ການລັກລອບຂຸດຄົ້ນ ແລະ ເຄື່ອນຍ້າຍໄມ້ຢູ່ແຂວງສະຫວັນນະເຂດໄດ້ຫລຸດຜ່ອນລົງຫລາຍ
ແຫລ່ງຂ່າວສະຫວັນນະເຂດໃຫ້ຮູ້ວ່າ: ປັດຈຸບັນ ສະພາບການລັກລອບຂຸດຄົ້ນໄມ້ ແລະ ເຄື່ອນຍ້າຍໄມ້ຢູ່ແຂວງດັ່ງກ່າວປາກົດວ່າຫລຸດລົງຫລາຍ ເມື່ອທຽບໃສ່ເມື່ອກ່ອນ ອັນໄດ້ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໄດ້ຮັບການຈັດຕັ້ງປະຕິບັດເປັນຮູບປະທຳຫລາຍຂຶ້ນ ເຊິ່ງເຮັດໃຫ້ບົດບາດໃນການນຳພາຄຸ້ມຄອງຂອງພັກ-ລັດສູງຂຶ້ນ, ຜູ້ປະກອບການຈຳນວນໜຶ່ງກໍໄດ້ເອົາໃຈໃສ່ປັບປຸງຍົກລະດັບຄວາມສາມາດສ້າງຜະລິດຕະພັນສຳເລັດຮູບທີ່ມີມູນຄ່າເພີ່ມສູງຂຶ້ນ ພາຍຫລັງມີຄຳສັ່ງເລກທີ 15/ນຍ ເຮັດໃຫ້ຜູ້ລະເມີດມີຄວາມຢ້ານກົວ ແລະ ບໍ່ກ້າກະທຳຜິດຊ້ຳອີກ. ນີ້ແມ່ນການເປີດເຜີຍຂອງເຈົ້າໜ້າທີ່ປ່າໄມ້ແຂວງສະຫວັນນະເຂດ.
ອັນສຳຄັນໃນຜ່ານມາ ທາງການນຳແຂວງໄດ້ເລີ່ມມີການສ້າງເມືອງຕົວແບບໃນການຈັດຕັ້ງປະຕິບັດຄຳສັ່ງ 15/ນຍ ແລະ ການປົກປັກຮັກສາປ່າໄມ້ ໃນນີ້ກໍມີເມືອງທ່າປາງທອງ ໂດຍເລີ່ມຈາກການຈັດຕັ້ງປະຕິບັດກົດໝາຍ ແລະ ລະບຽບໃນການຄຸ້ມຄອງປ່າໄມ້ແຕ່ລະປະເພດໃຫ້ເຂັ້ມງວດ, ການຄຸ້ມຄອງໂຮງງານ, ການສົ່ງຜະລິດຕະພັນໄມ້ ແລະ ອື່ນໆເຂົ້າສູ່ລະບຽບກົດໝາຍ.
ໄປຄຽງຄູ່ກັນນີ້ ກໍຍັງມີຂໍ້ຄົງຄ້າງຫລາຍດ້ານທີ່ຈະໄດ້ແກ້ໄຂຢ່າງເລັ່ງດ່ວນ ເຊັ່ນວ່າ: ຈະຕ້ອງເອົາໃຈໃສ່ໃນການຈັດຕັ້ງປະຕິບັດຄຳສັ່ງ 15/ນຍ ຢ່າງເຄັ່ງຂັດ, ທັງເຂັ້ມງວດ ແລະ ເດັດຂາດ, ພ້ອມທັງປັບປຸງບັນດານິຕິກຳຕ່າງໆທີ່ກ່ຽວຂ້ອງໃຫ້ທັນຄົບຖ້ວນ ແລະ ຮັດກຸມຈະແຈ້ງ ແລະ ມີຄວາມເປັນເອກະພາບໃນການຈັດຕັ້ງປະຕິບັດ.
ໃນກອງປະຊຸມລັດຖະບານໃນເດືອນເມສາຜ່ານມານີ້ ໄດ້ເຫັນດີອະນຸມັດຂຸດຄົ້ນໄມ້ທີ່ນອນໃນເຂດໂຄງການພັດທະນາ ແລະ ກໍ່ສ້າງພື້ນຖານໂຄງລ່າງ ໃນນີ້ຢູ່ແຂວງສະຫວັນນະເຂດກໍໄດ້ດຳເນີນການຈັດຕັ້ງປະຕິບັດຕໍ່ກັບຄຳເຫັນອະນຸມັດຈາກລັດຖະບານ ໂດຍໄດ້ດຳເນີນການຂຸດຄົ້ນໄມ້ຢູ່ເຂດໂຄງການກໍ່ສ້າງເຂື່ອນຜະລິດໄຟຟ້າເຊລະນອງ 1 ເຊິ່ງມີການກວດກາຕິດຕາມຢ່າງໃກ້ຊິດຈາກອຳນາດການປົກຄອງທ້ອງຖິ່ນ ຄາດວ່າຈະມີໄມ້ເປັນຈຳນວນຫລາຍພັນແມັດກ້ອນ.
