ເກົາຫລີໃຕ້ກຽມສະເໜີຮ່າງກົດໝາຍໃໝ່ ນັກສຶກສາຕ່າງຊາດປ່ຽນສະຖານະເປັນພົນລະເມືອງໄດ້

   ເກົາຫລີໃຕ້ ເປັນອີກໜຶ່ງປະເທດທີ່ບັນດານັກສຶກສາຕ່າງຊາດນິຍົມໄປຮຽນຕໍ່ກັນເປັນຈຳນວນຫລາຍ ເຊິ່ງຫລັງຈາກຮຽນຈົບປະລິນຍາແລ້ວຫລາຍໆຄົນກໍມີຄວາມໄຝ່ຝັນທີ່ຢາກຈະເຮັດວຽກຕໍ່ຢູ່ນັ້ນ ຫລື ອາໄສຢູ່ໃນປະເທດເກົາຫລີໃຕ້, ແຕ່ເນື່ອງຈາກເຮົາບໍ່ແມ່ນພົນລະເມືອງຂອງປະເທດ ກໍຖືໄດ້ວ່າເປັນເລື່ອງຍາກທີ່ຈະສາມາດເຮັດໄດ້.

      ແຕ່ຫລ້າສຸດ ວັນທີ 22 ເມສາ 2019 ທີ່ຜ່ານມາ ສຳນັກຂ່າວ Koreamtimesໃນເກົາຫລີໃຕ້ ໄດ້ມີລາຍງານວ່າ ຕອນນີ້ທາງປະເທດເກົາຫລີໃຕ້ກຳລັງກຽມສະເໜີຮ່າງກົດໝາຍໃໝ່ໃຫ້ກັບນັກສຶກສາຕ່າງຊາດທີ່ຮຽນຈົບປະລິນຍາສາມາດປ່ຽນສະຖານະຂອງຕົນເປັນພົນລະເມືອງຂອງປະເທດໄດ້ງ່າຍຂຶ້ນ ເພື່ອແກ້ໄຂບັນຫາດ້ານຄົນເກີດໜ້ອຍລົງ ແລະ ເພື່ອເປັນການເພີ່ມ ແຮງງານມາພັດທະນາປະເທດໃນອະນາຄົດນຳອີກ.

     ທັງນີ້ ຮ່າງກົດໝາຍທີ່ລັດຖະບານເກົາຫລີໃຕ້ໄດ້ຮ່າງຂຶ້ນມານັ້ນມີເນື້ອໃນສຳຄັນຄື ຫາກນັກສຶກສາຕ່າງຊາດທີ່ເດີນທາງເຂົ້າມາສຶກສາຕໍ່ໃນປະເທດເກົາຫລີໃຕ້ ແລະ ຮຽນຈົບໃນລະດັບປະລິນຍາ ຢາກປ່ຽນແປງສັນຊາດກໍຈະມີການເອື້ອປະໂຫຍດໃນເລື່ອງດັ່ງກ່າວໃຫ້ ເຊິ່ງສາເຫດສຳຄັນທີ່ໄດ້ມີການຮ່າງກົດໝາຍສະບັບໃໝ່ຂຶ້ນມາ ເພາະວ່າທາງການເກົາຫລີໃຕ້ຢາກເພີ່ມຈຳນວນປະຊາກອນຂອງປະເທດ ຈຶ່ງໄດ້ມີການຊຸກຍູ້ຮ່າງກົດໝາຍດັ່ງກ່າວອອກມາ, ແຕ່ທັງນີ້ກໍຕ້ອງການພົນລະເມືອງທີ່ມີຄຸນນະພາບ ແລະ ມີຄວາມສາມາດ ຈຶ່ງໄດ້ເຈາະຈົງສະເພາະກຸ່ມນັກສຶກສາຕ່າງຊາດທີ່ຈົບຈາກການສຶກສາໃນປະເທດເທົ່ານັ້ນ.

     ກົດໝາຍການໂອນສັນຊາດຂອງເກົາຫລີໃຕ້ໃນປະຈຸບັນຈະເອື້ອອຳນວຍໃຫ້ກັບຊາວຕ່າງຊາດທີ່ແຕ່ງດອງກັບຊາວເກົາຫລີໃຕ້ເທົ່ານັ້ນ, ແຕ່ກັບຮ່າງກົດໝາຍສະບັບໃໝ່ນີ້ຈະຄອບຄຸມເຖິງກຸ່ມນັກສຶກສາຕ່າງຊາດນຳ ແລະ ຫາກຮ່າງກົດໝາຍນີ້ຜ່ານການເຫັນດີ ກໍຈະຊ່ວຍແກ້ໄຂບັນຫາເລື່ອງປະຊາກອນທີ່ຫລຸດລົງໄດ້. ນອກຈາກນີ້ ຍັງເປັນການເພີ່ມໂອກາດທີ່ຈະມີແຮງງານເຂົ້າມາພັດທະນາປະເພດເພີ່ມຈຳນວນຫລາຍຂຶ້ນຕາມໄປນຳ.

     ປະເດັນສຳຄັນທີ່ເຮັດໃຫ້ມີການຮ່າງກົດໝາຍນີ້ຂຶ້ນມາກໍຄື ສັງຄົມສູງໄວໃນເກົາຫລີໃຕ້ ເນື່ອງຈາກພາກລັດໄດ້ໃຫ້ຄວາມສຳຄັນກັບເລື່ອງນີ້ຫລາຍ ພ້ອມທັງພະຍາຍາມທີ່ຈະຫາກົນໄກເພື່ອປ້ອງກັນ ແລະ ບໍ່ເຮັດໃຫ້ປະເທດໄດ້ຮັບຜົນກະທົບຫລາຍເກີນໄປ ໂດຍກ່ອນໜ້ານີ້ໄດ້ມີການວິເຄາະສະຖິຕິຈຳນວນປະຊາກອນເກົາຫລີໃຕ້ໃນປີ 2008 ຈະມີປະມານ 52 ລ້ານຄົນ ແລະ ຈະຄ່ອຍໆຫລຸດລົງເຫລືອປະມານ 40 ລ້ານຄົນໃນປີ 2067.

     ຫລັງຈາກນີ້, ຜົນຂອງຮ່າງກົດໝາຍດັ່ງກ່າວຈະເປັນແນວໃດ ເຮົາຄົງຕ້ອງລໍຖ້າຕິດຕາມກັນຕໍ່ໄປວ່າ ຮ່າງກົດໝາຍດັ່ງກ່າວຈະຜ່ານຄວາມເຫັນດີຂອງສະພາເກົາຫລີໃຕ້ກັນຫລືບໍ່.