ຟານໄດ໋ ໄດ້ລາງວັນ PFA Players’ Player of the Year ລະດູການນີ້
ສະມາຄົມນັກກິລາບານເຕະອາຊີບຂອງອັງກິດ ຫລື Professional Footballers’ Association (PFA) ໄດ້ປະກາດລາງວັນນັກເຕະດີເດັ່ນແຫ່ງລະດູການ 2018-19 ໃນວັນທີ 28 ເມສານີ້ ຜົນປາກົດວ່າ: ປະເພດຊາຍ ເປັນຂອງ ເວີຈີວ ຟານ ໄດ໋ ກອງຫລັງທີມຊາດເນເທີແລນ ໄວ 27 ປີ ຈາກສະໂມສອນ ລິເວີພູລ ໄດ້ລາງວັນນີ້ເປັນຄັ້ງທຳອິດ ແລະ ເປັນນັກເຕະຊາວໂຮນລັງຄົນທີ 4 ທີ່ໄດ້ຮັບລາງວັນນີ້ຕໍ່ຈາກ ເດັນນິສ ບີແຄັມ ລະດູການ 1997-98, ຣຸສ ຟານນິສເທວຣອຍ ລະດູການ 2001-02 ແລະ ໂຣບິນ ຟານ ເປີຊີ້ ລະດູການ 2011-12.
ຟານ ໄດ໋ ເອົາຊະນະ ຊາດີໂອ ມາເນ່ ເພື່ອນຮ່ວມທີມ, ເອເດັນ ອາຊາ ຈາກເຊລຊີ ແລະ 3 ນັກເຕະຈາກ ແມນຊິຕີ້ ຣາຮີມ ສະເຕີລິ້ງ, ເຊີຈີໂອ ອາເກວໂຣ ແລະ ແບນາໂດ້ ຊິວວາ.
ລະດູການນີ້ ຟານ ໄດ໋ ມີບົດບາດໂດດເດັ່ນດ້ານເກມຮັບຂອງ ລິເວີພູລ ລົງສະໜາມ 36 ນັດ ບໍ່ເສຍປະຕູ 19 ນັດ, ຊ່ວຍ ລິເວີພູລ ເສຍປະຕູໜ້ອຍກວ່າທຸກທີມໃນ ພຣີເມຍລີກ ລະດູການນີ້ ພຽງ 20 ປະຕູ ຊ່ວຍທີມຊະນະ 28 ນັດ ລຸ້ນແຊ້ມລີກລະດູການນີ້ກັບແຊ້ມເກົ່າ ແມນຊິຕີ້ ຢ່າງມ່ວນມັນ.
ຟານ ໄດ໋ ກາຍເປັນນັກເຕະຄົນທີ 8 ຂອງລິເວີພູລ ໄດ້ລາງວັນນີ້ ຫລ້າສຸດ ໂມຮາເໝັດ ຊາລາ ໃນລະດູການຜ່ານມາ ແລະ ເປັນນັກເຕະຕຳແໜ່ງກອງຫລັງຄົນທຳອິດຂອງ ລິເວີພູລ ໄດ້ລາງວັນນີ້ ເປັນກອງຫລັງຄົນທຳອິດໃນຮອບ 14 ປີ ໄດ້ລາງວັນນີ້ຕໍ່ຈາກ ຈ໋ອນ ເທີຣີ ອະດີດກອງຫລັງ ເຊລຊີ ໃນລະດູການ 2004-05.
ຂະນະທີ່ ຣາຮີມ ສະເຕີລິ້ງ ປີກຄວາມໄວສູງທີມຊາດອັງກິດ ໄວ 24 ປີ ຈາກແມນຊິຕີ້ ໄດ້ລາງວັນດາວຮຸ່ງດີເດັ່ນລະດູການນີ້ເປັນຄັ້ງທຳອິດຂອງ ສະເຕີລິ້ງ ເປັນນັກເຕະຈາກ ແມນຊິຕີ້ ສອງລະດູການລວດຕໍ່ຈາກ ເລຣອຍ ຊາເນ່.
ສ່ວນລາງວັນນັກເຕະຍິງດີເດັ່ນເປັນຂອງ ວີວຽນເນ່ ມີເດມ້າ ກອງໜ້າທີມຊາດໂຮນລັງ ໄວ 22 ປີ ຈາກສະໂມສອນ ອາເຊນອລ ຈາກຜົນງານເປັນດາວຍິງສູງສຸດໃນບານເຕະລີກສູງສຸດປະເພດຍິງຂອງອັງກິດ ລະດູການນີ້ 22 ປະຕູ ຈາກ 19 ນັດ ແລະ ສົ່ງໃຫ້ເພື່ອນຍິງ 10 ປະຕູ.
ດ້ານລາງວັນດາວຮຸ່ງດີເດັ່ນປະເພດຍິງເປັນຂອງ Stanway Georgia ກອງໜ້າອາຍຸ 20 ປີ ຊາວອັງກິດ ຈາກແມນຊິຕີ້.
