ຈູດທຳລາຍຊີ້ນໝູແຫ້ງນໍາເຂົ້າຈາກຈີນຫລາຍຮ້ອຍກິໂລ

ເມື່ອບໍ່ດົນມານີ້, ເຈົ້າໜ້າທີ່ກະສິກໍາ-ປ່າໄມ້ຮ່ວມກັບຕໍາຫລວດກວດຄົນເຂົ້າ-ອອກເມືອງ, ເຈົ້າໜ້າທີ່ພາສີ, ສາທາລະນະສຸກ ແລະ ພາກສ່ວນກ່ຽວຂ້ອງອື່ນໆພາຍໃນແຂວງຫລວງນໍ້າທາ ໄດ້ເຂົ້າຮ່ວມເປັນສັກຂີພິຍານໃນພິທີຈູດທໍາລາຍຜະລິດຕະພັນຊີ້ນໝູແຫ້ງທີ່ນໍາເຂົ້າຈາກ ສປຈີນ ມີນໍ້າໜັກຫວ່າ 500 ກິໂລ, ລວມມີມູນຄ່າ 25 ລ້ານກວ່າກີບຢູ່ເຂດເສດຖະກິດສະເພາະບໍ່ເຕັນແຂວງຫລວງນໍ້າທາ.

ຊີ້ນໝູດັ່ງກ່າວແມ່ນເຈົ້າໜ້າທີ່ໜ່ວຍງານສັດຕະວະແພດຢຶດໄດ້ຈາກຄົນຈີນ ທີ່ນຳເຂົ້າມາຜ່ານດ່ານສາກົນບໍ່ເຕ່ນເມື່ອວັນທີ 15 ພຶດສະພານີ້, ເຊິ່ງຢູ່ໃນໄລຍະສປປ ລາວ ໄດ້ຫ້າມນຳເຂົ້າໝູ ແລະ ຜະລິດຕະພັນໝູທຸກຊະນິດຈາກ ສປຈີນ ແລະ ສສ.ຫວຽດນາມ, ພາຍຫລັງມີການລະບາດຂອງພະຍາດອະຫິວາໝູອາຟຣີກາຢູ່ປະເທດດັ່ງກ່າວ, ເພື່ອປ້ອງກັນບໍ່ໃຫ້ແຜ່ລະບາດເຂົ້າມາລາວໂດຍເດັດຂາດ ແລະ ຮັບຄວາມປອດໄພຂອງບໍລິໂພກ.