ທາງດີ ຈຶ່ງມີຄົນມາທ່ຽວ
ໂດຍ: ມຶກບໍ່ແຫ້ງ
ເສັ້ນທາງແມ່ນປັດໄຈສຳຄັນ ຂອງການພັດທະນາການທ່ອງທ່ຽວ ແຕ່ຫຼາຍຄົນກໍຍັງສົງໄສວ່າ ການສົ່ງເສີມການທ່ອງທ່ຽວນັ້ນ ໄປຄຽງຄູ່ກັບການ ສ້າງເສັ້ນທາງຫຼາຍພຽງໃດ.
ການທ່ອງທ່ຽວ ຂອງ ສປປລາວ ແມ່ນ ມີການສັ່ນຄອນພໍສົມຄວນ ໂດຍສະເພາະ ນັບແຕ່ປີ 2015 ເປັນຕົ້ນມາ ທີ່ຕົວເລກນັກທ່ອງທ່ຽວ ມີທ່າອ່ຽງຫຼຸດລົງ ໂດຍສະເພາະ ເມື່ອປີ 2018 ທີ່ຜ່ານມານັ້ນ ພວກເຮົາຄາດຫວັງວ່າ ຈະໃຫ້ມີນັກທ່ອງທ່ຽວ ມາທ່ຽວຮອດ 5 ລ້ານ ແລະສ້າງລາຍໄດ້ ໃຫ້ໄດ້ຮອດ 900 ລ້ານໂດລາ ແຕ່ເມື່ອໝົດປີແລ້ວ ພວກເຮົາ ກໍບໍ່ສາມາດບັນລຸໄດ້ ຕາມຄາດຫວັງ.
ການຫຼຸດໜ້ອຍຖອຍລົງ ຂອງນັກທ່ອງທ່ຽວນັ້ນ ອາດມີຫຼາຍປັດໄຈ ແຕ່ໜຶ່ງໃນປັດໄຈທີ່ສຳຄັນກໍແມ່ນພື້ນຖານໂຄງລ່າງ ໂດຍສະເພາະເສັ້ນທາງ ເຊິ່ງແຕ່ລະປີ ເມື່ອສິ້ນສຸດລະດູຝົນແລ້ວ, ທາງເປ່ເພຫຼາຍເສັ້ນທີ່ສຳຄັນ ບໍ່ເວົ້າສາ ເສັ້ນທາງໄປຫາແຫຼ່ງທ່ອງທ່ຽວ ທຳມະຊາດ (ແລະວັດທະນະທຳ) ແລ້ວການສ້ອມແປງ ຊັກຊ້າ ກໍຈະເຮັດໃຫ້ເປັນອຸປະສັກ ໃນການດຶງດູດນັກທ່ອງທ່ຽວ.
ເມື່ອບໍ່ດົນຜ່ານມາ ຜູ້ຂຽນໄດ້ໄປຢາມໝູ່ ຢູ່ເມືອງເຟືອງ ແຂວງວຽງຈັນ ຜູ້ທີ່ເຮັດວຽກໃນຂະແໜງທີ່ກ່ຽວພັນ ກັບການທ່ອງທ່ຽວ ໄດ້ພາໄປທ່ຽວຫຼາຍບ່ອນສົມຄວນ ໂດຍສະເພາະ ວັງນ້ຳໄສ (ນ້ຳລີກ), ນ້ຳຕົກຕາດ, ຖ້ຳ. ເມືອງ ເຟືອງ ຍັງມີ ທິວທັດງົດງາມ, ພ້ອມ ດິນກໍມີຄວາມອຸດົມສົມບູນຫຼາຍ ເໝາະແກ່ການ ທ່ອງທ່ຽວທີ່ສຸດ ແຕ່ ເມື່ອຖາມເຖິງ ເລື່ອງການມາຢ້ຽມຢາມ ຂອງນັກທ່ອງທ່ຽວ ໝູ່ເວົ້າໃຫ້ຟັງວ່າ ຄົນຕ່າງປະເທດນັ້ນໜ້ອຍຫຼາຍທີ່ຈະມາທ່ຽວ ເມືອງນີ້ ເຖິງວ່າມີສິ່ງເປັນຕາ ທ່ຽວຊົມຢ່າງຫຼວງຫຼາຍກໍຕາມ ເນື່ອງຈາກວ່າ ການເດີນທາງນັ້ນຫຍຸ້ງຍາກ.
ພ້ອມກັນນັ້ນ, ເມື່ອເດືອນ ກ່ອນໆ ພວກເຮົາກໍໄດ້ຍິນຂ່າວ ການເປ່ເພ ຂອງເສັ້ນທາງ ຢູ່ ວັງວຽງບ່ອນທີ່ເປັນຈຸດໝາຍປາຍທາງການທ່ອງທ່ຽວ ກໍມີສຽງຈົ່ມວ່າ ຈາກປະຊາຊົນ ຜູ້ທີ່ໄປພົບເຫັນວ່າ ເສັ້ນທາງໃນເຂດເມືອງເປ່ເພມາ ເປັນເວລາດົນສົມຄວນ ແຕ່ບໍ່ມີການສ້ອມແປງ ເຊິ່ງອາດສ້າງຄວາມຫຍຸ້ງຍາກໃນການໄປມາບໍ່ແມ່ນໜ້ອຍ.
ແລະເໜືອວັງວຽງ ໄປນັ້ນ ກໍໄປຫາຫຼວງພະບາງ ທີ່ເປັນແຫຼ່ງທ່ອງທ່ຽວ ສຳຄັນທີ່ສຸດ ຂອງປະເທດ ແຕ່ເສັ້ນທາງ ໄດ້ເປເພ່ ໂດຍສະເພາະເຂດ ພູສູງ ພາໃຫ້ເກີດອຸບັດເຫດຫຼາຍຄັ້ງ ຮວມທັງ ນັກທ່ອງທ່ຽວປະເທດເພື່ອນບ້ານ ທີ່ຂັບລົດມາທ່ອງທ່ຽວບ້ານເຮົາ ພັດຕົກເຫວຕາຍ ເຊິ່ງອາດສ້າງຄວາມວາດກົວ ແກ່ຜູ້ອື່ນໆ ທີ່ຈະຂັບລົດມາທ່ຽວບ້ານເຮົາອີກ, ອັນນີ້ ກໍອາດມີຜົນກະທົບ ຕໍ່ຂະແໜງການທ່ອງທ່ຽວເຮົາ.
ເພາະສະນັ້ນ, ການສົ່ງເສີມການທ່ອງທ່ຽວ ເຮົາຕ້ອງຫຼຽວເບິ່ງໂຄງຮ່າງພື້ນຖານເຮົາໄປນຳ. ເຂົ້າໃຈວ່າ ຜ່ານມາພວກເຮົາ ພົບພໍ້ບັນຫາຫຼາຍປະການ ກ່ຽວຂ້ອງກັບ ການສ້າງເສັ້ນທາງສາຍຕ່າງໆ ໂດຍສະເພາະ ການສໍ້ລາດບັງຫຼວງ, ມູນຄ່າເສັ້ນທາງສູງກວ່າຄວາມເປັນຈິງ ແຕ່ຄຸນນະພາບພັດບໍ່ສົມ ເຮັດໃຫ້ເສັ້ນທາງເປ່ເພໄວ ແຕ່ການສ້ອມແປງຊັກຊ້າ ຍ້ອນຂາດງົບປະມານ.
ສະນັ້ນ, ທ່ານນາຍົກ ພວກເຮົາຈຶ່ງມີທິດຊີ້ນຳການກວດຄືນ ການສ້າງເສັ້ນທາງຕ່າງໆ ເພື່ອໃຫ້ມີຄວາມໂປ່ງໃສໃນອະນາຄົດ. ເມື່ອສ້າງທາງດີ ກໍເອື້ອອຳນວຍໃຫ້ການທ່ອງທ່ຽວ ແລະຂະແໜງການອື່ນໆຫຼ່ຽນໄຫຼໄດ້ດີຂຶ້ນ.
ການທ່ອງທ່ຽວແມ່ນຂະແໜງການບູລິມະສິດທີ່ສຳຄັນຂອງລັດຖະບານ ທີ່ຈະແນໃສ່ການສ້າງລາຍຮັບທີ່ຍືນຍົງ ແລະສ້າງວຽກເຮັດງານທຳແກ່ປະຊາຊົນລາວທົ່ວປະເທດ ເຊິ່ງໃນປີ 2018 ຜ່ານມາ ກໍໄດ້ຖືເອົາເປັນປີສົ່ງເສີມການທ່ອງທ່ຽວຂອງລາວ ແລະບັນດາເຂດແຂວງ ກໍໄດ້ປະກາດເປີດປີທ່ອງທ່ຽວຂອງຕົນເອງຢ່າງຄຶກຄື້ນ.
ພ້ອມນັ້ນ ຄະນະຜູ້ແທນລາວເຮົາຍັງໄດ້ໄປເຜີຍແຜ່ ແລະສົ່ງເສີມການທ່ອງທ່ຽວ ຢູ່ຕ່າງປະເທດ ໂດຍສະເພາະ ສປ ຈີນ ເຊິ່ງ ກາຍເປັນຕະຫຼາດການທ່ອງທ່ຽວ ທີ່ສຳຄັນຂອງໂລກ ແລະຂອງລາວ. ການສົ່ງເສີມການທ່ອງທ່ຽວ ຢູ່ ສປ ຈີນ ໄດ້ນຳມາເຊິ່ງ ການຖືເອາ ປີ 2019 ເປັນປີທ່ອງທ່ຽວລະຫວ່າງ ລາວ ແລະ ສປ ຈີນ. ນີ້ ສະແດງວ່າ ລັດຖະບານເຮົາເພິ່ນເອົາ ແທ້ ທີ່ຈະເຮັດໃຫ້ ຂະແໜງການທ່ອງທ່ຽວ ຂະຫຍາຍຕົວຢ່າງຄ່ອງຕົວຫຼາຍຂຶ້ນ, ຖ້າຈະເຮັດແນວນັ້ນໄດ້ ເສັ້ນທາງກໍແມ່ນສິ່ງ ທີ່ຂາດບໍ່ໄດ້.
