ຫາລືແກ້ໄຂບັນຫາຂີ້ເຫຍື້ອ
ໃນວັນທີ 8 ພຶດສະພານີ້, ກົມຂະບວນການຊາວໜຸ່ມ ສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ຮ່ວມກັບ ໂຄງການວຽງຈັນສີຂຽວ ໄດ້ຈັດກອງປະຊຸມປຶກສາຫາລື ເພື່ອແກ້ໄຂບັນຫາຂີ້ເຫຍື້ອ ແລະ ຫຼຸດຜ່ອນການນໍາໃຊ້ຖົງຢາງພາສຕິກ ເພື່ອຮັກສາຄວາມສະອາດ ແລະ ສິ່ງແວດລ້ອມ, ໂດຍມີຜູ້ຕາງໜ້າຈາກກະຊວງຕ່າງໆ ແລະ ອົງການຈັດຕັ້ງສາກົນເຂົ້າຮ່ວມນໍາດ້ວຍ.
ຫົວໜ້ກົມກວດກາຊາວໜຸ່ມ ໃຫ້ຮູ້ວ່າ: ເພື່ອແນໃສ່ຜັນຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VII ແລະ ແຜນພັດທະນາວຽກງານຊາວໜຸ່ມ-ເຍົາວະຊົນ 5 ປີ ຄັ້ງທີ 1 (2015-2020) ໃຫ້ປະກົດຜົນເປັນຈິງ. ໂດຍສະເພາະ ຂະບວນການແຂ່ງຂັນ “ຮັກຊາດ ແລະ ພັດທະນາ”, ຂໍ້ແຂ່ງຂັນ 4 ບຸກ ແລະ ຂະບວນການແຂ່ງຂັນ 3 ດີ 4 ຮູ້ ຂອງເຍົາວະຊົນ ແລະ ສ້າງຂະບວນການຕ້ອນຮັບ ກອງປະຊຸມໃຫຍ່ 3 ຂັ້ນ ຂອງຄະນະຊາວຫນຸ່ມໃນຂອບເຂດທົ່ວປະເທດ ໃຫ້ຟົດຟື້ນ ແລະ ແນໃສ່ຈັດຕັ້ງປະຕິບັດ 4 ແຜນການ, 12 ໂຄງການ ແລະ 35 ກິດຈະກຳ ໂດຍສະເພາະໂຄງການ “ຊາວໜຸ່ມກັບພາລະກິດປົກປັກຮັກສາ ແລະ ສ້າງສາປະເທດຊາດ’’ ໃຫ້ບັນລຸຕາມເປົ້າໝາຍວາງໄວ້.
ກອງປະຊຸມດັ່ງກ່າວ, ໄດ້ປຶກສາຫາລືກັນໃນຫຼາຍບັນຫາ ໂດຍສະເພາະແມ່ນບັນຫາການແກ້ໄຂ ການຖີ້ມຂີ້ເຫຍື້ອຊະຊາຍຢູ່ຕາມຕົວເມືອງ, ຕາມເສັ້ນທາງ, ດິນເປົ່າຫວ່າງ, ຕາມຄອງຊົນລະປະທານ ແລະສະຖານທີ່ອື່ນໆ, ແນໃສ່ປຸກລະດົມໃຫ້ທຸກໆຄົນໃນສັງຄົມ ຕ້ອງມີສ່ວນຮ່ວມ ໃນການກຳຈັດຂີ້ເຫຍື້ອ ໂດຍສະເພາະແມ່ນການຫຼຸດຜ່ອນການນໍາໃຊ້ຖົງຢາງພຼາສຕິກ ໃຫ້ຫັນມານຳໃຊ້ວັດຖຸທຳມະຊາດທົດແທນຢ່າງມີຫົວຄິດປະດິດສ້າງ ເຮັດໃຫ້ຕົວເມືອງມີຄວາມສະອາດ, ປາສະຈາກມົນລະຜິດ, ທັງເປັນການ ປະຕິບັດນະໂຍບາຍ 6 ສ ໂດຍສະເພາະແມ່ນ ສ ສະອາດ ຂອງນະຄອນຫຼວງວຽງຈັນ ວາງອອກ ໃຫ້ປະກົດຜົນເປັນຈິງ.
