ຖາມຂ່າວ ຊາວສະໜາມໄຊ

ໂດຍ: ມຶກບໍ່ແຫ້ງ

ເຫດການຄູກັນນໍ້າ ເຂື່ອນເຊປຽນ-ເຊນໍ້ານ້ອຍ ແຕກໄດ້ຜ່ານໄປແລ້ວເກືອບຂວບປີ, ມາຮອດນີ້ ກໍເຖິງຍາມ ປັກໄຮ່ ໃສ່ນາ ເຊິ່ງປະຊາຊົນເຂດດັ່ງກ່າວເຄີຍສືບທອດກັນມາຫຼາຍເຊັ່ນຄົນ ແຕ່ປີນີ້ບໍ່ຮູ້ວ່າເຂົາຈະ ມີຖີຊີວິດປ່ຽນໄປ ແນວໃດ?

ແນ່ນອນຢູ່ແລ້ວ ວ່າເຫດການຄູກັນນໍ້າ ເຂື່ອນເຊປຽນ ເຊນໍ້ານ້ອຍແຕກນັ້ນ ຍັງບໍ່ທັນເລືອນລາງຈາກຄວາມຊົງຈຳ ທີ່ສັ່ນສະເທືອນຂວັນຂອງຄົນທັງປະເທດເຮົາເທື່ອດອກ ເຖິງວ່າຈະຜ່ານພົ້ນມາໄດ້ ເກືອບໜຶ່ງປີແລ້ວກໍຕາມ ເພາະໃຜກໍຮູ້ວ່ານີ້ແມ່ນ ໄພພິບັດ ທີ່ຮ້າຍແຮງທີ່ສຸດໃນປະຫວັດສາດພວກເຮົາ.

ເຫດການດັ່ງກ່າວເຮັດໃຫ້ປະຊາຊົນຫຼາຍພັນຄົນໄຮ້ທີ່ຢູ່ອາໄສ, ຈຳນວນໜຶ່ງກໍເສຍຊີວິດໄປ ແຕ່ຜູ້ຍັງນັ້ນ ພັດຍັງອົກສັ່ນຂວັນຫາຍບໍ່ແລ້ວ, ທັງການດຳຊີວິດກໍແຕກຕ່າງຈາກໄປຈາກແຕ່ກ່ອນ ໂດຍທີ່ເຂົາເຈົ້າ ບໍ່ສາມາດກັບໄປຢູ່ບ້ານເກົ່າໄດ້ອີກ.

ຍ້ອນແນວນັ້ນ ທາງການເຮົາ ສົມທົບກັບ ປະເທດເພື່ອນມິດ, ຜູ້ພັດທະນາເຂື່ອນ, ຄູ່ຮ່ວມພັດທະນາຕ່າງໆ ໄດ້ເຂົ້າໄປຊ່ວຍເຫຼືອຫຼາຍວິທີ ບໍ່ວ່າຈະເປັນການ ແຈກຢາຍເງິນຄ່າຊົດເຊີຍໃຫ້ ໂດຍສະເພາະ ຄອບຄົວທີ່ມີຜູ້ເສຍຊີວິດ, ກໍ່ສ້າງທີ່ພັກເຊົາຊົ່ວຄາ, ບາງຜ່ອງ ກໍໄດ້ຮັບ ລົດໄຖ ແລະແນວເຂົ້າປູກ ເພື່ອຈະໄດ້ເຮັດນາ ຕາມທີ່ເຄີຍເຮັດມາ.

ແຕ່ເຖິງວ່າ ຈະມີຄວາມພະຍາຍາມ ໃຫ້ການຊ່ວຍເຫຼືອດັ່ງທີ່ກ່າວມານັ້ນກໍຕາມ ຍັງມີຜູ້ທີ່ໄດ້ຮັບຜົນກະທົບນັ້ນ ບໍ່ໄດ້ຮັບການຟື້ນຟູຊີວິດການເປັນຢູ່ເທົ່າທີ່ຄວນ, “ສຳລັບກໍລະນີ ເຂື່ອນເຂື່ອນເຊປຽນ-ເຊນໍ້ານ້ອຍແຕກ ຂ້າພະເຈົ້າ ໄປເຫັນຕົວຈິງມາແລ້ວ… ດຽວນີ້ ປະຊາຊົນອາໄສຢູ່ເຮືອນເຫຼັກ ບໍ່ແມ່ນເຮືອນຊໍ້າຂ້າພະເຈົ້າວ່າ ມັນເປັນຕູບເຫຼັກຕໍ່ກັນ” ກ່າວໂດຍ ທ່ານ ສາຍທອງ ແກ້ວດວງດີ ສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນ ໃນວາລະການດຳເນີນກອງປະຊຸມສະໄໝສາມັນເທື່ອ 7 ຂອງສະມາຊິກສະພາແຫ່ງຊາດຊຸດທີ 8.

ທ່ານ ກ່າວຕໍ່ໄປວ່າ “ສິ່ງທີ່ປະຊາຊົນສະເໜີມາມີ 3 ບັນຫາ ຄື ທີ່ຢູ່ອາໄສ, ບ່ອນທຳມາຫາກິນ ແລະພາຫະນະ ຂອງເຂົາເຈົ້າ… ລົດໄຖຂອງເຂົາເຈົ້າຖືກປະຖິ້ມໄວ້ຢູ່ກາງທົ່ງນາມາໄດ້ 6 ເດືອນ ແລ້ວ ເປັນຫຍັງຈຶ່ງບໍ່ຂຽນໃສ່ ຈະຊົດເຊີຍເທົ່າໃດ, ພວກເຮົາບໍ່ຄົ້ນບັນຫາ ຊ່ວຍເຂົາເຈົ້າເລີຍ ອັນນີ້ຄວນເບິ່ງຄືນ ສິ່ງທີ່ຂຽນລົງໄປ”.

ເຊັ່ນດຽວກັນນັ້ນ, ທ່ານ ກົງຈີ ຢາງຈື ສະມາຊິກສະພາແຫ່ງຊາດ ເຂດເລືອກຕັ້ງທີ 2 ແຂວງຜົ້ງສາລີ ກໍກ່າວວ່າ “ດຽວນີ້ປະຊາຊົນ (ຜູ້ໄດ້ຮັບຜົນກະທົບ ຈາກເຂື່ອນແຕກດັ່ງກ່າວ) ທຸກຍາກຫຼາຍ, ບ່ອນປະຊາຊົນຢູ່ຕອນນີ້ ຮ້ອນປານເຕົາອົບ ປ່ອຍໃຫ້ເຂົາເຈົ້າຢູ່ຫຼາຍເດືອນປານນັ້ນໄດ້ແນວໃດ?​ ຂ້າພະເຈົ້າເຫັນວ່າ ບັນຫານີ້ ຈະຕ້ອງຖືກແກ້ໄຂ ເພາະດຽວນີ້ ປະຊາຊົນໝົດກຳລົງໃຈ ບໍ່ຮູ້ວ່າ ຈະສືບຕໍ່ສ້າງສາພັດທະນາແນວໃດຕໍ່ໄປ”

ຈາກການປະກອບຄຳເຫັນດັ່ງກ່າວ ມັນໄດ້ສະທ້ອນໃຫ້ພວກເຮົາເຫັນວ່າ ປະຊາຊົນຊາວສະໜາມໄຊ ໂດຍສະເພາະ ຜູ້ທີ່ໄດ້ຮັບຜົນກະທົບນັ້ນ ມີຄວາມເດືອດຮ້ອນ ແລະ ຕ້ອງການ ການຊ່ວຍເຫຼືອຫຼາຍສໍ່າໃດ.

ເມື່ອບໍ່ດົນຜ່ານມາ ຄະນະກວດສອບ ຫາສາເຫດຂອງ ເຂື່ອນແຕກນັ້ນໄດ້ເປີດເຜີຍຕໍ່ສາທາລະນະຊົນ ເຊິ່ງຫຼາຍຄົນກໍເຫັນວ່າ “ເປັນພາສາ ທີ່ປະຊາຊົນທົ່ວໄປ ເຂົ້າໃຈຍາກວ່າ ເຂື່ແຕກນັ້ນຍ້ອນຫຍັງກັນແທ້”.

ເປັນສິ່ງຈະແຈ້ງວ່າ ຄົນສ່ວນຫຼາຍໃຫ້ຄວາມສົນໃຈຕໍ່ ການເປີດເຜີຍສາເຫດຂອງເຂື່ອນແຕກພາຍຫຼັງເກືອບ 11​ເດືອນນັ້ນ ໜ້ອຍກວ່າ ການເປັນຫ່ວງວ່າ ປະຊາຊົນ ທີ່ໄດ້ຮັບຜົນກະທົບນັ້ນ ຈະໄດ້ຮັບການຟື້ນຟູທີ່ດີ ແລະໄວວາ ເທົ່າໃດ. ຈົ່ງຮ່ວມມືກັນຢ່າງຈິງຈັງ ແລະຈິງໃຈກວ່ານີ້ ເພື່ອຊ່ວຍໃຫ້ປະຊາຊົນ ທີ່ໄດ້ຮັບຜົນກະທົບ ໄດ້ກັບ ມາມີຊີວິດທີ່ດີກວ່າເກົ່າ.