ຈີນໂຈະການນຳເຂົ້າຊີ້ນໝູຈາກການາດາ
ລັດຖະບານປັກກິ່ງ “ໂຈະ” ການນຳເຂົ້າຊີ້ນໝູຈາກບໍລິສັດໃຫຍ່ 2 ແຫ່ງຂອງການາດາ ຫລັງໂຈະການນຳເຂົ້າຄາໂນລາໃນເດືອນມີນາຜ່ານມາ ທ່າມກາງການພົວພັນອັນເຄັ່ງຕຶງຈາກຄະດີຂອງທາຍາດຫົວເວີຍ.
ສຳນັກຂ່າວຕ່າງປະເທດລາຍງານວ່າ: ທ່ານ ນາງ ມາຣີ-ໂຄດ ບີໂບ ລັດຖະມົນຕີກະຊວງກະສິກຳຂອງການາດາ ກ່າວໃນວັນທີ 1 ພຶດສະພາວ່າ: ລັດຖະບານກຳລັງເລັ່ງກວດສອບລາຍງານ ແລະ ຂໍຄຳຊີ້ແຈງຢ່າງເປັນທາງການຈາກລັດຖະບານປັກກິ່ງ, ພາຍຫລັງສຳນັກງານກວດສອບຄຸນນະພາບອາຫານແຫ່ງຊາດຂອງການາດາ ລາຍງານວ່າ: ສຳນັກງານພາສີ-ອາກອນຈີນ “ໂຈະ” ການອະນຸຍາດໃຫ້ເຮືອຂົນສົ່ງຊີ້ນໝູຈາກບໍລິສັດ 2 ແຫ່ງຂອງການາດາເຈົ້າຈອດທ່າ ໂດຍໃຫ້ເຫດຜົນວ່າ: ຜູ້ປະກອບການໃຊ້ເອກະສານການຂົນສົ່ງສິນຄ້າ “ທີ່ໝົດອາຍຸແລ້ວ” ຈຶ່ງບໍ່ຜ່ານມາດຕະຖານດ້ານພາສີ-ອາກອນຂອງລັດຖະບານປັກກິ່ງ.
ປັດຈຸບັນ ການາດາຢູ່ອັນດັບ 3 ຂອງໂລກໃນການສົ່ງອອກຊີ້ນໝູ ແລະ ມີຈີນເປັນຕະຫລາດຮັບຊື້ລາຍໃຫຍ່ ແລະ ປະລິມານການນຳເຂົ້າຊີ້ນໝູຈາກຕ່າງປະເທດຂອງຈີນເພີ່ມຂຶ້ນຫລາຍໃນປີຜ່ານມາ ເນື່ອງຈາກສະຖານະການພາຍໃນປະເທດມີການແຜ່ລະບາດຂອງພະຍາດອະຫິວາໝູອາຟຣິກາ ໂດຍລັດຖະບານປັກກິ່ງນຳເຂົ້າຊີ້ນໝູຈາກການາດາເປັນມູນຄ່າ 514 ລ້ານໂດລາການາດາ ໃນປີຜ່ານມາ.
ຂະນະດຽວກັນ, ທ່ານ ຈິມ ຄາ ລັດຖະມົນຕີກະຊວງການຄ້າຂອງການາດາ ປະກາດວ່າ: ລັດຖະບານເພີ່ມງົບປະມານອີກ 2 ເທົ່າເປັນ 1 ລ້ານໂດລາການາດາ ໃຫ້ການຊ່ວຍເຫລືອກະສິກອນຜູ້ປູກຄາໂນລາ, ພາຍຫລັງຈີນໂຈະການນຳເຂົ້າຄາໂນລາຈາກບໍລິສັດໃຫຍ່ຢ່າງໜ້ອຍ 2 ແຫ່ງຂອງການາດາ ໃນເດືອນມີນາຜ່ານມາ ທ່າມກາງການພົວພັນລະດັບທະວີພາຄີອັນເຄັ່ງຕຶງຈາກກໍລະນີຂັດແຍ່ງເລື່ອງທາຍາດຂອງບໍລິສັດຫົວເວີຍ.
