ເພີ່ມຄວາມເຂົ້າໃຈກ່ຽວກັບພາລະບົດບາດຂອງອົງການກວດກາລັດຖະບານໃຫ້ສື່ມວນຊົນ
ກອງປະຊຸມປຶກສາຫາລືເພື່ອສ້າງຄວາມເຂົ້າໃຈກ່ຽວກັບພາລະບົດບາດ, ສິດ ແລະ ຫນ້າທີ່ຂອງອົງການກວດກາລັດຖະບານໃຫ້ກັບສື່ມວນຊົນ ໄດ້ຈັດ ຂຶ້ນໃນວັນທີ 3 ເມສານີ້ຢູ່ອົງການດັ່ງກ່າວ, ໂດຍການເປັນປະທານຂອງທ່ານ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ, ຮອງປະ ທານອົງການກວດກາລັດຖະບານ, ຮອງຫົວຫນ້າອົງການຕ້ານການສໍ້ລາດບັງຫລວງຂັ້ນສູນກາງ, ມີບັນນາທິການອົງການສື່ມວນຊົນອ້ອມຂ້າງສູນກາງເຂົ້າຮ່ວມຢ່າງພ້ອມພຽງ.
ທ່ານ ດາວບົວລະພາ ໄດ້ມີຄໍາເຫັນວ່າ: ອົງການກວດກາລັດຖະບານ (ອກລ) ມີພາລະບົດບາດ,ສິດ ແລະ ຫນ້າທີ່ ແຕກຕ່າງກັບອົງການກວດສອບແຫ່ງລັດ (ອກສລ), ເຊິ່ງໃນຜ່ານມາສື່ມວນຊົນສ່ວນໃຫຍ່ມີເຂົ້າຄວາມເຂົ້າໃຈວ່າແມ່ນເປັນອົງການດຽວກັນ ຈຶ່ງເຮັດໃຫ້ການນໍາສະເໜີຂ່າວຕໍ່ສັງຄົມມີຄວາມຜິດພາດ.
ທ່ານ ດາວບົວລະພາ ໃຫ້ຮູ້ວ່າ: ອກລ ແມ່ນອົງການກວດກາລັດຂັ້ນສູນກາງ, ເປັນອົງການລັດທຽບເທົ່າກະຊວງ ແລະ ຢູ່ໃນໂຄງປະກອບກົງຈັກຂອງລັດຖະບານ, ມີພາລະບົດບາດເປັນເສນາທິການໃຫ້ລັດຖະບານກ່ຽວກັບການກວດກາລັດ, ສະກັດກັ້ນການສໍ້ລາດບັງຫລວງ, ພິຈາລະນາຄໍາສະເໜີຂອງພົນ ລະເມືອງໃນຂອບເຂດສິດຫນ້າທີ່ຂອງລັດຖະບານ ແລະ ການກວດກາແມ່ນເນັ້ນໃສ່ເນື້ອໃນການປະຕິບັດນະໂຍບາຍ, ລະບຽບກົດໝາຍ, ແຜນການ, ໂຄງ ການໃນການຄຸ້ມຄອງບໍລິຫານລັດ, ກວດກາການປະຕິບັດດ້ານວິຊາສະເພາະ, ເຕັກນິກ ແລະ ຫລັກການຄຸ້ມຄອງຂອງຂະແຫນງການ ແລະ ກວດກາຜົນກວດສອບຕາມການສະເໜີຂອງອົງການກວດສອບແຫ່ງລັດຕາມມະຕິກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ.
ທ່ານ ດາວບົວລະພາ ກ່າວວ່າ: ພາຍຫລັງອົງການກ່ຽວຂ້ອງຂອງເປົ້າຫມາຍຖືກກວດກາໄດ້ຮັບຂໍ້ຕົກລົງແກ້ໄຂຜົນຂອງການກວດກາແລ້ວຕ້ອງຈັດຕັ້ງປະຕິບັດໃຫ້ເຂັ້ມງວດ, ເດັດຂາດ ແລະ ທັນການ. ໃນກໍລະນີອົງການຈັດຕັ້ງຂອງເປົ້າຫມາຍຖືກກວດກາ ຫລື ຜູ້ເປັນຫົວໜ້າຫາກແກ້ໄຂຜົນຂອງການກວດກາບໍ່ຖືກຕ້ອງກັບການຕົກລົງຂອງຂັ້ນເທິງ ຜູ້ເປັນຫົວໜ້າຈະຖືກກ່າວເຕືອນໂດຍຂຽນໃບສຳຫລວດຕົນເອງ ແລະ ບັນທຶກຄວາມຜິດໄວ້ເປັນຫລັກຖານ ແລະ ໃນກໍລະນີບໍ່ແກ້ໄຂຜົນຂອງການກວດກາ ຜູ້ເປັນຫົວໜ້າຈະຖືກໂຈະການເລື່ອນຂັ້ນເງິນເດືອນ ແລະ ການຍ້ອງຍໍ, ຫລຸດຕຳແໜ່ງຕໍ່າກວ່າເກົ່າ, ປົດຕຳແໜ່ງບໍລິຫານ ພ້ອມທັງບັນທຶກໄວ້ໃນສຳນວນເອກະສານຊີວະປະຫວັດຂອງພະນັກງານລັດຖະກອນ ຫລື ໃຫ້ອອກຈາກລັດຖະການໂດຍບໍ່ໄດ້ຮັບນະໂຍບາຍໃດໆ.
