ທົດສອບສີມືແຮງງານໃຫ້ມີມາດຕະຖານ
ໃນວັນທີ 20 ພຶດສະພາ ນີ້, ສູນພັດທະນາສີມືແຮງງານ ນະຄອນຫລວງວຽງຈັນ ໄດ້ເປີດການຝຶກອົບຮົມ ແລະ ທົດສອບສີມືແຮງງານສາຂາວິຊາຊ່າງ ຕິດຕັ້ງໄຟຟ້າ, ຊ່າງປຸງແຕ່ງອາຫານ ແລະ ຊ່າງຕັດຫຍິບ, ເພື່ອແນໃສ່ພັດທະນາສີມືແຮງງານໃຫ້ສອດຄ່ອງກັບໂຄງປະກອບສ້າງເສດຖະກິດໃນປັດຈຸບັນ ແລະ ຄວາມຕ້ອງການຂອງຕະຫລາດແຮງງານ ໃນແຕ່ລະໄລຍະ, ເປັນການຫລຸດຜ່ອນການເປັນແຮງງານດິບ, ຫລຸດຜ່ອນການຫວ່າງງານ ແລະ ຫລຸດຜ່ອນຄວາມທຸກຍາກຂອງປະຊາຊົນເທື່ອລະກ້າວ, ພ້ອມເປັນການເປີດໂອກາດ ແລະ ສົ່ງເສີມໃຫ້ບັນດານາຍຊ່າງ ກໍຄືຜູ້ອອກແຮງງານ ໃນສາຂາອາຊີບຕ່າງໆ ມີຄວາມຮູ້ຄວາມສາມາດ, ສ້າງເງື່ອນໄຂໃຫ້ຜູ້ຈ້າງງານ ມີທາງເລືອກທີ່ເຫມາະສົມກັບຄຸນນະພາບຂອງແຮງງານໄດ້ຖືກຕ້ອງຕາມລະບຽບກົດໝາຍ.
ໃນການຝຶກ ແລະ ທົດສອບສີມືແຮງງານໃນຄັ້ງນີ້ ຈະດຳເນີນໄປເປັນເວລາ 4 ວັນ, ຊຶ່ງເຂົ້າຮ່ວມທັງໝົດ 85 ຄົນ, ໃນສາມສາຂາວິຊາຊ່າງດັ່ງກ່າວທີ່ມາຈາກພາກສ່ວນຕ່າງໆ ທັງພາກລັດວິສາຫະກິດ ແລະ ພາກເອກະຊົນ, ໂດຍຈະໄດ້ຜ່ານການທົດສອບພາກຄວາມຮູ້ທາງທິດສະດີ ແລະ ພາກປະຕິບັດຕົວຈິງ, ຜູ້ທີ່ສາມາດຜ່ານການທົດສອບດັ່ງກ່າວຈະໄດ້ຮັບໃບຢັ້ງຢືນວ່າເປັນຜູ້ທີ່ມີທັກສະສີມືສຳນານງານ ເພື່ອນຳໄປປະກອບອາຊີບໄດ້.
