ເຕັກນິກການປຸກພະລັງໃນຕອນເຊົ້າສຳລັບຄົນເຮັດວຽກ

    5 ຄຳແນະນຳທີ່ຈະຊ່ວຍໃຫ້ຄົນເຮັດວຽກຄືພວກເຮົາເຈົ້າຂ້ອຍສາມາດເລີ່ມຕົ້ນເຊົ້າມື້ໃໝ່ໄດ້ຢ່າງສົດຊື່ນແຈ່ມໃສ ແລະ ເຮັດວຽກໄດ້ຢ່າງມີປະສິດທິພາບໄດ້ໝົດມື້ ມີຄື :

      1. ເປີດໄຟໃຫ້ແຈ້ງກະຕຸ້ນໂຕເອງໃຫ້ລຸກຈາກຕຽງທັນທີເມື່ອຕື່ນນອນ : ໂມງຊີວະພາບຂອງຮ່າງກາຍຄົນເຮົາຈະສາມາດປັບເຂົ້າໄດ້ຕາມປະລິມານຂອງແສງສະຫວ່າງ ເພາະສະນັ້ນ ທັນທີທີ່ຕື່ນນອນເຮົາ ຄວນເປີດໄຟໃນຫ້ອງໃຫ້ແຈ້ງ ເພື່ອກະຕຸ້ນໃຫ້ຮ່າງກາຍຂອງເຮົາຮູ້ສຶກວ່າເປັນເວລາທີ່ຄວນຈະຕ້ອງລຸກຈາກຕຽງແລ້ວ.

     2. ອອກກຳລັງກາຍເອີ້ນເຫື່ອ ເພື່ອສະໝອງປອດໂປ່ງ ຮ່າງກາຍສົດຊື່ນຫ້າວຫັນ : ການເລີ່ມຕົ້ນມື້ໃໝ່ໂດຍການອອກກຳລັງກາຍໃນຕອນເຊົ້າມີຂໍ້ດີຫລາຍຢູ່ແລ້ວ ເຊິ່ງໜຶ່ງໃນນັ້ນກໍແມ່ນຊ່ວຍໃຫ້ກຳຈັດຄວາມງ່ວງເຫງົາເຊື່ອງຊຶງໃຫ້ຫາຍໄປ, ຫົວໃຈຂອງເຮົາຖືກກະຕຸ້ນ ແລະ ສະໝອງປອດໂປ່ງ ພ້ອມປຸກໃຫ້ເຮົາຫ້າວຫັນເພື່ອເລີ່ມຕົນມື້ໃໝ່ຢ່າງສົດໃສ.

     3. ຕື່ມພະລັງງານດ້ວຍອາຫານເຊົ້າ : ຮູ້ກັນດີຢູ່ແລ້ວວ່າເຂົ້າເຊົ້າເປັນຄາບສຳຄັນຫລາຍ ມັນເປັນການຕື່ມພະລັງງານຫລັງຈາກການນອນຫລັບມາໝົດຄືນ ການບໍ່ກິນເຂົ້າເຊົ້າຈະເຮັດໃຫ້ລະບົບການເຜົາຜານສູນເສຍຄວາມດຸ່ນດ່ຽງ, ບໍ່ໄດ້ຮັບພະລັງງານຢ່າງທີ່ຄວນຈະເປັນ ແລະ ຍັງຈະເຮັດໃຫ້ເຮົາຕຸ້ຍງ່າຍຂຶ້ນນຳ ນອກຈາກນັ້ນລະດັບນຳ້ຕານໃນເລືອດກໍຈະຫລຸດລົງ ເຊິ່ງເຮັດໃຫ້ພະລັງ ແລະ ຄວາມກະຕືລືລົ້ນຂອງເຮົາຫລຸດລົງໄປນຳ.

     4. ເພີ່ມອາຫານສະໝອງດ້ວຍສຽງເພງ ຫລື Podcast :ລະຫວ່າງການເດີນທາງໄປເຮັດວຽກໃນຕອນເຊົ້າ ການຫາຫຍັງຟັງຈະຊ່ວຍໃຫ້ເຮົາຮູ້ສຶກຕື່ນໂຕຫລາຍຂຶ້ນ ແທນບ່ອນການນັ່ງເບິ່ງຫົນທາງໄປເລື້ອຍໆ ແລ້ວປ່ອຍໃຫ້ສະໝອງວ່າງເປົ່າ ຫລື ເມົາແຕ່ເຫງົານອນ ລອງຫາເພງ ຫລື Podcast ທີ່ໜ້າສົນໃຈຟັງເບິ່ງ ແລ້ວອາດຈະເພີ່ມລະດັບສຽງ ແລະ ເລັ່ງຈັງຫວະຂຶ້ນຈັກ ໜ້ອຍກໍໄດ້.

     5. ເລີ່ມຕົ້ນການເຮັດວຽກດ້ວຍວຽກຍາກ ກະຕຸ້ນການໃຊ້ສະໝອງ:  ວຽກອັນທຳອິດທີ່ເຮັດໃນຕອນເຊົ້າຄວນຈະເປັນວຽກທີ່ເຮັດໃຫ້ເຮົາຕ້ອງໃຊ້ຄວາມຄິດ ຫລື ວຽກທີ່ຕ້ອງໃຊ້ຄວາມຄິດສ້າງສັນ ເຊັ່ນ : ວຽກການຂຽນ, ວຽກການອອກແບບ ຫລື Programming ເພາະມັນຈະຊ່ວຍໃຫ້ສະໝອງຂອງເຮົາຈົດຈໍ່ຢູ່ກັບວຽກທີ່ເຮັດ, ກະຕຸ້ນສະໝອງ ແລະ ເຮັດໃຫ້ເຮົາຢາກເຮັດວຽກຫລາຍຂຶ້ນ. ໃນທາງກົງກັນຂ້າມ ຖ້າເຮົາເລີ່ມຕົ້ນການເຮັດວຽກຂອງມື້ດ້ວຍວຽກທີ່ໜ້າເບື່ອ ມັນກໍຈະເຮັດໃຫ້ເຮົາຮູ້ສຶກເບື່ອໜ່າຍ, ເຊື່ອງຊ້າ, ເສີຍຊາ ແລະ ບໍ່ຫລຸດພົ້ນຈາກອາການງ່ວງເຫງົາຫາວນອນໄດ້ຈັກເທື່ອ.