ນັກກິລາແລ່ນ-ລານລາວເລັ່ງຝຶກຊ້ອມ ກຽມເຂົ້າຮ່ວມໄທແລນໂອເພັນກາງເດືອນນີ້
ທ້າວ ອານຸສອນ ໄຊສາ ນັກກິລາແລ່ນທີມຊາດລາວ ໄດ້ຝຶກຊ້ອມທຸກໆມື້ ເພື່ອກຽມເຂົ້າຮ່ວມການແຂ່ງຂັນ ໄທແລນ ໂອເພັນ ທີ່ຈະຈັດຂຶ້ນລະຫວ່າງວັນທີ 18-21 ພຶດສະພານີ້ ທີ່ບາງກອກ ຣາຊະອານາຈັກໄທ.
ທ້າວ ອານຸສອນ ໄຊສາ ໄດ້ໃຫ້ສຳພາດຕໍ່ນັກຂ່າວລາວພັດທະນາວ່າ: ເພື່ອສາມາດຍາດໄດ້ຜົນງານດີເດັ່ນໃນການແຂ່ງຂັນຄັ້ງນີ້ ຕົນເອງໄດ້ຝຶກຊ້ອມຢ່າງໜັກເພື່ອກະກຽມພະລະກຳລັງໃຫ້ຢູ່ໃນທ່າກຽມພ້ອມສະເໝີ ໃນລະຫວ່າງການແຂ່ງຂັນຊີງແຊ້ມອາຊີທີ່ປະເທດກາຕ້າ ເຊິ່ງທາງຄະນະສະຫະພັນແລ່ນ-ລານແຫ່ງຊາດລາວ ໄດ້ສົ່ງນັກກິລາເຂົ້າຮ່ວມທັງໝົດ 3 ຄົນຄື: ທ້າວ ອານຸສອນ ໄຊສາ ແລ່ນຂ້າມຮົ້ວ 110 ແມັດ, ນາງ ມະນີຈັນ ຈັນທະວົງ ແລ່ນຂ້າມຮົ້ວ 100 ແມັດ ແລະ ນາງ ສີລິນາ ພະອາໄພ ແລ່ນ 100 ແມັດ ແລະ ຜ່ານການແຂ່ງຂັນ ເຖິງວ່ານັກກິລາລາວເຮົາບໍ່ສາມາດຜ່ານຮອບຄັດເລືອກໄດ້ ແຕ່ກໍມີຄວາມຮູ້ສຶກດີໃຈຫລາຍທີ່ຕົນເອງສາມາດທຳລາຍສະຖິຕິຂອງຕົນເອງໄດ້ ໂດຍຍາດໄດ້ອັນດັບທີ 2 ໃນຮອບຄັດເລືອກ.
ອານຸສອນ ເວົ້າວ່າ: ແນວໃດກໍຕາມ ປັດຈຸບັນຕົນເອງໄດ້ຝຶກຊ້ອມຢ່າງໜັກຢູ່ສູນຝຶກຊ້ອມສີເກີດ ເພື່ອເຂົ້າຮ່ວມການແຂ່ງຂັນຄັ້ງນີ້ໃຫ້ຕິດອັນດັບ 1 ໃນ 3 ຂອງການແຂ່ງຂັນ.
ສຳລັບນັກກິລາທີ່ຈະເຂົ້າຮ່ວມການແຂ່ງຂັນໄທແລນ ໂອເພັນ ປະກອບມີ: ທ້າວ ອານຸສອນ ໄຊສາ, ທ້າວ ໄຊດາວັນ ວົງສະຫວັນ, ທ້າວ ສີພາສຸກ ບົດວິໄລທອງ, ທ້າວ ນັນທະວັດ ເຄນຕານອ່ອນ, ທ້າວ ສະຖາພອນ ໄຊຍະພອນ, ນາງ ຂັນມະໄລພອນ ບຸນຍະເວີນ, ນາງ ມະນີວັນ ຈັນທະວົງ, ນາງ ສີລິນາ ພະອາໄພ, ນາງ ປ້ອມ ໂລມະນີ, ນາງ ລົດແກ້ວ ອິນທະກຸມມານ, ນາງ ໄຂມາ ພົນຍະໄຂ, ນາງ ພອນໄຊ ປ່າວສະຫວັດ.
# ກາບແກ້ວ
