ທົ່ວປະເທດມີຜູ້ເສຍຊີວິດຈາກພະຍາດໄຂ້ເລືອດອອກແລ້ວ 12 ຄົນ
ກະຊວງສາທາລະນະສຸກ ໃຫ້ຮູ້ວ່າ: ຜ່ານການສະຫຼຸບສັງລວມຄົນເຈັບຈາກພະຍາດໄຂ້ຍຸງລາຍ ນັບແຕ່ວັນທີ 29 ທັນວາ 2018 ເຖິງປັດຈຸບັນ, ທັງໝົດ 3.652 ກໍລະນີ ແລະ ເສຍຊີວິດ 12 ກໍລະນີ, ສະເພາະວັນທີ 11-17 ພຶດສະພາ ນີ້, ໄດ້ມີຄົນເຈັບຍ້ອນພະຍາດດັ່ງກ່າວ 425 ກໍລະນີ ແລະ ເສຍຊີວິດ 1 ກໍລະນີ, ໃນນັ້ນ ຢູ່ແຂວງຈຳປາສັກມີ 145 ກໍລະນີ ສະຫວັນນະເຂດ 75 ກໍລະນີ, ນະຄອນຫຼວງວຽງຈັນ 52 ກໍລະນີ ສາລະວັນ 29 ກໍລະນີ, ຄໍາມ່ວນ 32 ກໍລະນີ, ຫຼວງນ້ຳທາ 13 ກໍລະນີ, ວຽງຈັນ 10 ກໍລະນີ, ອັດຕະປື 8 ກໍລະນີ, ບໍລິຄຳໄຊ 4 ກໍລະນີ, ໄຊຍະບູລີ 3 ກໍລະນີ, ຫຼວງພະບາງ 2 ກໍລະນີ ແລະ ແຂວງເຊກອງ 1 ກໍລະນີ.
ປັດຈຸບັນ ກ້າວເຂົ້າສູ່ລະດູຝົນເຊິ່ງເປັນລະດູທີ່ມີຄວາມສ່ຽງກໍ່ໃຫ້ເກີດພະຍາດຕ່າງໆ, ໂດຍສະເພາະ ພະຍາດໄຂ້ຍຸງລາຍ (ໄຂ້ເລືອດອອກ), ເພື່ອປ້ອງກັນ ແລະ ສະກັດກັ້ນພະຍາດດັ່ງກ່າວ, ທຸກຄົນຄວນເປັນເຈົ້າການໃນການຈັດຕັ້ງປະຕິບັດຫຼັກການ 5 ປ ຢ່າງເອົາໃຈໃສ່ຄື: ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່ ປ່ຽນນ້ຳ ແລະ ຜັດຖູທາງດ້ານໃນຂອງພາຊະນະທີ່ກັກເກັບນ້ຳເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ ອ່າງເກັບນ້ຳເປື້ອນຫຼັງຕູ້ເຢັນ ປ່ອຍປາຫາງນົກຍຸງ ເພື່ອກິນໜອນນ້ຳຢູ່ຕາມອ່າງທີ່ໃຫຍ່ ແລະ ປັບປຸງສິ່ງແວດລ້ອມໃຫ້ສະອາດເປັນປະຈຳທຸກອາທິດ, ບໍ່ໃຫ້ມີກະໂປະກະປ໋ອງຢາງຕີນລົດ ແລະ ນ້ຳຂັງທີ່ເປັນແຫຼ່ງເພາະພັນຂອງຍຸງ, ເປັນໄຂ້ໃຫ້ຮີບຟ້າວໄປໂຮງໝໍໃກ້ບ້ານທ່ານ ບໍ່ຄວນຖືເບົາຊື້ຢາມາກິນເອງຊັກຊ້າອາດພາໃຫ້ເສຍຊີວິດໄດ້.
