ງານ Lao Top 3 Expo 2019 ຈະຈັດຂຶ້ນແຕ່ 20-22 ມິຖຸນານີ້
ໃນວັນທີ 12 ມິຖຸນານີ້ໄດ້ມີການຖະແຫລງຂ່າວການຈັດງານ Lao Top 3 Expo 2019, ໂດຍການຖະແຫລງຂອງທ່ານ ຣີຊາດ ຢຽວ ຮອງປະທານປະຈຳເຂດບໍລິສັດ AMB TARSUS EVEN GROP ແລະ ທ່ານ ພອນໄຊ ສຸດທິພົງ ປະທານສະມາຄົມສະຖາປະນິກ ແລະ ວິສະວະກອນກໍ່ສ້າງລາວ, ຊຶ່ງ ໃຫ້ຮູ້ວ່າ: ງານວາງສະແດງນີ້, ຈະຈັດຂຶ້ນໃນວັນທີ 20-22 ມິຖຸນານີ້ຢູ່ຫໍປະຊຸມແຫ່ງຊາດນະຄອນຫລວງວຽງຈັນ, ໂດຍໄດ້ສັງລວມເອົາຜະລິດຕະພັນອຸດສາຫະກຳທາງດ້ານອາຄານ ແລະ ການກໍ່ສ້າງ, ອາຫານ ແລະ ເຄື່ອງດື່ມ ແລະ ອຸດສາຫະກຳການບຳບັດ ແລະ ການສະໜອງກ່ຽວກັບນ້ຳ ຫລາຍກວ່າ 200 ບໍລິສັດຈາກ 15 ປະເທດ ເປັນຕົ້ນ: ຈີນ, ເຢຍລະມັນ, ອີຕາລີ, ຍີ່ປຸ່ນ, ສ.ເກົາຫລີ, ມາເລເຊຍ, ສິງກະໂປ, ໄທ ແລະ ສະຫະລັດອາເມລິກາ. ງານດັ່ງກ່າວເປັນເວທີການຄ້າຂະໜາດໃຫຍ່, ເປັນເວທີແນະນໍາຜະລິດຕະພັນ, ນະວັດຕະກໍາອັນໃໝ່ຂອງການກໍ່ສ້າງອາຄານ, ອຸປະກອນການກໍ່ສ້າງ, ຜະລິດຕະພັນກ່ຽວກັບນ້ຳ ແລະ ອື່ນໆ.
ທ່ານປະທານສະມາຄົມສະຖາປະນິກ ແລະ ວິສະວະກອນກໍ່ສ້າງລາວ ໃຫ້ຮູ້ວ່າ: ພາຍໃນງານຈະມີການມອບລາງວັນການກໍ່ສ້າງ ແລະ ອະສັງຫາລິມະຊັບຂອງລາວປະຈໍາປີ 2019 ແລະ ຜູ້ເຂົ້າຊົມງານສາມາດຮ່ວມສຳມະນາທາງດ້ານເຕັກໂນໂລຊີໂດຍບໍ່ເສຍຄ່າໃດໆ.
