IMF ຊີ້ຂວ້ຳບາດອີຣານ ແລະ ເຫດບໍ່ສະຫງົບ ກະທົບເສດຖະກິດຕາເວັນອອກກາງ
ກອງທຶນການເງິນສາກົນ (IMF) ລາຍງານໃນວັນທີ 29 ເມສານີ້ວ່າ: ມາດຕະການຂວ້ຳບາດຂອງອາເມລິກາທີ່ມີຕໍ່ອີຣານ, ເຫດຄວາມບໍ່ສະຫງົບຢູ່ຕາເວັນອອກກາງ ແລະ ອາຟຣິກາເໜືອ ລວມທັງການປັ່ນປ່ວນຂອງລາຄານ້ຳມັນ ສົ່ງຜົນກະທົບຕໍ່ການເຕີບໃຫຍ່ທາງເສດຖະກິດໃນພາກພື້ນ.
IMF ເຕືອນໃນລາຍງານທ່າອ່ຽງເສດຖະກິດຮອບເຄິ່ງປີວ່າ: ທ່າອ່ຽງເສດຖະກິດຕາເວັນອອກກາງຍັງບໍ່ຈະແຈ້ງ ຈາກສະຖານະການບໍ່ແນ່ນອນຫລາຍດ້ານ ເຊິ່ງຈະເຮັດໃຫ້ນັກລົງທຶນກັງວົນຕໍ່ຄວາມສ່ຽງທົ່ວພາກພື້ນ, ເກີດສະພາບເງິນທຶນໄຫລອອກ ແລະ ກະທົບອັດຕາການແລກປ່ຽນ. IMF ລາຍງານວ່າ: ເສດຖະກິດອີຣານ ເຊິ່ງມີຂະໜາດໃຫຍ່ເປັນອັນດັບສອງໃນຕາເວັນອອກາງ ຮອງຈາກອາຣັບບີ ຊາອຸດິດ ຈະຫລຸດລົງມາຢູ່ 6% ໃນປີນ ຫລັງຈາກຫລຸດລົງມາຢູ່ 3,9% ໃນປີຜ່ານມາ. ທ່ານ ຈິຮັດ ອາຊູ ຜູ້ອຳນວຍການດ້ານຕາເວັນອອກກາງ ແລະ ອາຊີກາງ ຂອງ IMF ກ່າວວ່າ: ຈາກການທີ່ອາເມລິກາເລີ່ມມາດຕະການຂວ້ຳບາດນ້ຳມັນອີຣານໃນອາທິດຜ່ານມາ ຍິ່ງເຮັດໃຫ້ສະຖານະການຊຸດໂຊມລົງອີກ, ຫລັງຈາກຊຸກຍູ້ໃຫ້ສະພາບເງິນເຟີ້ຢູ່ອີຣານຂຶ້ນໄປຢູ່ 50%. IMF ຄາດວ່າ: ການເຕີບໃຫຍ່ທາງເສດຖະກິດໃນພາກພື້ນໂດຍລວມຢູ່ປະມານ 1,3% ໃນປີ 2019 ຈາກ 1,4% ໃນປີ 2018.
