ບົດສະຫລຸບ ພຣີເມຍລີກ ອັງກິດ ລະດູການ 2018-19 ແມນຊິຕີ້ ປ້ອງກັນແຊ້ມຄັ້ງທຳອິດ
ການແຂ່ງຂັນບານເຕະ ພຣີເມຍລີກ ອັງກິດ ລະດູການ 2018-19 ສິ້ນສຸດລົງໃນວັນທີ 12 ພຶດສະພານີ້, ບາງທີມສົມຫວັງ ບາງທີມຜິດຫວັງ ຕາມກົດເກນຂອງກິລາ, ສະເພາະການລຸ້ນແຊ້ມລະດູການນີ້ ມ່ວນມັນລະທຶກໃຈຫລາຍນັດຕິດຕໍ່ກັນ ລະຫວ່າງແຊ້ມເກົ່າ ແມນເຊັສເຕີ ຊິຕີ້ ກັບ ລິເວີພູລ ສຸດທ້າຍເປັນ ແມນຊິຕີ້ ສ້າງປະຫວັດສາດໜ້າໃໝ່ໃຫ້ຕົນເອງ ດ້ວຍການປ້ອງກັນແຊ້ມພຣີເມຍລີກເປັນຄັ້ງທຳອິດ ໂດຍສະເພາະ 14 ນັດຫລັງສຸດ ຊະນະລວດ, ນັດສຸດທ້າຍບຸກຊະນະ ໄບຣຕັນ 4-1, ຂະນະທີ່ ຜູ້ທ້າຊີງ ລິເວີພູລ ບໍ່ເສຍ 17 ນັດລວດ ແຕ່ສະເໝີອ່າວຫລາຍ 4 ຈາກ 17 ນັດ, ພາດໂອກາດຄວ້າແຊ້ມຢ່າງໜ້າເສຍດາຍມີ 97 ຄະແນນ ຈາກ 38 ນັດ, ຕາມຫລັງ ແມນຊິຕີ້ ພຽງ 1 ຄະແນນ ກາຍເປັນອັນດັບສອງດີສຸດໃນປະຫວັດສາດຂອງພຣີເມຍລີກ.
ສ່ວນການຍາດຊີງອັນດັບ 3 ລະຫວ່າງ ສະເປີ ແລະ ເຊລຊີ ນັດສຸດທ້າຍທັງສອງທີມຈົບດ້ວຍຜົນສະເໝີ, ເຊລຊີ ບຸກສະເໝີ ເລັສເຕີ ຊິຕີ້ 0-0 ແລະ ສະເປີ ເປີດບ້ານສະເໝີ ເອັຟເວີຕັນ 2-2 ເຮັດໃຫ້ ເຊລຊີ ໄດ້ອັນດັບ 2 ມີ 72 ຄະແນນ, ສະເປີ ໄດ້ອັນດັບທີ 4 ມີ 71 ຄະແນນ, ທັງສອງຄວ້າສິດໄປຫລິ້ນ ຢູຟາ ແຊມປ້ຽນລີກ ຮອບແບ່ງກຸ່ມລະດູການໜ້າ.
ຂະນະທີ່ການຍາດຊີງອັນດັບ 5 ອາເຊນອລ ບຸກຊະນະ ເບິນລີ້ 3-1, ສ່ວນ ແມນຢູ ເສຍຄາບ້ານໃຫ້ ຄາຣດິຟ ຊິຕີ້ ທີມຕົກຊັ້ນ 0-2, ອັນດັບ 5 ເປັນຂອງ ອາເຊນອລ ມີ 70 ຄະແນນ ຄວ້າສິດໄປຫລິ້ນ ຢູໂຣປາລີກ ຮອບແບ່ງກຸ່ມລະດູການໜ້າ, ແຕ່ຍັງມີໂອກາດໄປແຊມປ້ຽນລີກ ຖ້າຊະນະ ເຊລຊີ ໃນຮອບຊີງຊະນະເລີດ ຢູໂຣປາລີກ ລະດູການນີ້. ຂະນະທີ່ ແມນຢູ ໄດ້ທີ 6 ຕາມລະບຽບບໍ່ໄດ້ໂກຕ້າໄປບານເອີຣົບ ແຕ່ເນື່ອງຈາກວ່າແຊ້ມລີກຄັບລະດູການນີ້ເປັນ ແມນຊິຕີ້ ຈຶ່ງໂຍນໂກຕ້າມາໃຫ້ທີມອັນດັບ 6 ຂອງລີກ ແຕ່ໄດ້ໄປ ຢູໂຣປາລີກ ຮອບຄັດເລືອກຮອບທີ 2. ຢ່າງໃດກໍຕາມ ແມນຢູ ຍັງມີລຸ້ນໄປຮອບແບ່ງກຸ່ມ ຖ້າ ແມນຊິຕີ້ ຊະນະ ວັດຟອດ ຄວ້າແຊ້ມ ເອັຟເອຄັບ ລະດູການນີ້, ສ່ວນທີ 7 ວູຟແຮມຕັນ ກໍຈະໄດ້ໂກຕ້າ ຢູໂຣປາລີກ ຮອບຄັດເລືອກຮອບທີ 2 ແທນ ແມນຢູ ໂຍໃຫ້ຕາມລະບຽບ, ແຕ່ຖ້າ ວັດຟອດ ເປັນແຊ້ມ ເອັຟເອຄັບ ຮັບໂກຕ້າໄປ ຢູໂຣປາລີກ ຮອບແບ່ງກຸ່ມທັນທີ. ໝາຍຄວາມວ່າ: ວູຟແຮມຕັນ ຈະບໍ່ໄດ້ໂກຕ້າໄປບານເອີຣົບ ແລະ ແມນຢູ ຈະໄດ້ໄປ ຢູໂຣປາລີກ ຮອບຄັດເລືອກຮອບທີ 2.
ສຳລັບ ລາງວັນດາວຍິງສູງສຸດ ໄດ້ຮ່ວມກັນ 3 ຄົນຄື: ໂມຮາເໝັດ ຊາລາ, ຊາດິໂອ ມາເນ່ ແລະ ປີແອ ເອເມຣິກ ໂອບາເມຢ່ອງ ລວມ 22 ປະຕູເທົ່າກັນ.
ລາງວັນຜູ້ຮັກສາປະຕູດີເດັ່ນ ບໍ່ເສຍປະຕູ 21 ນັດ ຫລາຍສຸດໃນລີກລະດູການນີ້ໄດ້ຮັບຖົງມືຄຳ ໄດ້ແກ່: ອາລິສຊົງ ຜູ້ຮັກສາປະຕູຊາວເບຣຊິນຈາກ ລິເວີພູລ.
ລາງວັນຜູ້ສົ່ງບານໃຫ້ເພື່ອນຍິງປະຕູສູງສຸດໄດ້ແກ່ ເອເດັນ ອາຊາ ຈາກ ເຊລຊີ ລວມ 15 ຄັ້ງ.
