ປີ 2018 ມູນຄ່າການສົ່ງອອກຂອງລາວພາຍໃຕ້ສິດທິພິເສດກວມ 24,30%
ສູນຂໍ້ມູນຂ່າວສານທາງດ້ານການຄ້າຂອງລາວແຈ້ງໃຫ້ຮູ້ວ່າ: ໃນປີ 2018 ມູນຄ່າການສົ່ງອອກພາຍໃຕ້ສິດທິພິເສດທາງການຄ້າບັນລຸໄດ້ປະມານ 1,31 ຕື້ໂດລາສະຫະລັດກວມເອົາ 24,30% ຂອງມູນຄ່າການສົ່ງອອກທັງໝົດຂອງລາວ, ສ່ວນຕົວເລກມູນຄ່າການນຳເຂົ້າພາຍໃຕ້ສິດທິພິເສດດັ່ງກ່າວປະຕິ ບັດໄດ້ພຽງ 613 ລ້ານກວ່າໂດລາສະຫະລັດກວມເອົາ 10,80% ຂອງມູນຄ່າການນໍາເຂົ້າທັງໝົດ.
ການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າຂອງລາວແບ່ງອອກເປັນ 2 ຮູບແບບດ້ວຍກັນຄື: ແບບຝ່າຍດຽວ (ລະບົບສິດທິພິເສດທົ່ວໄປ (Generalized System of Preferences: GSP) ແລະ ແບບຕອບແທນກັນ ຫລື ຕ່າງຝ່າຍຕ່າງໄດ້ຮັບຜົນປະໂຫຍດ (ສັນຍາການຄ້າເສລີ ຫລື Free Trade Agreement: FTA).
ບັນດາປະເທດທີ່ ສປປ ລາວ ສົ່ງອອກພາຍໃຕ້ສິດທິພິເສດດັ່ງກ່າວມີ 37 ປະເທດ. ໃນນັ້ນ, ປະເທດທີ່ມີການສົ່ງອອກໄປຫລາຍກວ່າໝູ່ແມ່ນ ໄທ, ສສ ຫວຽດນາມ ແລະ ສປ ຈີນ; ມີມູນຄ່າປະມານ 425 ລ້ານກວ່າໂດລາສະຫະລັດ, 332 ລ້ານກວ່າໂດລາ ແລະ 250 ລ້ານກວ່າໂດລາຕາມລຳດັບ. ກຸ່ມສິນຄ້າສົ່ງອອກຫລາຍກວ່າໝູ່ແມ່ນຄ້າອຸດສາຫະກຳມີມູນຄ່າປະມານ 637 ກວ່າລ້ານໂດລາສະຫະລັດ, ຮອງລົງມາແມ່ນກຸ່ມສິນຄ້າພືດກະສິກຳມີມູນຄ່າປະມານ 406 ລ້ານໂດລາສະຫະລັດ ແລະ ກຸ່ມສິນຄ້າຜະລິດຕະພັນແຮ່ທາດມີມູນຄ່າປະມານ 89,50 ລ້ານໂດລາສະຫະລັດ.
ສ່ວນປະເທດທີ່ ສປປ ລາວ ນໍາເຂົ້າພາຍໃຕ້ສິດທິພິເສດນີ້ ມີທັງໝົດ 39 ປະເທດ, ໃນນັ້ນມີການນຳເຂົ້າຫລາຍກວ່າໝູ່ແມ່ນຈາກ ໄທ, ສປ ຈີນ ແລະ ສສ.ຫວຽດນາມ ແລະ ຫລາຍກວ່າໝູ່ແມ່ນກຸ່ມສິນຄ້າພາຫະນະ, ສິ້ນສ່ວນ ອາໄຫລ່, ກຸ່ມສິນຄ້າເຄື່ອງກໍ່ສ້າງ ແລະ ກຸ່ມສິນຄ້າເຄື່ອງນຸ່ງຫົ່ມ, ເຄື່ອງໃຊ້ສອຍປະຈຳວັນອື່ນໆ.
