ນາຍົກເນັ້ນຫລາຍບັນຫາໃຫ້ສືບຕໍ່ເລັ່ງແກ້ໄຂ
ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນຫລາຍບັນຫາໃຫ້ສະມາຊິກລັດຖະບານສືບຕໍ່ເລັ່ງແກ້ໄຂ ເພື່ອໃຫ້ເຄື່ອນໄຫວຂອງສັງຄົມມີຄວາມເປັນລະບຽບຮຽບຮ້ອຍ ແລະ ປອດໄພ, ໂດຍທ່ານກ່າວວ່າ: ໃນຕໍ່ໜ້ານີ້, ໃຫ້ເອົາໃຈໃສ່ວຽກງານຮັກສາຄວາມສະຫງົບເປັນລະບຽບຮຽບຮ້ອຍໃນສັງຄົມ, ໂດຍສະເພາະແມ່ນການຄົ້ນຄວ້າມາດຕະການຕ່າງໆເພື່ອແກ້ໄຂປາກົດການຫຍໍ້ທໍ້ຕ່າງໆໃຫ້ໝົດໄປ ໃຫ້ຫລຸດລົງ ແລະ ກ້າວໄປສູ່ການໝົດໄປຢ່າງສີ້ນເຊິງ ເປັນຕົ້ນ: ອຸປະຕິເຫດບົນທ້ອງຖະໜົນ, ຂີ້ລັກ-ງັດແງະ, ປຸ້ນຈີ້-ຊິງຊັບ, ການຄ້າຂາຍເຖື່ອນ ແລະ ການຄ້າຂາຍຢາເສບຕິດ, ແກ້ງກວນເມືອງ, ບັນຫາອັກຄີໄພ ລວມເຖິງການນໍາໃຊ້ສື່ສັງຄົມອອນລາຍສ້າງຄວາມປັ່ນປວນຕ່າງໆ, ພ້ອມທັງເອົາໃຈໃສ່ຕິດຕາມກວດກາປະຕິບັດຄໍາສັ່ງເລກທີ 02/ນຍ ວ່າດ້ວຍການອໍານວຍຄວາມສະດວກໃນການດໍາເນີນທຸລະກິດຢູ່ ສປປ ລາວ, ໂດຍໃຫ້ຂະແໜງການກ່ຽວຂ້ອງເຮັດບົດລາຍງານຄວາມຄືບໜ້າໃຫ້ລັດຖະບານຊາບໃນທຸກໆໃນມາດ, ຂະນະດຽວກັນ ໃຫ້ສະຫລຸບຕີລາຄາການຄຸ້ມຄອງ ແລະ ພັດທະນາເຂດເສດຖະກິດພິເສດທັງໝົດ 12 ເຂດ ເພື່ອໃຫ້ຮູ້ບັນຫາ, ສາເຫດ ແລະ ວິທີແກ້ໄຂຢ່າງເໝາະສົມ ເພື່ອແນໃສ່ເຮັດໃຫ້ລັດຖະບານ, ປະຊາຊົນ ແລະ ຜູ້ລົງທຶນ ໄດ້ຮັບຜົນປະໂຫຍດຈາກພັດທະນາເຂດເສດຖະກິດດັ່ງກ່າວຕາມລະບຽບກົດໝາຍ, ສືບຕໍ່ສຸມໃສ່ການເກັບລາຍຮັບ ແລະ ປະຕິບັດລາຍຈ່າຍໃຫ້ໄດ້ຕາມແຜນການວາງໄວ້, ໄປຄຽງຄູ່ກັບການກວດກາຄືນ ແລະ ປັບປຸງບັນດາມາດຕະການທີ່ມີແລ້ວໃຫ້ຮັດກຸມ ແລະ ມີປະສິດທິຜົນກວ່າເກົ່າ, ເອົາໃຈໃສ່ຊຸກຍູ້ການປະຕິບັດໂຄງການທາງລົດໄຟລາວ-ຈີນ ໃຫ້ໄປຕາມແຜນການກໍານົດໄວ້, ໂດຍສະເພາະເອົາໃຈໃສ່ວຽກງານການຊົດເຊີຍໃຫ້ປະຊາຊົນທີ່ຖືກຜົນກະທົບໃຫ້ໄວຂຶ້ນ ເພື່ອບໍ່ໃຫ້ເກີດສຽງວິຈານຕ່າງໆຕາມມາ, ພ້ອມກັນນັ້ນ ກໍເອົາໃຈໃສ່ແກ້ໄຂບັນຫາຢູ່ບັນດາດ່ານສາກົນທີ່ມີຍັງຄວາມສັບສົນ ແລະ ບໍ່ເປັນລະບົບລະບຽບ, ໂດຍໃຫ້ແຕ່ງຕັ້ງຄະນະສະເພາະກິດລົງຕິດຕາມກວດກາ ເພື່ອໃຫ້ກໍາໄດ້ສະພາບການ ແລະ ສະເໜີມາດຕະການແກ້ໄຂໃຫ້ຂາດຕົວ ເພື່ອຈໍາກັດຊ່ອງວ່າງສວຍໂອກາດຂອງພະນັກງານ, ອັດຊ່ອງວ່າງການຮົ່ວໄຫລຂອງລາຍຮັບພາສີ-ອາກອນ ແລະ ອໍານວຍຄວາມສະດວກໃຫ້ແກ່ການເຄື່ອນໄຫວທຸລະກິດ ແລະ ການບໍລິການ, ສືບຕໍ່ແກ້ໄຂບັນຫາຕ່າງໆທີ່ກະທົບຕໍ່ການທ່ອງທ່ຽວ ເປັນຕົ້ນ: ການເກັບຄ່າທໍານຽມແບບບໍ່ເໝາະສົມ ແລະ ບັນດາສິ່ງກີດຂວາງອື່ນໆທີ່ບໍ່ສອດຄ່ອງລະບຽບຫລັກການ, ເອົາໃຈໃສ່ຕິດຕາມກວດກາການນໍາເຂົ້າສີນຄ້າອຸປະໂພກ-ບໍລິໂພກ, ໂດຍສະເພາະການນໍາເຂົ້າສັດ, ພືດຜັກ, ໝາກໄມ້, ຢາປົວພະຍາດ, ເຄື່ອງສໍາອາງ, ອາຫານທະເລ ແລະ ສີນຄ້າອື່ນໆ ທີ່ນໍາເຂົ້າຈາກຕ່າງປະເທດ, ພ້ອມນີ້ ກໍໃຫ້ເອົາໃຈໃສ່ລົງກວດກາດ້ານສຸຂະອະນາໄມ ແລະ ຄວາມປອດໄພຢູ່ບັນດາໂຮງຂ້າສັດ, ຕະຫລາດ ແລະ ບ່ອນຈໍາໜ່າຍສີນຄ້າຕ່າງໆ, ເອົາໃຈໃສ່ຕິດຕາມຢ່າງໃກ້ຊິດການລະບາດຂອງພະຍາດຕ່າງໆໃນຊ່ວງໄລຍະອາກາດຮ້ອນ ເປັນຕົ້ນ: ໄຂ້ຍຸງ, ໄຂ້ໝາກແດງ, ພະຍາດຈາກສັດ, ການຄວບຄຸມການສ້າງມົນລະພິດທາງອາກາດ ເຊັ່ນ: ການຈູດຂີ້ເຫຍື້ອ ແລະ ຈູດປ່າເຮັດໄຮ່, ຕິດຕາມສະພາບ ການປ່ຽນແປງຂອງດິນຟ້າອາກາດ, ພ້ອມທັງມີລະບົບແຈ້ງເຕືອນ, ແນະນໍາ ແລະ ວິທີປ້ອງກັນໃຫ້ປະຊາຊົນໄດ້ຮັບມືຢ່າງທັນການ.
