ຄົນລາວ ຢູ່ລຸ່ມຟ້າ ທີ່ໜ້າຢ້ານ
ຊິ້ນສ່ວນຂອງຍານອະວາກາດ ຂອງ ສປຈີນ ໄດ້ຕົກລົງຫຼາຍບ່ອນ ນັບທັງຕົກໃສ່ ຫຼັງຄາຂອງເຮືອນປະຊາຊົນເຂດພາກໃຕ້ ເມື່ອບໍ່ດົນມານີ້ໄດ້ສ້າງຄວາມຕົກໃຈໃຫ້ແກ່ປະຊາຊົນຜູ້ທີ່ປະສົບກັບເຫດການ ແລະປະຊາຊົນໃນວົງກວ້າງສົມຄວນ.
ພາຍຫຼັງກະຊວງໂຍທາທິການ ແລະຂົນສົ່ງ ໄດ້ອອກແຈ້ງການ ສະບັບເລກທີ 10886 ລົງວັນທີ 21 ພຶດສະພາ 2019 ວ່າດ້ວຍ ການເຄື່ອນໄຫວກິດຈະການ ການບິນຍານອະວາກາດຂອງ ສປ ຈີນ ໃນນ່ານຟ້າຂອງລາວ. ໃນແຈ້ງການດັ່ງກ່າວໄດ້ລະບຸວ່າ ກິດຈະກຳນີ້ ແມ່ນຈະມີຂຶ້ນໃນວັນທີ 23 ພຶດສະພາ 2019 ທີ່ໃນເວລາ 5:57-6:13 ໂມງ ໃນເຂດ 5 ແຂວງ ພາກໃຕ້ ຄື ຈຳປາສັກ, ສາລະວັນ, ເຊກອງ, ອັດຕະປື ແລະ ສະຫວັນະເຂດ ໂດຍລະບຸຈຸດພິກັດຄັກແນ່.
ເມື່ອແຈ້ງການນີ້ ອອກມາບໍ່ດົນ ກໍມີນັກຂ່າວສັນຈອນ ໄດ້ລາຍງານ ການຕົກລົງຂອງຊິ້ນສ່ວນຍານອະວາກາດນັ້ນຕົກລົງ ຕາມສະຖານທີ່ຕ່າງໆ ກະແຈກກະຈາຍກັນໄປ ເຊິ່ງບາງຜ່ອງ ກໍຕົກລົງກາງສວນ, ບາງສ່ວນ ກໍຕົກລົງ ໃສ່ວັດ ແລະ ບາງສ່ວນ ພັດຕົກລົງ ກົງໆ ໃສ່ເຮືອນປະຊາຊົນ ເຊິ່ງຜູ້ຂຽນສາມາດ ຮວບຮວມເອົາ ບັນດາເຫດການ ການຕົກລົງ ຢູ່ເຂດຕ່າງໆດັ່ງນີ້.
ວັນທີ 23 ພຶດສະພາ 2019 (ຖືກຕາມ ແຈ້ງການ) ປະຊາຊົນ ໄດ້ລາຍງານວ່າ ໄດ້ມີຊິ້ນສ່ວນຍານ ອະວາກາດຕົກລົງໃສ່ຫຼັງຄາເຮືອນປະຊາຊົນ ແລະ ກະແຈກກະຈາຍ ຕາມເດີ່ນບ້ານ ຢູ່ບ້ານ ທົ່ງເຊັດ ເມືອງ ປາກຊ່ອງ ແຂວງຈຳປາສັກ, ນອກນັ້ນ ຍັງຕົກລົງໃສ່ ເດີ່ນໂຮງຮຽນ ຢູ່ບ້ານ ໜອງຕົມ, ເມືອງ ເລົ່າງາມ ແຂວງສາລະວັນ.
ໃນມື້ດຽວກັນ ປະຊາຊົນ ບ້ານ ບັງລຽງ, ເມືອງ ປາກຊ່ອງ ແຂວງຈຳປາສັກ ກໍໄດ້ລາຍງານອີກວ່າ ໄດ້ຍິນສຽງ ການລະເບີດ ຢ່າງຮຸນແຮງຢູ່ເທິງຟ້າ ກ່ອນຈະມີຊິ້ນສ່ວນຕົກລົງມາຢ່າງຮຸນແຮງ ໂດຍຕົກລົງໃສ່ ສວນກາເຟປາກຊ່ອງ ໄຮແລນ. ພ້ອມນັ້ນ, ປະຊາຊົນ ບ້ານ ບຶງງາມ, ເມືອງໂຂງ ແຂວງຈຳປາສັກ ກໍໄດ້ລາຍງານ ຕຶ່ມວ່າ ໃນຕອນເຊົ້າ ເວລາ 6.20 ໂມງ ຂອງວັນທີ 23 ພຶດສະພາ 2019 ໄດ້ມີວັດຖຸຕົກລົງຈາກທ້ອງຟ້າ ເຊັ່ນກັນ.
ຍັງບໍ່ໝົດເທົ່ານັ້ນ, ພະສົງ ວັດບ້ານເສັດ ເມືອງປາກຊ່ອງ ແຂວງຈຳປາສັກ ໄດ້ແຈ້ງໃຫ້ຮູ້ວ່າ ຂະນະທີກຳລັງເຮັດວຽກຕອນເຊົ້າ (ພະສົງ ເພິ່ນຕື່ນເຊົ້າ) ຂອງວັນທີ 23 ພຶດສະພາ 2019 ຢູ່ເດີ່ນວັດ ໄດ້ມີວັດຖຸຕົກລົງແຕ່ທ້ອງຟ້າ ແຕ່ໂຊກດີບໍ່ໃຜເປັນຫຍັງ (ວຸດວິດ).
ຈາກເຫດການທັງໝົດທີ່ເກີດຢູ່ສອງແຂວງ ດັ່ງກ່າວນັ້ນ ຍັງໂຊກດີ ທີ່ບໍ່ມີຜູ້ບາດເຈັບ ຫຼື ເສຍຊີວິດ ແຕ່ກໍວຸດວິດ ໂດຍສະເພາະ ເຫດການຢູ່ວັດ ແລະ ເຮືອນປະຊາຊົນ ເຊິ່ງສ້າງຄວາມຕົກໃຈ ແກ່ປະຊາຊົນບໍ່ແມ່ນໜ້ອຍ.
ເຫດການນີ້ ກໍໄດ້ເກີດຂຶ້ນມາແລ້ວໃນປີກ່ອນໆ ເຊິ່ງສ້າງຄວາມສົນໃຈ ດ້ວຍຄວາມກັງວົນ ຈາກປະຊາຊົນຢ່າງຍິ່ງວ່າ ດ້ວຍເຫດໃດ ຈຶ່ງເຮັດໃຫ້ເກີດເຫດເຊັ່ນນີ້, ເຖິງວ່າ ຜ່ານມາ ຍັງບໍ່ໄດ້ມີໃຜບາດເຈັບ ຫຼື ເສຍຊີວິດ ແຕ່ມັນກໍມີຄວາມສ່ຽງສູງ ຖ້າຫາກວັດຖຸທີເປັນ ສິ່ງເສດເຫຼືອ ໂດຍປະຊາຊົນ ບໍ່ຕ້ອງການນີ້ ຕົກລົງມາເລື້ອຍໆ.
ເຖິງວ່າຈະມີແຈ້ງການ ແລະບອກສະຖານທີ ໂດຍລະບຸຈຸດພິກັດ (ບໍ່ແນ່ວ່າ ມີຫຼາຍຄົນເທົ່າໃດ ທີ່ເຂົ້າໃຈວ່າ ຈຸດພິກັດດັ່ງກ່າວຢູ່ໃສກັນແທ້) ແຕ່ປະຊາຊົນ ກໍຫາກບໍ່ສາມາດລົບຫຼີກໄດ້ຢ່າງ 100% ເພາະບໍ່ຮູ້ຄັກວ່າ ຈະຕົກລົງແຈຮົ້ວ ຫຼື້ ຫຼັງຄາຂອງໃຜ ເລີຍສ່ຳກັບວ່າ ຊີວິດຂອງປະຊາຊົນ ແມ່ນຕົກຢູ່ໃນຄວາມສ່ຽງ ທີ່ແປກປະຫຼາດທີ່ສຸດ. ເພາະສະນັ້ນ, ການອະທິບາຍ ເຖິງເຫດຜົນຢ່າງລະອຽດ ແລະ ອາດກ້າວໄປສູ່ການຢຸດຕິ ກິດຈະກຳແບບນີ້ ໃນອະນາຄົດ ອາດເປັນເລື່ອງທີດີ ທີປະຊາຊົນຕ້ອງການ.
