ນັບແຕ່ເດືອນກໍລະກົດເປັນຕົ້ນໄປເຈົ້າໜ້າທີ່ຈະເລີ່ມປັບໃໝຜູ້ທີ່ຍັງບໍ່ໄປເສຍຄ່າທາງ
ໃນວັນທີ 13-14 ມິຖຸນາ ນີ, ເຈົ້າໜ້າທີ່ຈະລາຈອນ ກ່ວາ 50 ຄົນ ຈາກ 9 ຕົວເມືອງ ຢູ່ ນະຄອນຫລວງວຽງຈັນ, ໄດ້ເຂົ້າຮ່ວມການເຜີຍແຜ່ກົດລະບຽບການເສຍຄ່າທາງ, ເພື່ອຮັບປະກັນການປະຕິບັດວຽກງານຮ່ວມກັບໜ່ວຍງານກ່ຽວຂ້ອງອື່ນໆໃນການປັບໃໝ ຂີ່ລົດທີ່ຍັງບໍ່ທັນໄດ້ເສຍຄ່າທາງ, ພາຍຫລັງເຫັນວ່າ: ມາຮອດປັດຈຸບັນ ຍັງມີເຈົ້າຂອງພາຫະນະຈຳນວນບໍ່ໜ້ອຍ ບໍ່ທັນໄດ້ເສຍຄ່າທາງ ໃນປີ 2019.
ພະແນກສ່ວຍສາອາກອນ ນະຄອນຫລວງວຽງຈັນ ໃຫ້ຮູ້ວ່າ: ການເສຍຄ່າທຳນຽມທາງໃນໄລຍະ 3 ເດືອນ ຕົ້ນປີ 2019 ນີ້, ຢູ່ນະຄອນຫຼວງວຽງຈັນ ຍັງບໍ່ບັນລຸຕາມເປົ້າໝາຍ ທີ່ກໍານົດ ໄວ້, ປັດຈຸບັນ ຢູ່ ນະຄອນຫລວງວຽງຈັນ ມີພາຫະນະທັງໝົດ 800.000 ກວ່າຄັນ, ແຕ່ມີຜູ້ມາເສຍຄ່າທໍານຽມທາງພຽງແຕ່ 100.000 ກວ່າຄັນ ລວມເປັນເງິນ 31 ຕື້ກວ່າກີບ ເທົ່າກັບ 22,5%. ຂອງຈຳນວນພາຫະນະ. ສະນັ້ນ, ຈຶ່ງເລື່ອນເວລາອອກໄປຮອດ 30 ມິຖຸນາ ນີ້ ແລະ ຖ້າກາຍນັ້ນໄປແມ່ນຖືກປັບໃໝ 0,1% ຕໍ່ມື້, ໂດຍຈະຮ່ວມມືກັບເຈົ້າໜ້າທີ່ຕຳຫລວດຈະລາຈອນໃນການຕິດຕາມກວດກາລົດທີ່ບໍ່ທັນມາເສຍຄ່າທາງດັ່ງກ່າວ
ທ່ານ ສົມພອນ ພິມມະສອນ ຮອງຫົວໜ້າ ສ່ວຍສາອາກອນປະຈໍານະ ຄອນຫຼວງວຽງຈັນ ໃຫ້ຮູ້ວ່າ: ປົກກະຕິການເສຍຄ່າທໍານຽມທາງ ປະຈໍາປີ 2019 ສິ້ນສຸດ ໃນວັນທີ 30 ມີນາ, ແຕ່ຍັງບໍ່ມີຜູ້ທີ່ມາເສຍຄ່າທາງເປັນຈຳນວນຫລາຍ ຫຼ້າສຸດລັດຖະມົນຕີກະຊວງການເງິນ ໄດ້ອອກແຈ້ງການ ເລກທີ 0975/ກງ ລົງວັນທີ 1 ເມສາ 2019 ເລື່ອງການ ເລື່ອນໄລຍະເວລາປົກກະຕິຂອງການຊໍາລະຄ່າທໍານຽມທາງ ປະຈໍາປີ 2019 ຈາກ 31 ມີນາ ເປັນ 30 ມິຖຸນາ 2019 ຖ້າກາຍໄລຍະເວລາທີ່ກໍານົດ ໄວ້ແມ່ນຖືກປັບໃໝ 0,1% ຂອງມູນຄ່າທີ່ຕ້ອງເສຍຄ່າທໍານຽມທາງປະຈໍາປີ ແລະ ເຈົ້າຂອງລົດບໍ່ໄດ້ ເສຍຄ່າທໍານຽມທາງປະຈໍາປີ 2017 ແລະ 2018 ແມ່ນຈະຖືກປັບໃໝ 60% ຂອງອັດຕາຄ່າທໍານຽມທາງ, ເຊິ່ງໃນປີ 2019 ສ່ວຍສາອາກອນ ນະຄອນຫຼວງວຽງຈັນ ໄດ້ຮັບຕົວເລກເກັບ ຄ່າທໍານຽມທາງ ຈໍານວນ 65 ຕື້ກີບ.
ຫົວໜ້າພະແນກຕຳຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ, ພົບຜູ້ຂັບຂີ່ຈຳນວນຫລາຍ ບໍ່ທັນເສຍຄ່າທຳນຽມທາງ, ຊຶ່ງພາກລັດກໍໄດ້ເນັ້ນໃຫ້ສັງຄົມຕື່ນຕົວໄປເສຍຄ່າທຳນຽມທາງຕາມພັນທະ, ແນວໃດກໍຕາມ, ໃນເດືອນ ກໍລະກົດນີ້, ເຈົ້າໜ້າທີ່ ແລະ ໜ່ວຍງານກ່ຽວຂ້ອງ ຈະໄດ້ລົງກວດກາເພີ່ມຄວາມເຂັ້ມງວດໃນການກວດກາບັນຫາດັ່ງກ່າວ ແລະ ຈະມີການປັບໃໝຕາມລະບຽບການກຳນົດ, ພ້ອມທງກວດກາທາດເຫລົ້າ, ພ້ອມທັງຈະມີການປັບໃໝ 20 ເທົ່າຕາມມະຕິຂອງສະພາປະຊາຊົນ ນະຄອນຫລວງວຽງຈັນວາງອອກ.
