ເຢີກໆ ກົດໝາຍຄວບຄຸມທາດເຫລົ້າເລີ່ມອອກລິດແລ້ວ
ໂດຍ: ທິດກ່ຳ
ທີ່ຈິງແລ້ວ, ເວົ້າເລ່ືອງກົດໝາຍຄວບຄຸມທາດເຫລົ້າໄດ້ຖືກຮັບຮອງຈາກກອງປະຊຸມສະພາແຫ່ງຊາດມາຫລາຍປີແລ້ວ, ແຕ່ໃນຕົວຈິງການຜັນຂະຫຍາຍຫລືວ່າການຈັດຕັ້ງປະຕິບັດຢ່າງເອົາຈິງເອົາຈັງເດັດຂາດນັ້ນມັນຍັງສີຍານໆ ຄືໂສ້ບໍ່ເຄັ່ງ, ອັນສາເຫດກໍອາດມາຈາກຫລາຍປັດໄຈ ແລະ ຫລາຍເງື່ອນໄຂ.
ແຕ່ທິດກ່ຳ ຂໍເວົ້າຄວາມຈິງວ່າມັນຄານຳຜູ້ປະຕິບັດ, ເວົ້າລວມແລ້ວມັນກະຄານຳພວກເຮົາທັງໝົດທີ່ເວົ້າໄປແລ້ວ, ຮັບຮອງໄປແລ້ວບໍ່ທັນພາກັນເຢີກຢ່າງຈິງຈັງ ແລະ ເຂັ້ມງວດເດັດຂາດ.
ນອກນັ້ນ, ໃນໄລຍະຜ່ານມາແມ່ນຍັງເນັ້ນໃສ່ແຕ່ແງ່ນິຕິກຳກັບຄຳເວົ້າຈຶ່ງບໍ່ເຫັນນ້ຳເຫັນ ຕ່ອນໂຂ້ໂຫລ້ອອກມາເຊັ່ນ: ຫ້າມຂາຍເບຍໃກ້ສະຖາບັນການສຶກສາ, ຫ້າມຕັ້ງລຳ ວົງກິນເຫລົ້າກິນເບຍຢູ່ໃນວັດ, ຫ້າມນັກສຶກສານຸ່ງເຄື່ອງແບບເຂົ້າຮ້ານເຫລົ້າຮ້ານເບຍ ແລະ ອື່ນໆ. ສຸດທ້າຍມາ, ບັນດານິຕິກຳ ແລະ ຄຳເວົ້າດັ່ງກ່າວກໍເລີຍເປັນໝັນເຂົ້າໄປບຳເພັນຢູ່ໃນຕູ້ເອກະສານ.
ເລີ່ມຈາກປັດໄຈ ແລະ ສາເຫດທີ່ເວົ້າມານີ້, ປາກົດການແຜງລິດຂອງທາດເຫລົ້າທາດເບຍກໍຍິ່ງກຳເລີບເຕີບສານ ແລະ ຂະຫຍາຍຕົວຂຶ້ນກວ່າເກົ່າຈົນບໍ່ມີທ່າທີຫລຸດຜ່ອນ. ປາກົດການທີ່ສະແດງຢ່າງອອກໜ້າອອກຕາກໍຄືຮ້ານເຫລົ້າຮ້ານເບຍຍັງເຕັມບ້ານເຕັມ ເມືອງຄັບທີບຢູ່ຄືເກົ່າ, ຮ້ານເຫລົ້າຮ້ານເບຍຢູ່ໃກ້ສະຖາບັນການສຶກສາມັນກະຍັງຢູ່ບ່ອນ ເກົ່າ ແລະ ເພີ່ມຂຶ້ນຕາມການເວລາ.
ນັກສຶກສານຸ່ງເຄື່ອງແບບເຂົ້າຮ້ານເຫລົ້າຮ້ານເບຍເພີ່ມຂຶ້ນກວ່າເກົ່າ, ນາງສາວງາມປ່ອຍ ລ່ອຍບໍລິການຂາຍເຫລົ້າຂາຍເບຍກໍຍິ່ງຂະຫຍາຍປະລິມານເພີ່ມຂຶ້ນຕິກໆ ນັບທັງປ້າຍໂຄສະນາຂາຍເຫລົ້າຂາຍເບຍກໍເກີດຂຶ້ນຕາມຕຶກ, ຕາມຮ້ານນ້ອຍໃຫຍ່ເຮືອງເຮື່ອປານ ດອກເຫັດ, ຖ້າວາດພາບ ແລະ ຄິດໄປໃນແງ່ມູມໜຶ່ງເບິ່ງຄືວ່າປຸກລະດົມໂຄສະນາໃຫ້ພາກັນດື່ມເຫລົ້າດື່ມເບຍໃຫ້ເປັນຂະບວນກວ້າງຂວາງມ່ວນຊື່ນ.
ເມື່ອຕັ້ງໂຈດກັນວ່າ, ຜົນກະທົບຈາກການດື່ມນ້ຳເມົາກ໋ອກເຫລົ້າ, ກ໋ອກເບຍ ຫລື ປະເພດນ້ຳເມົາອື່ນໆ ນັ້ນມີບໍ່? ແລະ ມີໜ້ອຍຫລາຍສ່ຳໃດ? ຖ້າຈະໃຫ້ທິດກ່ຳຕອບໂຈດໃນສັງຄົມ ລາວເຮົາທຸກມື້ນີ້ຕ້ອງຍອມຮັບວ່າມີຫລາຍເຕີບ.
ບັນຫາອຸປະຕິເຫດທີ່ມັນເກີດຂຶ້ນແຕ່ລະມື້ນີ້ 1/3 ແມ່ນເກີດມາຈາກນ້ຳເມົາ, ຍົກຕົວຢ່າງໃນເດືອນເມສາຜ່ານມາຂະແໜງການກ່ຽວຂ້ອງໄດ້ສະຫລຸບມີຄົນຕາຍ 130 ກວ່າຄົນພຽງເດືອນດຽວ, ໃນນີ້ສ່ວນໜຶ່ງກໍແມ່ນເກີດຈາກນ້ຳເມົາ.
ນອກຈາກນັ້ນ, ບັນຫາຂອງການຄ້າມະນຸດ, ໂສເພນີ, ບັນຫາຄວາມບໍ່ໂສພາຂັດແຍ່ງອື່ນໆ ມຶງແມ່ນລູກໃຜ, ໃຜມາຍາດເອົາດິນກູຈົກປືນອອກມາຍິງຂູ່ສາລະພັດຢ່າງ, ເກີດເຫດອາລະວາດຕີກັນຢູ່ວົງເຫລົ້າວົງເບຍ, ຢູ່ງານລາຕີສະໂມສອນຫລາຍທ້ອງຖິ່ນສາເຫດກໍ່ເກີດ ມາຈາກນ້ຳເມົາແລ້ວອາລະວາດ.
ນອກນັ້ນ, ບັນຫາຄວາມບໍ່ສະຫງົບໃນຄອບຄົວສ່ວນໜຶ່ງມັນກໍມາຈາກເຫລົ້າຢາປາແປ້ງໄດ້ຄອບງຳແນວຄິດຈິດໃຈຂອງຄົນເຮົາໃຫ້ເກີດຄວາມໂລບ, ຄວາມຫລົງ, ຄວາມເກັ່ງກາດໂອຫັງເສຍຄຸນສົມບັດ, ທັດສະນະ, ເສຍທາດຂາດຄຸນ, ເສຍຕົນເສຍໂຕເມື່ອເມົາມາທັງຈົກທັງແຍ່, ສະຫລຸບວົງການດື່ມເຫລົ້າດື່ມເບຍໃນສັງຄົມລາວປັດຈຸບັນຈົນວ່າໄດ້ປະເພດໜຶ່ງຂອງຊຽນທີ່ເປັນຄໍທອງແດງແຜງລິດ.
ເພາະສະນັ້ນ, ດ້ວຍການເຫັນຄຸນຄ່າອັນປະເສີດທາງດ້ານວັດທະນະທຳ, ໄພອັນຕະລາຍ ສັງຄົມເປື່ອຍເຢືອຍໃນຕໍ່ໜ້າ, ຈຳກັດຄວາມເສຍຫາຍຕ່າງໆ ທີ່ເກີດຈາກນ້ຳເມົາທາງກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ຈຶ່ງໄດ້ອອກແຈ້ງການເລກທີ 196/ຖວທ ລົງວັນທີ 24 ເມສາ 2019 ກ່ຽວເລື່ອງການຢຸດຕິການຜະລິດສື່ໂຄສະນາ ແລະ ໂຄສະນາເຄື່ອງດື່ມທີ່ມີທາດເຫລົ້າທຸກປະເພດ.
ຕາມທິດກ່ຳຄິດນີ້ຄືພາລະອັນໜັກໜ່ວງທີ່ຂະແໜງການກ່ຽວຂ້ອງຕ້ອງພາໝູ່ເຢີກແຕ່ລິດຂອງກົດໝາຍຄວບຄຸມທາດເຫລົ້າຈະໄດ້ຮັບຜົນສ່ຳໃດນັ້ນໃຫ້ຄ່ອຍຕິດຕາມໃນຕອນຕໍ່ໄປເດີພີ່ນ້ອງ./.
