ແຂວງອຸດົມໄຊ ມີຄູບໍ່ທັນໄດ້ບັນຈຸເຂົ້າເປັນລັດຖະກອນເຖິງ 850 ຄົນ

ໃນໂອກາດເຂົ້າຮ່ວມກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII, ທ່ານນາງ ສົມຈັນ ຈິດວົງເດືອນ ສະມາຊິກສະພາແຫ່ງຊາດ ເຂດເລືອກຕັ້ງທີ 4 ແຂວງອຸດົມໄຊ ໄດ້ໃຫ້ສໍາພາດວ່າ: ປີນີ້ແຂວງອຸດົມໄຊ ໄດ້ຮັບໂກຕາຄູພຽງແຕ່ 39 ຄົນ , ຂະນະດຽວກັນມີຄູບໍ່ທັນໄດ້ບັນຈຸເຂົ້າເປັນລັດຖະກອນເຖິງ 850 ຄົນ ແລະ ທົ່ວແຂວງໄດ້ຮັບໂກຕາແພດ 20 ກວ່າຄົນ, ໃນບັນດາສຸກສາລາຕ່າງໆຍັງມີແພດ ອາສາສະໜັກເປັນຈຳນວນຫຼວງຫຼາຍບໍ່ທັນໄດ້ເຂົ້າບັນຈຸລັດຖະກອນ ແຕ່ເຂົາເຈົ້າມີຄວາມຕັດສິນໃຈເຮັດໜ້າທີ່ປິ່ນປົວ ແລະ ຮັກສາສຸຂະພາບຂອງຄົນເຈັບດ້ວຍຄວາມບຸກບືນຫ້າວຫັນຮັກຕໍ່ອາຊີບ ແລະ ຊື່ສັດຕໍ່ຈັນຍາບັນ, ຕໍ່ບັນຫາດັ່ງກ່າວ ຮຽກຮ້ອງໃຫ້ລັດຖະບານຄວນມີວິທີການ ເພີ່ມໂກຕາຄູ ແລະ ແພດ ໃຫ້ຫຼາຍ ເຊິ່ງເຫັນວ່າມີຄວາມສໍາຄັນ ແລະ ຈໍາເປັນຕໍ່ການດໍາລົງຊີວິດຂອງປະຊາຊົນບັນດາເຜົ່າ.

ໃນຂະນະດຽວກັນນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວໃນກອງປະຊຸມສະພາແຫ່ງຊາດທີ່ພວມດໍາເນີນຢູ່ໃນປັດຈຸບັນວ່າ: ສັ່ງຫ້າມເດັດຂາດບໍ່ໃຫ້ຮັບເອົາພະນັກງານສັນຍາຈ້າງ ແລະ ອາສາສະໝັກໃນຂະແໜງການຕ່າງໆຂອງລັດເຂົ້າມາອີກ ເພາະພະນັກງານສັນຍາຈ້າງ ແລະ ອາສາສະໝັກທີ່ມີຢູ່ໃນປັດຈຸບັນຍັງບໍ່ສາມາດແກ້ໄຂໄດ້ໝົດ. ການເຮັດວຽກຂອງແຕ່ຂະແໜງການຂອງລັດແຕ່ນີ້ຕໍ່ໄປ ເນັ້ນໃສ່ຄຸນນະພາບເປັນຕົ້ນຕໍ ແລະ ພະນັກງານຜູ້ໜຶ່ງຕ້ອງເຮັດໄດ້ຫຼາຍໜ້າວຽກຢ່າງມີປະສິດທິພາບ, ປັດຈຸບັນພະນັກງານລັດຖະກອນຂອງລາວທີ່ມີຢູ່ແມ່ນມີຫຼາຍແລ້ວເມື່ອທຽບໃສ່ກັບປະເທດອື່ນ ການທີ່ຈະຮັບເອົາພະນັກງານສັນຍາຈ້າງ ແລະ ອາສາສະໝັກເຂົ້າມາອີກ ຈະເຮັດໃຫ້ກົງຈັກການຈັກຕັ້ງຂອງລັດຖະບານໃຫຍ່ອອກ, ຂະນະດຽວກັນການລໍຖ້າເຂົ້າລັດຖະກອນຂອງພະນັກງານສັນຍາຈ້າງ ແລະ ອາສາສະໝັກຈະດົນອອກໄປອີກ ເພາະໂກຕາຮັບພະນັກງານໃໝ່ຂອງລັດຖະບານນັບມື້ນັບຫຼຸດລົງ. ສໍາລັບວີທີແກ້ໄຂພະນັກງານສັນຍາຈ້າງ ແລະ ອາສາສະໝັກໃນຂະແໜງການຕ່າງໆຂອງລັດທີ່ມີຢູ່ ຂະແໜງການກ່ຽວຂ້ອງຕ້ອງຝຶກອົບຮົມວິຊາຊີບໃຫ້ເຂົ້າເຈົ້າ ໃຫ້ແນະນໍາເຂົາເຈົ້າໃຫ້ໄປເຮັດວຽກນໍາເອກະຊົນ ຫຼືໂຄງການຕ່າງໆຕາມຄວາມສາມາດ ເພື່ອໃຫ້ມີບ່ອນທໍາມາຫາກິນ ເພື່ອບໍ່ໃຫ້ເຂົາເຈົ້າລໍຖ້າໂກຕາລັດຖະກອນທີ່ມີຈໍາກັດໃນແຕ່ລະປີ.