ນໍ້າປະປານະຄອນຫລວງວຽງຈັນພວມເລັ່ງແກ້ໄຂບັນຫານໍ້າບໍ່ພຽງພໍ
ພາຍຫລັງໄດ້ມີປະຊາຊົນເຂດບ້ານດົງໝາກຄາຍ ເມືອງໄຊທານີ ນະຄອນ ຫລວງວຽງຈັນ ສ່ອງແສງມາຫາໜັງສືພິມ ລາວພັດທະນາ ເຮົາວ່າ: ໄດ້ເກີດມີບັນຫານໍ້າປະປາຂຸ້ນ ອັນເຮັດໃຫ້ການສະໜອງນໍ້າໃຊ້ບໍ່ພຽງພໍ ແລະ ຂາດນໍ້າໃຊ້ໃນຄອບຄົວເປັນຢ່າງຍິ່ງ.
ຕໍ່ບັນຫາດັ່ງກ່າວ, ທ່ານ ຄໍາເຜີຍ ວົງສາຄໍາຜຸຍ ອໍານວຍການ ລັດວິສາຫະກິດນໍ້າປະປາ ນະຄອນຫລວງວຽງຈັນ ໃຫ້ຮູ້ວ່າ: ປະຊາຊົນທີ່ອາໄສຢູ່ເຂດ ເມືອງໄຊທານີ, ໄຊເສດຖາ ແລະ ເມືອງຈັນທະບູລີ ໃຫ້ກຽມໂຕ່ງນໍ້າໃສ່ອ່າງເກັບນໍ້າໄວ້ ໃນວັນທີ 29 ເມສາຜ່ານມານີ້, ເນື່ອງຈາກວ່າມີຝົນຕົກ ແລະ ລົມແຮງ, ອັນເປັນສາເຫດເຮັດໃຫ້ໄຟຟ້າຕົກ. ສະນັ້ນ, ໂຮງງານຜະລິດນໍ້າປະປາ ດົງໝາກຄາຍ ຈຶ່ງບໍ່ສາມາດດໍາເນີນການຜະລິດນໍ້າປະປາໄດ້ຢ່າງເຕັມສ່ວນ ແລະ ສົ່ງຜົນໃຫ້ການບໍລິການສະໜອງນໍ້າໃຫ້ປະຊາຊົນບໍ່ພຽງພໍກັບຄວາມຮຽກຮ້ອງຕ້ອງການ, ເມື່ອລະບົບກະແສໄຟຟ້າເຂົ້າໂຮງງານໄດ້ມາດຕະຖານແລ້ວຈຶ່ງຈະສາມາດຜະລິດ ແລະ ສະໜອງນໍ້າເປັນປົກກະຕິໄດ້ໄດ້. ປັດຈຸບັນທາງໜ່ວຍງານພວມເລັ່ງສ້ອມແປງ ແລະ ແກ້ໄຂບັນຫາດັ່ງກ່າວໃຫ້ໄດ້ໂດຍໄວ ເຊິ່ງຄາດວ່າອີກ 2-3 ມື້ ກໍຈະສາມາດສະໜອງນໍ້າໃຊ້ໄດ້ຢ່າງເປັນ ປົກກະຕິດີ.
ດັ່ງນັ້ນ, ຈຶ່ງແຈ້ງໃຫ້ຜູ້ຊົມໃຊ້ນໍ້າກະກຽມອ່າງເກັບນໍ້າ ແລະ ໂຕ່ງນໍ້າໄວ້ ເພື່ອຊົມໃຊ້ໃນຄອບຄົວທີ່ຈໍາເປັນ ແລະ ໃນກໍລະນີມີຄວາມຕ້ອງການຊົມໃຊ້ບໍລິການນໍ້າສຸກເສີນທາງລົດນໍ້າ ສາມາດນໍາສົ່ງໄດ້ຕະຫລອດ 24 ຊົ່ວໂມງ ຕາມເບີໂທລະສັບ 1169.
