ຜູ້​ປະສົບ​ອັກຄີ​ໄພ​ຢູ່​ບ້ານ​ນາ​ພູ​ຄຳ​ເມືອງ​ຊະນະ​ສົມບູນ​ຕ້ອງການ​ຄວາມ​ຊ່ວຍ​ເຫລືອ​ໂດຍ​ດ່ວນ

ພາຍຫລັງເກີດເຫດການໄຟໃໝ້ເຮືອນປະຊາຊົນເສຍ ຫາຍພ້ອມກັນບາດດຽວເຖິງ 22 ຫລັງຢູ່ບ້ານນາພູຄໍາ, ເມືອງຊະນະສົມບູນແຂວງ ຈໍາປາສັກ ເມື່ອວັນທີ 14 ເມສາຜ່ານມາ, ເຫດການໄຟໄໝ້ ຄັ້ງຮຸນແຮງນີ້ເຖິງວ່າບໍ່ມີຜູ້ ໄດ້ຮັບບາດເຈັບ ຫລື ເສຍຊີ ວິດແຕ່ມັນໄດ້ສົ່ງຜົນກະທົບ ໃຫ້ກັບຜູ້ປະສົບໄພຂາດທີ່ ຢູ່ອາໄສ ໂດຍສະເພາະຫລາຍ ຄອບຄົວຕ້ອງໄດ້ໄປອາໄສຢູ່ ນໍາຍາດພີ່ນ້ອງ, ນໍາວັດ ແລະ ບ່ອນທີ່ອໍານາດ ການປົກຄອງ ເມືອງຈັດສັນ ໃຫ້ຊົ່ວຄາວ, ເຊິ່ງເຫັນວ່າການດໍາລົງຊີວິດແມ່ນພົບຄວາມຫຍຸ້ງຍາກ ຫລາຍສົມຄວນ ແລະ ປັດຈຸບັນ, ນອກຈາກ ເຄື່ອງອຸປະໂພກ-ບໍລິໂພກ ທີ່ຜູ້ປະສົບໄພຕ້ອງການແລ້ວ ແມ່ນຍັງ ມີວັດຖຸອຸປະກອນປະເພດສັງກະສີ, ເຫລັກຕະປູ, ໄມ້ ແລະ ເຄື່ອງມືອື່ນໆ ທີ່ຕ້ອງການ ຄວາມຊ່ວຍເຫລືອຈາກສັງຄົມ ເພື່ອນໍາໃຊ້ເຂົ້າໃນການ ປຸກສ້າງທີ່ຢູ່ອາໄສຊົ່ວຄາວ ແລະ ເພື່ອສາມາດຟື້ນຟູຊີວິດການເປັນຢູ່ດີຂຶ້ນເທື່ອລະກ້າວ.

ມາຮອດປັດຈຸບັນໄດ້ມີຫລາຍພາກສ່ວນລັດ ແລະ ເອກະຊົນ ໄດ້ນໍາເອົາເຄື່ອງ ບັນເທົາທຸກຈໍານວນໜຶ່ງໄປ ຊ່ວຍເຫລືອຜູ້ໄດ້ຮັບຜົນກະທົບ, ເຊິ່ງລ້າສຸດນີ້ ທ່ານ ເມກ ສະຫວັນ ພົມພິທັກ ປະທານ ສະພາປະຊາຊົນແຂວງຈໍາ ປາສັກ ແລະ ຄະນະກໍໄດ້ນໍາ ເອົາເຄື່ອງອຸປະໂພກ-ບໍລິໂພກ ລວມມູນຄ່າກວ່າ 50 ລ້ານກີບ ໄປມອບໃຫ້ອໍານາດການປົກຄອງເມືອງຊະນະສົມບູນເພື່ອນໍາໄປແຈກຢາຍໃຫ້ປະ ຊາຊົນທີ່ໄດ້ຮັບຜົນກະທົບ ດັ່ງກ່າວ./.