ອີຣານບໍ່ປະຕິບັດຕາມຂໍ້ຕົກລົງນິວເຄຼຍ ບາງສ່ວນຫລັງອາເມລິກາຖອນຕົວ
ສະຖານີໂທລະພາບທາງການອີຣານ ລາຍງານວ່າ: ອີຣານບໍ່ໄດ້ປະຕິບັດຕາມຂໍ້ຕົກລົງນິວເຄຼຍບາງສ່ວນທີ່ລົງນາມໄວ້ກັບກຸ່ມປະເທດມະຫາອຳນາດໂລກ, ພາຍຫລັງລັດຖະບານອາເມລິກາຖອນຕົວຈາກຂໍ້ຕົກລົງໄປເມື່ອປີກ່ອນ ແລະ ທ່າມກາງສຽງເຕືອນຈາກເຈົ້າໜ້າທີ່ອີຣານວ່າຈະເພີ່ມສະມັດຖະພາບແຮ່ຢູເຣນຽມຕໍ່ໄປ.
ສື່ທາງການອີຣານລາຍງານວ່າ: ຈົດໝາຍທີ່ລະບຸວ່າອີຣານບໍ່ປະຕິບັດຕາມບາງຢ່າງໃນຂໍ້ຕົກລົງນິວເຄຼຍປີ 2015 ໄດ້ຮັບການຈັດສົ່ງໄປຫາເອກອັກຄະລາຊະທູດຕ່າງໆ ລວມທັງຜູ້ນຳອັງກິດ, ຈີນ, ສະຫະພາບເອີຣົບ, ຝຣັ່ງ ແລະ ເຢຍລະມັນ ທີ່ຮ່ວມລົງນາມໃນຂໍ້ຕົກລົງນິວເຄຼຍໃຫ້ອີຣານຈຳກັດການເພີ່ມສະມັດຖະພາບແຮ່ຢູເຣນຽມແລກປ່ຽນກັບການຫລຸດຜ່ອນມາດຕະການຂວ້ຳບາດອີຣານ ເຊິ່ງຣັດເຊຍໄດ້ຮັບຈົດໝາຍດັ່ງກ່າວແລ້ວ.
ທ່ານ ໂມຮຳໝັດ ຈາວັດ ຊາຣີຟ ລັດຖະມົນຕີຕ່າງປະເທດອີຣານ ເຊິ່ງຢ້ຽມຢາມນະຄອນຫລວງມົດສະກູຂອງຣັດເຊຍ ກ່າວວ່າ: ອີຣານພິຈາລະນາເຫັນຄວນໃຫ້ຍົກເວັ້ນການປະຕິບັດຕາມຂໍ້ຕົກລົງນິວເຄຼຍບາງມາດຕະການທີ່ອີຣານເຄີຍດຳເນີນການຕາມໃນໄລຍະເວລານັ້ນ.
