ໄຟໄໝ້ປ່າຈຶ່ງເຫັນໜ້າໜູ
ການສໍ້ລາດບັງຫຼວງເປັນໄພອັນຕະລາຍຮ້າຍແຮງຕໍ່ການສ້າງສາພັດທະນາປະເທດ; ເຮັດໃຫ້ເສດຖະກິດຂອງຊາດເສຍຫາຍ. ສະນັ້ນ, ໃນຜ່ານມາພັກ ແລະ ລັດຖະບານເຮົາຈຶ່ງ ໄດ້ເດັດດ່ຽວປາບປາມບັນຫາດັ່ງກ່າວຢ່າງເດັດຂາດ ແລະ ໄດ້ຮັບແຮງສະຫນັບສະຫນູນ ແລະ ເປັນໃຈຈາກປະຊາຊົນ ຢ່າງກ້ວາງຂວາງ.
ທ່ານຮອງປະທານຄະນະກວດກາສູນກາງພັກ ແລະ ຮອງອົງການກວດກາລັດຖະບານ ໄດ້ລາຍງານໃນກອງປະຊຸມກວດກາ ປີ 2018 ໃນວັນທີ 8 ເມສານີ້ວ່າ: ປີຜ່ານມາ, ອົງການກວດກາລັດສາມາດຕິດຕາມ, ກວດກາການປະຕິບັດຫນ້າທີ່ຂອງອົງການບໍລິຫານຢູ່ຂະແຫນງການ ແລະ ທ້ອງຖິ່ນຕ່າງໆມີທັງຫມົດ 1.213 ເປົ້າຫມາຍ, ພົບເຫັນຜົນເສຍຫາຍທັງຫມົດຫລາຍກວ່າ 999 ຕື້ກີບ, 67.000 ກວ່າ ໂດລາສະຫະລັດ, 80.000 ບາດ (ສະກຸນເງິນໄທ) ແລະ ສາມາດເກັບກູ້ຄືນໄດ້ຈໍານວນຫນຶ່ງ. ກວດກາໂຄງການລົງທຶນຂອງລັດຈໍານວນ 131 ໂຄງການ, ມີມູນຄ່າຕາມສັນຍາ 5.683 ຕື້ກ່ວາກີບ, 124 ລ້ານກ່ວາໂດລາ ແລະ ພົບເຫັນວ່າການປະກອບເອກະສານ ບົດວິພາກເສດຖະກິດ-ເຕັກນິກ, ບົດສໍາຫຼວດ-ອອກແບບ, ການປະມູນ ແລະ ການເຮັດສັນຍາຮັບເຫມົາກໍ່ສ້າງບໍ່ຖືກຕ້ອງຕາມລະບຽບການ;ໂຄງການມີມູນຄ່າສູງ, ການຕິດຕັ້ງອຸປະກອນບໍ່ຖືກຕ້ອງຕາມສັນຍາ ແລະ ການກໍ່ສ້າງບໍ່ໄດ້ມາດຖານເຕັກນິກ, ມີຜົນເສຍ ຫາຍ 961 ຕື້ກ່ວາກີບ ແລະ ສາມາດເກັບກູ້ໄດ້ຄືນຈໍານວນຫນຶ່ງ.
ສໍາລັບການຈັດຕັ້ງປະຕິບັດຄໍາສັ່ງ ເລກທີ 15/ນຍ ພົບເຫັນການລະເມີດໃນ 5 ແຂວງມີບໍລິມາດໄມ້ທີ່ຂຸດຄົ້ນຕົວຈິງ 3.000 ກ່ວາແມັດກ້ອນ ແລະ ຂາຍແລ້ວ 1.540 ກ່ວາແມັດກ້ອນ, ມູນຄ່າ 21 ຕື້ກ່ວາກີບ, ຢຶດພາຫະນະ 63 ຄັນ, ມີຜູ້ກະທໍາຜິດ 62 ຄົນ ໃນນີ້ມີພະນັກງານລັດ 52 ຄົນ, ຜູ້ປະກອບການ 10 ຄົນ ຊຶ່ງໄດ້ແກ້ທາງບໍລິຫານ 27 ຄົນ, ຖືກດໍາເນີນຄະດີ 35 ຄົນ, ສານຕັດສິນແລ້ວ 5 ຄົນ ແລະ ໄດ້ຍຸບເລີກຮື້ຖອນໂຮງງານປຸງແຕ່ງໄມ້-ເຟີນິເຈີທັງຫມົດ 1.618 ແຫ່ງ.
ທ່ານຮອງອົງການກວດກາລັດຖະບານ ຍົກໃຫ້ເຫັນວ່າ: ຜ່ານການກວດກາພົບເຫັນພຶດຕິກໍາການສໍ້ລາດບັງຫຼວງຂອງພະນັກງານ ແລະ ຜູ້ປະກອບການທັງຫມົດ 105 ເປົ້າຫມາຍ, ມີຜົນເສຍຫາຍ 846 ຕື້ກ່ວາກີບ, 309 ລ້ານກ່ວາບາດ, ເກືອບ 600.000 ໂດລາ ແລະ 32.000 ຢວນ, ຊຶ່ງການກະທໍາຜິດສ່ວນໃຫຍ່ແມ່ນສວຍໃຊ້ຫນ້າທີ່ຕໍາແຫນ່ງ, ສິດອໍານາດ,ການໃຫ້-ຮັບສິນບົນ, ການຍັກຍອກສໍ້ໂກງຊັບຂອງລັດ, ການລັກໂລບປອມແປງມາດຕະຖານເຕັກນິກກໍ່ສ້າງ, ອອກແບບຄິດໄລ່, ການປອມແປງ ແລະ ການນໍາໃຊ້ເອກະສານປອມ ແລະ ອື່ນໆຊຶ່ງສາມາດກວດກາເຫັນຜູ້ມີພຶດຕິກໍາສໍ້ລາດບັງຫຼວງທັງຫມົດ 1.285 ຄົນ ມີພະນັກງານລັດ 970 ຄົນ, ຜູ້ປະກອບການ 315 ຄົນ ແລະ ໄດ້ດໍາເນີນການຕໍ່ຜູ້ມີພຶດຕິກໍາສໍ້ລາດບັງຫຼວງຫລາຍກວ່າ 1.000 ຄົນ, ໃນນີ້ຖືກປະຕິບັດວິໄນບໍລິຫານ 849 ຄົນ, ກໍາລັງດໍາເນີນການສືບສວນ-ສອບສວນ 40 ຄົນ, ສະຫຼຸບສໍານວນຄະດີສົ່ງໃຫ້ໄອຍະການປະຊາຊົນ 113 ຄົນ ແລະ ສານໄດ້ຕັດສິນແລ້ວ 55 ຄົນ ຕາມສະຖານະຄວາມຜິດຫນັກ ຫຼື ເບົາໃນນີ້ໄດ້ອາຢັດ-ຢຶດຊັບ, ລຶບຊື່, ໄລ່ອອກຈາກພະນັກງານລັດດ້ວຍຫຼາຍຮູບແບບ ແລະ ວິທີການຕ່າງໆເພື່ອປົກປັກຮັກສາຊັບສິນ, ຜົນປະໂຫຍດຂອງຊາດ ແລະ ຂອງປະຊາຊົນ ລາວ.
#ໂດຍ: ຣັດສະຫມີ ດວງສັດຈະ
