ກວດພົບເຊື້ອພະຍາດອະຫິວາໝູອາຟຣິກາ ຄັ້ງທໍາອິດໃນລາວ ຢູ່ເມືອງ ຕຸ້ມລານ ແຂວງສາລະວັນ

ໃນວັນທີ 21 ມິຖຸນານິີ້, ທ່ານ ສີແສງ ຂຸນສີ ຮອງຫົວໜ້າກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນວັນທີ 17 ມິຖຸນາຜ່ານມາ, ສູນວິໄຈ ພະຍາດສັດ ຂອງຕົນ ໄດ້ກວດພົບເຊື້ອພະຍາດອະຫິວາໝູອາຟຣິກາ ຈໍານວນ 8 ຕົວຢ່າງທັງໝົດ ທີ່ສົ່ງມາກວດຈາກ 7 ບ້ານທີ່ມີການລະບາດຄື: ສາມັກຄີໄຊ, ດິນດາກ, ໂພນງາມ, ແກ້ງຮັງ, ນາລະຈາງ, ຫ້ວຍຫວ້າ ແລະ ບ້ານຮ່ອງໃຫຍ່ ເມືອງ ຕຸ້ມລານ ແຂວງສາລະວັນ. ເຊິ່ງເຊື້ອພະຍາດອາຫິວາໝູອາຟຣິກາ ທີ່ກວດພົບຄັ້ງນີ້ ແມ່ນເປັນຄັ້ງທໍາອິດທີ່ກວດພົບຢູ່ລາວ ແລະ ຜ່ານມາບໍ່ເຄີຍມີການລະບາດຂອງພະຍາດນີ້ເທື່ອ. ການລະບາດຂອງພະຍາດດັ່ງກ່າວເຮັດໃຫ້ມີໝູຕາຍແລ້ວ 900 ກວ່າໂຕ ເທົ່າກັບ 40% ຂອງຈໍານວນໝູທັງໝົດ, ສ່ວນສາເຫດການລະບາດຂອງພະຍາດດັ່ງກ່າວ ເປັນຍ້ອນຮ້ານອາຫານຫວຽດນາມ ມີການລັກລອບນໍາຜະລິດຕະພັນໝູເຂົ້າມາ. ໃນພື້ນທີ່ 7 ບ້ານທີ່ໄດ້ຮັບຜົນກະທົບ ພາກສ່ວນກ່ຽວຂ້ອງໄດ້ແນະນໍາ ໃຫ້ປະຕິບັດບາງມາດຕະການດ່ວນສຸກເສີນຄື: ໃຫ້ຕິດຕາມເຝົ້າລະວັງຢ່າງເຄັ່ງຄັດ, ພ້ອມທັງຕັ້ງດ່ານກວດກາສັດຕະວະແພດຊົ່ວຄາວ ກວດຢຶດໝູ ແລະ ຜະລິດຕະພັນໝູ ທີ່ເຄື່ອນຍ້າຍຈາກເຂດລະບາດ, ພົ່ນຢາຊ້າເຊື້ອພາຫະນະທີ່ອອກຈາກເຂດດັ່ງກ່າວ ເພື່ອປ້ອງກັນບໍ່ໃຫ້ພະຍາດແຜ່ລາມໄປສູ່ບ້ານ ຫຼືສະຖານທີ່ອື່ນໆ. ພະຍາດອະຫິວາໝູອັບຟຣິກາ ແມ່ນພະຍາດທີ່ຮ້າຍແຮງ ແລະ ແຜ່ລາມໄວສໍາລັບໝູທຸກຊະນິດ, ທຸກເພດ ແລະ ທຸກອາຍຸ. ພະຍາດດັ່ງກ່າວມີຄວາມທົນທານສູງຕໍ່ສະພາບແວດລ້ອມ, ບໍ່ມີຢາກັນ, ບໍ່ມີຢາປິ່ນປົວໂດຍກົງ ອັດຕາການຕາຍຂອງໝູທີ່ຕິດເຊື້ອພະຍາດນີ້ ສູງເຖິງ 100% ແຕ່ບໍ່ຕິດໃສ່ຄົນ. ເພື່ອບໍ່ໃຫ້ພະຍາດດັ່ງກ່າວແຜ່ລາມອອກສູ່ວົງກວ້າງ ແລະ ສົ່ງຜົນກະທົບດ້ານລົບຕໍ່ການຜະລິດໝູ ແລະ ການດໍາລົງຊີວິດຂອງປະຊາຊົນ ຕ້ອງພ້ອມກັນຕ້ານ, ສະກັດກັ້ນ ແລະ ຕອບໂຕ້ພະຍາດດັ່ງກ່າວໃຫ້ສະຫງົບລົງໂດຍໄວ.