“ ຫົວໜ້າແກ້ງຂ່າວປອມ ” ບັ້ນເລືອກຕັ້ງປະທານາທິບໍດີ ສະຫະລັດ ເສຍຊີວິດແລ້ວ

ຜູ້ສ້າງຂ່າວປອມ ບັ້ນເລືອກຕັ້ງປະທານາທິບໍດີ ຂອງສະຫະລັດ ປີ 2016 ເສຍຊີວິດແລ້ວ,ໃນໄວອາຍຸ 38 ປີ ຍ້ອນກິນຢາເກີນກຳນົດ.

ບັນດາເຈົ້າໜ້າທີ່ຂອງສະຫະລັດໃຫ້ຮູ້ວ່າ: ທ້າວ Paul Horner ໄດ້ເສຍຊີວິດແລ້ວ ຢູ່ທີ່ລັດ Arizona ໃນວັນທີ 18 ເດືອນກັນຍາ ປີຜ່ານມາ, ຍ້ອນກິນຢາເກີນກຳນົດ. ນ້ອງຊາຍຂອງເຂົາຊື່ Jj Horner ໄດ້ແຈ້ງຂ່າວລົງໃນສື່ສັງຄົມອອນລາຍ ແລະ ຍົກຍ້ອງ Paul Horner ວ່າ: “ ເປັນນັກໄວຍາກົນ ແຫ່ງອິນເຕີແນັດ, ນັກເຄື່ອນໄຫວເພື່ອມະນຸດສະທຳ, ນັກປັດຊະຍາ ແລະ ນັກ ຕະຫຼົກ ທີ່ຍອດຢ້ຽມ ”

Mark Casey ໂຄສົກຂອງເຈົ້າໜ້າທີ່ຕຳຫຼວດ ຄະດີອຸບັດຕິເຫດ Maricopa ໃຫ້ຮູ້ວ່າ: ຜ່ານການສັນລະສູດຊາກສົບຂອງເຂົາ, ບໍ່ເຫັນມີສິ່ງຜິດປົກະຕິໃດໆ. ໂຄສົກທ່ານນີ້ໃຫ້ຮູ້ຕື່ມອີກວ່າ: Paul ມີປະຫວັດກິນຢາມາກ່ອນນີ້ແລ້ວ. “ ດ້ວຍຂໍ້ມູນເກັບກຳໄດ້ຈາກຈຸດເກີດເຫດໃຫ້ຮູ້ວ່າ ຜູ້ກ່ຽວໃຊ້ຢາເກີນກຳນົດ ”

Paul ເປັນຜູ້ທີ່ຂຽນຂ່າວປອມລົງໃນ ເຟສບຸກ ແລະ ໃນໜ້າເວບຕ່າງໆ ກໍຄື ສື່ສັງຄົມອອນລາຍອື່ນໆ ຫຼາຍທີ່ສຸດ. ເຂົາປະກາດວ່າ: ຍ້ອນເຂົາເອງ Donald Trump ຈຶ່ງໄດ້ເປັນປະທານາທິບໍດີຂອງສະຫະລັດ ໃນເດືອນພະຈິກ 2016.

ກ່ອນ ແລະ ພາຍຫຼັງ ບັ້ນຮົບການເລືອກຕັ້ງຢູ່ສະຫະລັດ, ຂ່າວປອມໄດ້ແຜ່ກະຈ່າຍອອກໄປຢ່າງໜັກ, ອັນໄດ້ສ້າງຜົນກະທົບ ແລະ ຄວາມສັບສົນຕໍ່ການປ່ອນບັດເລືອກຕັ້ງຂອງປະຊາຊົນ. Paul ສ້າງເລື່ອງຂຶ້ນວ່າ: Obama ເປັນຄົນສອງເພດ ທັງເປັນ ຊາວມຸດສະລີມ ຫົວຮຸນແຮງ.

Eric, ລູກຊາຍຂອງ Trump ແລະ Cory Lewandowski ຫົວໜ້າໂຄສະນາການເລືອກຕັ້ງໃຫ້ Trump, ເຄີຍນຳເອົາຂ່າວປອມທີ່ເຂົາຂຽນໄວ້ ກ່ຽວກັບ ການຈ້າງຜູ້ປະທ້ວງຜູ້ລະ 3.000 ໂດລາ ເພື່ອຕ້ານທ່ານ Trump ຂອງຝ່າຍກົງກັນຂ້າມ.

 “ ຂ້ອຍຄິດວ່າ ທ່ານ Trump ໄດ້ໄປນັ່ງຢູ່ໃນທຳນຽບຂ່າວ ແມ່ນຍ້ອນຂ້ອຍເອງ. ຍ້ອນບັນດາໜ້າເວບໄຊ ຂອງຂ້ອຍ, Trump ຈື່ງໄດ້ຮັບການສະໜັບສະໜູນຢ່າງຫຼວງຫຼາຍ, ເພາະຄົນທົ່ວໄປເຂົາບໍ່ໄດ້ກວດກາເບິ່ງວ່າເປັນຂ່າວແທ້ ຫຼື ຂ່າວປອມ, ຜູ້ບໍລິໂພກສື່ສາມາດໂພສລົງທຸກສິ່ງ ແລະ ເຊື່ອທຸກຢ່າງ  ” Paul ເວົ້າຕໍ່ນັກຂ່າວ Washington Post ໃນເດືອນພະຈິກ 2016.

ເຂົາໃສ່ຊື່ເວບໄຊ ຂອງເຂົາວ່າ: newsexaminer.net ເຮັດໃຫ້ຫຼາຍຄົນເຊື່ອວ່າ ເປັນເວບໄຊທາງການ ຖືກຕ້ອງຕາມກົດໝາຍ. ເຂົາພະຍາຍາມຮັກສາທິດທາງອາຊີບ “ ເຢາະເຢີ້ຍການເມືອງ ” ຂອງຕົນໄວ້ໃຫ້ໄດ້.

ຮຽບຮຽງໂດຍ: ລູກເມືອງພວນ