, ຊັບສິນຂອງລັດ, ລວມໝູ່, ປະຊາຊົນ, ສິ່ງແວດລ້ອມ ແລະ ໂຄງລ່າງພື້ນຖານ ພ້ອມທັງຟື້ນຟູ, ບູລະນະ ແລະ ກໍ່ສ້າງຄືນໃໝ່ຫຼັງໄພພິບັດ, ຮັບປະກັນການສະໜອງຂໍ້ມູນຂ່າວສານ, ວ່ອງໄວ, ຊັດເຈນ, ສາມາດເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ຕາມທິດສີຂຽວ ແລະ ຍືນຍົງ ດັ່ງນັ້ນ, ຈຶ່ງມີຄວາມຈໍາເປັນສ້າງຮ່າງກົດໝາຍສະບັບນີ້ ເປັນເຄື່ອງມືທາງດ້ານນິຕິກໍາທີ່ໜັກແໜ້ນ ແລະ ກໍນົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມກວດກາການເຄື່ອນໄຫວວຽກງານຄຸ້ມຄອງໄພພິບັດ ໃຫ້ມີຄວາມຈະແຈ້ງ, ຄົບຖ້ວນ ແລະ ຮັດກຸມ.

    ຮ່າງກົດໝາຍວ່າດ້ວຍ ການຄຸ້ມຄອງໄພພິບັດ ປະກອບມີ 10 ພາກ, 8 ໝວດ ແລະ 76 ມາດຕາ. ເມື່ອກົດໝາຍສະບັບນີ້, ໄດ້ຖືກຮັບຮອງ ແລະ ປະກາດໃຊ້ ຈະເປັນເຄື່ອງມືອັນສໍາຄັນໃຫ້ແກ່ຂະແໜງການແຮງງານ ແລະ ສະຫວັດດີການສັງຄົມ ກໍຄືຂະແໜງການທີ່ກ່ຽວຂ້ອງ ເພື່ອນໍາໃຊ້ເຂົ້າໃນການຄຸ້ມຄອງໃຫ້ໄດ້ຜົນ. ມີນິຕິກໍາທີ່ມີບ່ອນອີງທີ່ໜັກແໜ້ນ ໃຫ້ແກ່ການຈັດຕັ້ງປະຕິບັດ ແລະ ຕິດຕາມກວດກາວຽກງານຄຸ້ມຄອງໄພພິບັດໃຫ້ມີປະສິດສິພາບ, ປະສິດທິຜົນສູງ, ມີຄວາມໂປ່ງໃສ ແລະ ຍຸຕິທໍາ ເຊິ່ງເປັນພື້ນຖານອັນສໍາຄັນໃຫ້ການສ້າງລັດແຫ່ງກົດໝາຍ ເພື່ອຄຸ້ມຄອງລັດດ້ວຍກົດໝາຍ, ເຮັດໃຫ້ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ  ທຸກພາກສ່ວນທີ່ກ່ຽວຂ້ອງ ເຂົ້າໃຈເຖິງຄວາມສໍາຄັນ ແລະ ມີສ່ວນຮ່ວມ ໃນວຽກງານຄຸ້ມຄອງໄພພິບັດ, ເຮັດໃຫ້ການກໍານົດແຜນງານ, ໂຄງການຂອງອົງການຈັດຕັ້ງຂັ້ນລັດ, ຂັ້ນສູນກາງ ແລະ ຂັ້ນທ້ອງຖິ່ນເປັນລະບົບ ແລະ ມີປະສິດທິຜົນຂຶ້ນກວ່າເກົ່າ ເຊິ່ງຈະເຮັດໃຫ້ມີຄວາມສະດວກໃນການຄຸ້ມຄອງກວດກາ ແລະ ວຽກງານດັ່ງກ່າວ.