ລາວສະເຫລີມສະຫລອງວັນວິສາຂະໂລກ
ເມື່ອທ້າຍອາທິດຜ່ານມາ ນີ້, ການນຳພັກ-ລັດ ພ້ອມດ້ວຍພຸດທະສາສະນິກະຊົນຊາວພຸດທະສາສະໜາ ໄດ້ຮ່ວມພິທີສະເຫລີມສະຫລອງວັນວິສາຂະໂລກ,ພຸດທະສັງກາດ 2562 ກົງກັບວັນເພັງ 15 ຄ່ຳ ເດືອນ 6 ຂຶ້ນ, ທີ່ເດີ່ນພຣະທາດຫຼວງ ນະຄອນຫຼວງວຽງຈັນ, ມີການໃສ່ບາດ, ຖະຫວາຍສັງຂະທານ ໃຫ້ພຣະສົງ-ສາມະເນນ ທີ່ນິມົນມາຈາກວັດຕ່າງໆຈຳນວນ 700 ອົງ, ເຂົ້າຮ່ວມໃນພິທີມີທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ,ພ້ອມດ້ວຍມວນຊົນເປັນຈຳນວນຫລາຍ, ກ່ອນໜ້ານີ້ກໍມີພິທີໂຮມຊຸມນຸມ ເພື່ອລະນຶກເຖິງວັນວິສາຂະໂລກຂຶ້ນ ຢູ່ ຫໍປະຊຸມແຫ່ງຊາດອີກດ້ວຍ, ນອກຈາກພິທີໃສ່ບາດຖະຫວາຍສັງຄະທານແລ້ວ ໃນຕອນບ່າຍວັນດຽວກັນ ກໍມີພິທີແຫ່ຕົ້ນກາລະພຶກ ແລະ ຜ່າປ່າມະຫາສາມັກຄີ ເພື່ອສົມທົບທຶນສ້າງອາຄານປະທານສູນກາງອົງການພຸດສະສາສະໜາທີ່ຫໍທຳມະສະພາ ແລະ ໃນຕອນຄ່ຳໄດ້ມີພິທີວຽນທຽນອ້ອມພະທາດຫລວງວຽງຈັນ ເພື່ອບູຊາພຣະຣັດຕະນະໄຕ ແລະ ສົມໂພດພະພຸດທະຮູບຕື່ມອີກ.
ພຣະອາຈານ ອະທິປະໄຕ ໄມຕີຈິດ ປະທານໂຄງການເມດຕາທຳອົງການພຸດທະສາສະໜາສຳພັນລາວ ໃຫ້ຮູ້ວ່າ: ຄຳວ່າ: ວິສາຂະ ຫຍໍ້ມາຈາກຄຳວ່າ “ວິສາຂະ ປຸນນະມິດິຖິບູຊາ” ແປວ່າ: ການບູຊາໃນວັນເພັງເດືອນວິສາຂະ ຫລື ເດືອນ 6 ເພັງ, ວັນວິສາຂະຖືເປັນວັນສຳຄັນທີ່ສຸດໃນທາງພຣະພຸດທະສາສະໜາ ເພາະເປັນວັນທີ່ເກີດມີ 3 ເຫດການອັດສະຈັນທີ່ສຳຄັນກ່ຽວກັບເລື່ອງລາວຊີວິດຂອງອົງສົມເດັດພຣະສັມມາສັມພຸດທະເຈົ້າ ໃນວັນເພັງຂຶ້ນ15 ຄ່ຳ ເດືອນ 6ຄື: ເປັນວັນປະສູດ, ຕັດສະຮູ້ ແລະ ປະລິນິພານ.
ວັນວິສາຂະເປັນວັນສຳຄັນຂອງໂລກ ໄດ້ຮັບຮອງຈາກອົງການສະຫະປະຊາຊາດ ໃຫ້ເປັນວັນສຳຄັນຂອງໂລກໃນວັນທີ 15 ທັນວາ ພສ. 2542(ຄສ. 1999) ໂດຍເອີ້ນວັນວິສາຂະບູຊາເປັນພາສາອັງກິດວ່າ ( VESAK Day) ຕາມຄຳເອີ້ນຂອງຊາວສີລັງກາ ຜູ້ຍື່ນເລື່ອງສະເຫນີສະຫະປະຊາຊາດພິຈາລະນາ ແລະ ໄດ້ກຳນົດເອົາວັນດັ່ງກ່າວ ເປັນວັນພັກ 1 ວັນຂອງສະຫະປະຊາຊາດ ແລະ ເປັນວັນພັກລັດຖະການຂອງຫລາຍປະເທດໃນໂລກ.
