ບາເຊໂລນາ ກຽມປ່ອຍ ຄູຕິນໂຢ
ອີເອສພີເອັນ ສື່ກິລາຊື່ດັງ ລາຍງານວ່າ: ບາເຊໂລນາ ກຽມປ່ອຍ ຟິລິບເປ້ ຄູຕິນໂຢ ມິດຟິລຊາວບຣາຊິນພົ້ນທີມ ຫລັງຈາກລາວຫລິ້ນໄດ້ບໍ່ຄ່ອຍດີໃນເກມ ແຊມປ້ຽນ ລີກ ຮອບຕັດເຊືອກ ນັດສອງ ຈົນເຮັດໃຫ້ທີມຕົກຮອບ ໂດຍ ຄູຕິນໂຢ ເຄີຍຕົກເປັນຂ່າວກ່ຽວກັບການຍ້າຍທີມມາດົນແລ້ວ.
ບາເຊໂລນາ ສະໂມສອນຍັກໃຫຍ່ແຫ່ງ ລາ ລີກາ ສະເປນ ກຽມຈະຂາຍ ຟິລິບເປ້ ຄູຕິນໂຢ ກອງກາງຊາວບຣາຊິນໃນຊ່ວງໜ້າຮ້ອນນີ້.
ອະນາຄົດຂອງ ຄູຕິນໂຢ ໃນຖິ່ນຄຳນູເຕັມໄປດ້ວຍຄວາມບໍ່ແນ່ນອນມາດົນແລ້ວ ຫລັງຈາກລະດູການນີ້ລາວສ້າງຜົນງານໄດ້ໜ້າຜິດຫວັງ ຈົນເຮັດໃຫ້ແຟນບານບາງຄົນບໍ່ພໍໃຈຢ່າງໜັກ ແຕ່ຜູ້ບໍລິຫານຂອງທີມ ລວມທັງເພື່ອນຮ່ວມທີມບາງຄົນຍັງພະຍາຍາມປົກປ້ອງລາວມາໂດຍຕະຫລອດ.
ເຖິງຢ່າງໃດກໍຕາມ, ອີເອສພີເອັນ ລາຍງານວ່າ: ຫລັງຈາກ ຄູຕິນໂຢ ຫລິ້ນໄດ້ໜ້າຜິດຫວັງໃນເກມ ຢູຟາ ແຊມປ້ຽນລີກ ຮອບຮອງຊະນະເລີດ ນັດສອງ ທີ່ຕົ້ນສັງກັດອອກໄປເສຍ ລິເວີພູລ 0-4 ໃນວັນທີ 7 ພຶດສະພາຜ່ານມາແລ້ວນັ້ນ ມັນກໍມີການຕັດສິນໃຈແລ້ວວ່າລາວຈະບໍ່ໄດ້ຢູ່ກັບທີມອີກຕໍ່ໄປ.
ແຫລ່ງຂ່າວນິລະນາມທີ່ອ້າງວ່າເປັນຄົນຂອງ ບາເຊໂລນາ ໃຫ້ສຳພາດຕໍ່ ອີເອສພີເອັນ ວ່າ: “ຄູຕິນໂຢ ບໍ່ແມ່ນນັກເຕະຂອງ ບາເຊໂລນາ ມັນມີການຕັດສິນໃຈເຖິງເລື່ອງນັ້ນແບບຈະແຈ້ງແລ້ວ”.
