ສະມາຊິກສະພາແຫ່ງຊາດ ເຈາະຈີ້ມຫລາຍບັນຫາຕໍ່ບົດລາຍງານລັດຖະບານ

ໃນວັນທີ 6 ມິຖຸນານີ້, ວາລະດໍາເນີນກອງປະຊຸມສະພາແຫ່ງຊາດມື້ທີ 2, ພາຍໃຕ້ການເປັນປະທານຂອງ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດ, ຊຶ່ງສະມາຊິກສະພາແຫ່ງຊາດ (ສສຊ) ຫຼາຍເຂດໄດ້ສຸມໃສ່ປະກອບຄໍາຄິດຄໍາເຫັນ ແລະ ເຈາະຈີ້ມຫຼາຍບັນຫາໃສ່ບົດລາຍຂອງລັດຖະບານ ກ່ຽວກັບການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດທີ່ເຫັນວ່າຍັງບໍ່ສອດຄ່ອງກັບນະໂຍບາຍວາງອອກ, ດັ່ງນັ້ນ,

ທ່ານ ທອງດີ ຈັນທະວົງ ສສຊ ເຂດ 4 ແຂວງ ສາລະວັນກ່າວວ່າ: ຍຸດທະສາດຂອງກະຊວງກະສິກໍາໄດ້ກໍານົດວ່າ: ການຂະຫຍາຍລະບົບຊົນລະປະທານເນັ້ນໃສ່ການຂະຫຍາຍແບບນໍ້າໄຫລເຂົ້າເອງ ແລະ ສ້າງອ່າງເກັບນ້ໍາ, ແຕ່ໃນຕົວຈິງແມ່ນພວກເຮົາພຽງສຸມໃສ່ແຕ່ລະບົບໄຟຟ້າ ຫລື ຈັກສູບນໍ້າ, ອັນນີ້ເປັນຈຸດທີ່ຄວນມີການປັບປຸງ ເພື່ອໃຫ້ໄປຕາມນະໂຍບາຍ ແລະ ຍຸດທະສາດທີ່ໄດ້ວາງໄວ້.

ທ່ານ ວົງສະຫວັນ ໄຊຍະວົງ ສສຊ ເຂດ 4 ແຂວງອຸດົມໄຊ ໄດ້ມີຄໍາເຫັນຕໍ່ວຽກງານທ່ອງທ່ຽວວ່າ: ນັກທ່ອງທ່ຽວເຂົ້າມາທ່ຽວປະເທດເຮົາສ່ວນໃຫຍ່ແມ່ນຢາກມາສໍາພັດກັບອາກາດບໍລິສຸດ, ກິນອາຫານທີ່ປອດສານເຄມີ, ແຕ່ປັດຈຸບັນເຫັນວ່າປະເທດເຮົາໄດ້ພົບກັບບັນຫາມົນລະພິດຈາກຫມອກຄວັນເປັນສິ່ງຫນຶ່ງທີ່ເຮັດໃຫ້ອາກາດບໍ່ສົດ, ມີສານເຄມີຕົກຄ້າງໃນອາຫານການກິນຕ່າງໆ ທີ່ພວກເຮົາຍັງຄຸ້ມຄອງບໍ່ທັນໄດ້. ສະນັ້ນ, ຕ້ອງເອົາໃຈໃສ່ແກ້ໄຂບັນຫາດັ່ງກ່າວຢ່າງທັນການເພື່ອເຮັດໃຫ້ປະເທດເຮົາມີສິ່ງແວດລ້ອມດີ, ປາສະຈາກມົນລະພິດ, ອາຫານປອດສານເຄມີ, ເພື່ອດຶງດູດນັກທ່ຽວເຂົ້າມາທ່ອງທ່ຽວໃຫ້ຫລາຍຂຶ້ນບັນລຸຕາມຄາດຫມາຍວາງໄວ້.

ທ່ານ ທອງສະຫລິດ ມັງຫນໍ່ເມກ ສະມາຊິກສະພາແຫ່ງຊາດເຂດເລືອກຕັ້ງທີ 1 ນະຄອນຫລວງວຽງຈັນໄດ້ສະເຫນີວ່າ: ໄລຍະປີ 2014 – 2019 ເຫັນວ່າ ການພັດທະນາຊັບພະຍາກອນມະນຸດຫລາຍຂົງເຂດມີການຂະຫຍາຍຕົວໄວສົມຄວນໄປຄຽງຄູ່ກັບການຂະຫຍາຍຕົວດັ່ງກ່າວ ແມ່ນເຮັດໃຫ້ມີການຕົກເຮ່ຍຂອງບຸກຄະລາກອນ, ໃນນັ້ນຂົງເຂດຄູໂດຍສະເພາະ ສົກປີ 2017-2018 ໄດ້ໂກຕາລັດຖະກອນ 1.850 ຄົນ ແຕ່ຕົວເລກສູນເສຍແມ່ນ 2.700 ກວ່າຄົນ ແລະ ສົກປີ 2018-2019 ໄດ້ໂກຕາ 930 ຄົນ ຕົວເລກສູນເສຍແມ່ນ 3.000 ກວ່າຄົນ ເຊິ່ງສາເຫດຂອງການສູນເສຍແມ່ນການເຄື່ອນຍ້າຍລະຫວ່າງຂະແຫນງການ, ເຄື່ອນຍ້າຍຈາກອາຊີບຄູໄປຢູ່ຂະແຫນງການອື່ນ ຕໍ່ບັນຫາດັ່ງກ່າວ, ສະເຫນີໃຫ້ພາກສ່ວນກ່ຽວຂ້ອງສືບຕໍ່ເອົາໃຈໃສ່ໃນການປະຕິບັດນະໂຍບາຍ, ໃຫ້ນາມມະຍົດ ແລະ ເລື່ອນຊັ້ນໃຫ້ຄູຢ່າງເປັນປົກກະຕິ, ພ້ອມທັງສະເຫນີໃຫ້ກວດກາຄືນການປະຕິບັດແຜນຍຸດທະສາດການພັດທະນາຊັບພະຍາກອນມະນຸດ ນັບແຕ່ມື້ເລີ່ມຈັດຕັ້ງປະຕິບັດມາເຖິງປັດຈຸບັນ ວ່າໄດ້ຮັບຫມາກຜົນຫນ້ອຍຫລາຍສໍ່າໃດ.

ທ່ານ ນາງ ອໍາໄພວອນລ້ອມບຸນເພັງ ສະມາຊິກສະພາແຫ່ງຊາດ (ສສຊ) ເຂດເລືອຕັ້ງທີ 8 ແຂວງຫົວພັນໄດ້ສະເຫນີລັດຖະບານກວດກາຄືນຂໍ້ມູນຖານລາຍຮັບ ແລະ ການມອບລາຍຮັບ ເພາະໃນໄລຍະຜ່ານມານີ້, ມີບາງຖານຂໍ້ມູນທີ່ລັດຖະບານ ຍັງບໍ່ທັນໄດ້ຈັດເກັບ ເປັນຕົ້ນ ການເກັບຄ່າສໍາປະທານທີ່ດິນໂຄງການເຂື່ອນໄຟຟ້າ ແລະ ຂຸດຄົ້ນແຮ່ທາດຈໍານວນຫນຶ່ງ ເພາະວ່າຢູ່ແຂວງຫົວພັນຜ່ານການລາຍງານບັນດາໂຄງການເຫລົ່ານີ້ຍັງບໍ່ທັນໄດ້ຈັດເກັບລາຍຮັບເທື່ອຍ້ອນໂຄງການເຫລົ່ານີ້ແມ່ນສູນກາງເປັນຜູ້ອະນຸຍາດ ແລະ ບັນດາສັນຍາຕ່າງໆກໍຢູ່ຂັ້ນສູນກາງທັງຫມົດ.

ສະນັ້ນ, ຖ້າໃຫ້ຂັ້ນເມືອງເກັບແມ່ນເປັນໄປໄດ້ຍາກ ເພາະບໍ່ມີບ່ອນອີງ ແລະ ບໍ່ຮູ້ວ່າຊິເກັບແບບໃດ. ນອກນີ້, ກົນໄກການປະສານງານ ລະຫວ່າງສູນກາງ ແລະ ທ້ອງຖິ່ນຍັງບໍ່ທັນລະອຽດ ແລະ ຈະແຈ້ງເທົ່າທີ່ຄວນ. ນອກນັ້ນກໍໃຫ້ກວດກາຄືນຄ່າເຊົ່າສໍາປະທານທີ່ດິນຕັ້ງເສົາສັນຍານໂທລະສັບຕ່າງໆ ໃນຜ່ານມານີ້, ກໍຍັງບໍ່ທັນໄດ້ເກັບຄ່າເຊົ່າເສົາ ດັ່ງກ່າວ.