4 ຄວາມເຊື່ອທີ່ບໍ່ຖືກຕ້ອງໃນການໃຊ້ຊີວິດຄູ່
– ຄວາມເຊື່ອທີ 1 ຊີວິດຄູ່ຕ້ອງເປີດເຜີຍຈິງໃຈ : ຫລາຍຄູ່ຄິດວ່າການແຕ່ງດອງແມ່ນການຍິນຍອມໃຫ້ແຕ່ລະຝ່າຍສະແດງຄວາມຄິດເຫັນຂອງຕົນເອງຢ່າງອິດສະຫລະ, ເຊົາເກງໃຈກັນອີກຕໍ່ໄປ ລວມທັງການເວົ້າເຖົ້ງຂໍ້ບົກພ່ອງຂອງອີກຝ່າຍໜຶ່ງເລື້ອຍໆຢ່າງກົງໄປກົງມາ ເຊັ່ນ : ເຈົ້າຕຸ້ຍ, ເຈົ້າຂີ້ຮ້າຍ ຫລື ເປັນຫຍັງບໍ່ເຮັດແນວນັ້ນແນວນີ້… ຂໍໃຫ້ທ່ານຄິດໃໝ່ວ່າ : ເລື່ອງທີ່ຟັງແລ້ວ ສຽບແທງໃຈ, ບໍ່ວ່າຈະອອກຈາກປາກຝ່າຍໃດ ກໍຍັງເປັນເລື່ອງທີ່ອີກຝ່າຍບໍ່ຢາກຟັງ ດັ່ງນັ້ນ ເລື່ອງໃດທີ່ທ່ານຄິດວ່າຄູ່ຊີວິດຈະບໍ່ສະບາຍໃຈເມື່ອໄດ້ຍິນກໍຄວນຫາທາງຫລີກເວັ້ນ, ບໍ່ເຮັດ ແລະ ບໍ່ເວົ້າເຖິງຈະດີກ່ວາ, ຈື່ໄວ້ວ່າການເອົາໃຈເຂົາມາໃສ່ໃຈເຮົາເປັນເລື່ອງທີ່ຕ້ອງເຮັດສະເໝີ, ບໍ່ວ່າຈະເປັນຄວາມສຳພັນໃນຮູບແບບໃດກໍຕາມ.
– ຄວາມເຊື່ອທີ 2 ເຮືອນທີ່ສົມບູນພ້ອມ ຕ້ອງມີພໍ່ ແມ່ ລູກ : ໄປງານແຕ່ງດອງເທື່ອໃດ ໜີບໍ່ພົ້ນຕ້ອງໄດ້ຍິນຜູ້ໃຫຍ່ອວຍພອນໃຫ້ບ່າວສາວມີທາຍາດໄວໆ ຄ້າຍຄືວ່າຖ້າບໍ່ມີລູກ ເຮືອນຈະເປັນເຮືອນທີ່ສົມບູນບໍ່ໄດ້, ແຕ່ເຊື່ອຫລືບໍ່ວ່າ ການມີລູກ ຫລື ບໍ່ມີລູກ ເປັນຄຳຖາມທີ່ຫລາຍຄູ່ຕ້ອງມາຖຽງກັນພາຍຫລັງ ແລະ ຊຳ້ເຮື້ອ ກາຍເປັນບັນຫາໃຫຍ່ໄດ້. ຄຳຖາມນີ້ຈຶ່ງຕ້ອງໄດ້ຄຳຕອບກ່ອນແຕ່ງດອງ ເພາະການລ້ຽງລູກຄົນໜຶ່ງໃຫ້ດີພ້ອມ ທັງກາຍ ແລະ ໃຈໃນຍຸກນີ້ຕ້ອງອາໄສຄວາມທຸ້ມເທທັງກາຍ ແລະ ໃຈມະຫາສານ ແມ່ນແຕ່ຄວາມຫວານລະຫ່ວາງຄູ່ຮັກກໍຕ້ອງປ່ຽນແປງໄປ ຈາກເຈົ້າ – ຂ້ອຍ ກາຍມາເປັນ ພໍ່ – ແມ່ ພ້ອມກັບຄວາມຮັບຜິດຊອບທີ່ຕາມມາອີກເຕັມບ່າ.
– ຄວາມເຊື່ອທີ 3 ວຽກເຮືອນຕ້ອງຫານສອງ : ເຖິງວ່າຜູ້ຊາຍສະໄໝນີ້ຈະຖືຄວາມສະເໝີພາບ, ແຕ່ຢ່າຄິດວ່າເຂົາຈະມີຄວາມສຸກກັບການເຮັດວຽກເຮືອນສະເໝີໄປ ຖ້າທ່ານແຕ່ງດອງແລ້ວລອງສັງເກດເບິ່ງວ່າສາເຫດຂອງຄວາມຫງຸດຫງິດຂອງຜົວເກີດຈາກວຽກເຮືອນຫລືບໍ່ ຖ້າແມ່ນ ລອງໃຫ້ເຂົາອອກເງິນຈ່າຍຄ່າບໍລິການຕ່າງໆ ເຊັ່ນ : ໃຊ້ບໍລິການຊັກແຫ້ງ, ຈ້າງຄົນຕັດ ຫຍ້າ ອາດເຮັດໃຫ້ຊີວິດຄູ່ມີຄວາມສຸກຫລາຍກ່ວາ, ແຕ່ຖ້າທ່ານຍັງໂສດ ຖາມເຈົ້າບ່າວໃນອະນາຄົດເບິ່ງກ່ອນບໍ່ວ່າເຂົາຍິນດີຈະເຮັດວຽກເຮືອນ ແລະ ແຕ່ງກິນຫລາຍໜ້ອຍປານໃດ.
– ຄວາມເຊື່ອທີ 4 ດີກ່ວາຖ້າມີຜູ້ຊ່ວຍລ້ຽງລູກ : ຫລາຍຄອບຄົວເລືອກທີ່ຈະຕັ້ງເຮືອນຢູ່ໃກ້ເຂດດຽວກັບອ້າຍເອື້ອຍນ້ອງ – ຍາດຕິພີ່ນ້ອງ ເພາະຫວັງຈະໃຫ້ປູ່ຍ່າຕານາຍຊ່ວຍລ້ຽງຫລານ ແລະ ປະຢັດເງິນຈ້າງຄົນລ້ຽງ, ແຕ່ຄວາມຈິງແລ້ວ ການຢູ່ຮ່ວມກັນໃນຄອບຄົວໃຫຍ່ອາດນຳບັນຫາກວນໃຈມາໃຫ້ຢ່າງຫລວງຫລາຍ ເປັນຕົ້ນແມ່ນ ການບໍ່ຖືກກັນລະຫ່ວາງຄອບຄົວອ້າຍ – ນ້ອງ ຫລື ຕູ້ຍ່າ – ແມ່ຕູ້ ລ້ຽງດ້ວຍໄມ້ແສ້ແບບຄົນສະໄໝເກົ່າ ໃນຂະນະທີ່ພໍ່ແມ່ລ້ຽງແບບສະໄໝໃໝ່ ເປັນຕົ້ນ ຈະດີກ່ວາບໍ່ ຖ້າທ່ານຈະວາງລະບຽບຄອບຄົວຂອງຕົນໃຫ້ດີ ແລ້ວໃຫ້ຄອບຄົວເກົ່າເປັນພຽງບ່ອນພັກໃຈ.
