ອຸຕຸອອກເຕືອນຕື່ມລະວັງລົມພັດແຮງພ້ອມຝົນໝາກເຫັບ

ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ ໄດ້ອອກແຈ້ງ​ເຕືອນ​ວ່າ: ແຕ່ວັນທີ 25-27 ນີ້, ຂໍໃຫ້ປະຊາຊົນບັນດາເຜົ່າໃນທົ່ວປະເທດ ມີສະຕິລະວັງ, ພ້ອມທັງ ກວດກາຄວາມໝັ້ນຄົງຂອງເຮືອນຊານບ້ານຊ່ອງ, ວັດຖຸຊັບສີນຕ່າງໆຂອງຕົນໃຫ້ດີ ແລະ ຫ້າມບໍ່ໃຫ້ໄປຢູ່ກ້ອງຮົ່ມໄມ້ໃຫຍ່ ຫລື ກາງເດີນກວ້າງ, ພາຍຫລັງເຫັນວ່າໃນໄລຍະດັ່ງກ່າວ ອາດຈະມີຟ້າເຫລື້ອມ, ຟ້າຜ່າ, ລົມພັດແຮງ ແລະ ໝາກເຫັບຕົກ ຍ້ອນວ່າມວນອາກາດຮ້ອນໄດ້ປົກຄຸມຢູ່ທົ່ວທຸກພາກຂອງປະເທດດ້ວຍກໍາລັງແຮງ, ພ້ອມດຽວກັນນັ້ນ ຍັງມີກະແສລົມຕາເວັນຕົກ ແລະ ຕາເວັນອອກສຽງໃຕ້ພັດປົກຄຸມເຂດພາກເໜືອຫາພາກກາງ. ດັ່ງນັ້ນຈຶ່ງໃຫ້ມີສະຕິລະວັງຄືດັ່ງກ່າວ,​ ພ້ອມທັງໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈໍາ ໂດຍສະເພາະໃນໄລຍະ 1-3 ວັນຂ້າງໜ້ານີ້.