ຕະຫລາດແຄມທາງເປັນສາເຫດຫລັກກໍ່ໃຫ້ເກີດບັນຫາລົດຕິດຢູ່ນະຄອນຫລວງວຽງຈັນ
ຫົວໜ້າກົມຕໍາຫລວດຈະລາຈອນ, ກະຊວງປ້ອງກັນຄວາມສະຫງົບໃຫ້ຮູ້ວ່າ: ການອະນຸຍາດໃຫ້ສ້າງຕະຫລາດໃນ ນະຄອນຫລວງວຽງຈັນບາງແຫ່ງແມ່ນບໍ່ຖືກຕ້ອງຕາມຫລັກການ ເພາະສະຖານ ທີ່ຈອດລົດຂອງຕະຫລາດບໍ່ພຽງພໍກັບຜູ້ມາໃຊ້ບໍລິການ ຈຶ່ງເຮັດໃຫ້ລົດລົ້ນຕະ ຫລາດ ແລະ ພາກັນນໍາໃຊ້ແຄມທາງເປັນບ່ອນຈອດລົດ, ໂດຍອະນຸຍາດໃຫ້ບຸກ ຄົນເປັນຜູ້ສໍາປະທານເຮັດບໍລິການຮັບຝາກລົດ.
ດ້ວຍສາເຫດດັ່ງກ່າວຈຶ່ງເກີດມີບັນຫາການສັນຈອນແອອັດໃນ ຊົ່ວໂມງເລັ່ງດ່ວນຢູ່ບໍລິເວນໜ້າຕະຫລາດຫລາຍແຫ່ງໃນນະຄອນຫລວງວຽງຈັນ, ຊຶ່ງທາງເຈົ້າໜ້າທີ່ຕຳຫລວດຈະລາຈອນກໍຍັງບໍ່ສາມາດແກ້ໄຂໄດ້ເທື່ອ, ມີແຕ່ແກ້ ໄຂບັນຫາສະເພາະໜ້າໄປກ່ອນ ໂດຍການຊ່ວຍລະບາຍລົດເພື່ອອໍານວຍຄວາມ ສະດວກໃຫ້ບັນດານັກຂັບຂີ່ສັນຈອນໄປມາໄດ້ງ່ານຂຶ້ນ. ຜ່ານມາເຈົ້າໜ້າທີກໍໄດ້ ລົງໂຄສະນາ ແລະ ຫາວິທີແກ້ໄຂຫລາຍຄັ້ງ ແຕ່ບັນຫາດັ່ງກ່າວກໍບໍ່ມີທ່າທີ ຫລຸດລົງ ໂດຍສະເພາະບໍລິເວນໜ້າຄິວລົດເມຕະຫລາດຂົວດິນ, ຕະຫລາດ ໂພນຕ້ອງຈອມມະນີ, ໂພນສະຫວ່າງ ແລະ ບ່ອນອື່ນໆ, ເນື່ອງຈາກວ່າ ເຂດດັ່ງກ່າວເປັນເຂດຊຸມຊົນ, ເປັນສູນລວມການຊື້-ຂາຍ ເຊິ່ງເຮັດໃຫ້ການສັນ ຈອນໄປ-ມາພົບຄວາມຫຍຸ້ງຍາກ.
ເຖິງຢ່າງໃດກໍຕາມທາງເຈົ້າໜ້າທີ່ກໍພວມເລັ່ງແກ້ໄຂບັນຫາດັ່ງກ່າວ ເພື່ອ ອໍານວຍຄວາມສະດວກໃຫ້ຜູ້ໃຊ້ລົດໃຊ້ຖະໜົນ ເຖິງວ່າຍັງມີຜູ້ຄົນຈໍານວນໜຶ່ງເອົາແຄມທາງເປັນບ່ອນຈອດລົດຊະຊາຍຢ່າງຂາດຄວາມຮັບຜິດຊອບ ແລະ ບໍ່ປະຕິບັດລະບຽບກົດໝາຍ, ພ້ອມນັ້ນອີກຢ່າງໜຶ່ງກໍຍ້ອນເຈົ້າໜ້າທີ່ເອງບໍ່ມີຄວາມເຂັ້ມງວດເດັດຂາດກັບຜູ້ລະເມີດລະບຽບຈະລາຈອນ.
