ສະເຕຟານີ້ ຟຣັບປາ ຜູ້ຕັດສິນຍິງ ຄົນທຳອິດໃນເຕະບານລີກສູງສຸດຝຣັ່ງ
ເມື່ອບໍ່ດົນມານີ້, ສະຫະພັນບານເຕະປະເທດຝຣັ່ງ (FFF) ໄດ້ປະກາດມອບສິດໃຫ້ ສະເຕຟານີ້ ຟຣັບປາ ຜູ້ຕັດສິນເພດຍິງຊາວຝຣັ່ງ ໄວ 35 ປີ ລົງຕັດສິນໃນການແຂ່ງຂັນບານເຕະລີກສູງສຸດປະເພດຊາຍຂອງປະເທດ ຫລື ລີກເອີງ (Ligue 1) ໃນວັນທີ 28 ເມສານີ້ ຄູ່ລະຫວ່າງ ອາມ້ຽນສ໌ ເປີດບ້ານພົບກັບ ສະຕຣາສບວກ, ສ້າງປະຫວັດສາດກາຍເປັນຜູ້ຕັດສິນຍິງຄົນທຳອິດໃນບານເຕະຊາຍລີກສູງສຸດຂອງຝຣັ່ງ.
ສະຫະພັນບານເຕະຝຣັ່ງ ກ່າວວ່າ: ສະເຕຟານີ້ ຟຣັບປາ ເປັນຜູ້ຕັດສິນທີ່ມີພອນສະຫວັນ, ມີຜົນງານທີ່ດີຕະຫລອດອາຊີບຜ່ານມາ ແລະ ເປັນຜູ້ຕັດສິນທີ່ FIFA ປະທັບໃຈ ເລືອກໃຫ້ເປັນຜູ້ຕັດສິນບານໂລກປະເພດຍິງ ໃນປີ 2015 ທີ່ການາດາ ແລະ 2019 ທີ່ຝຣັ່ງໃນກາງປີນີ້.
ສະເຕຟານີ້ ຟຣັບປາ ເປັນຜູ້ຕັດສິນລະດັບ FIFA ມາແຕ່ປີ 2011, ຕັດສິນລີກເດິ (Ligue 2) ຫລື ລີກອັນດັບສອງປະເພດຊາຍຂອງຝຣັ່ງ ມາແຕ່ປີ 2014.
ສະເຕຟານີ້ ຟຣັບປາ ກາຍເປັນຜູ້ຕັດສິນເພດຍິງຄົນທີ 2 ຂອງເອີຣົບ ໄດ້ຕັດສິນໃນລີກສູງສຸດປະເພດຊາຍ ຕໍ່ຈາກ ບີບຽນນ້າ ສະເຕັນເຮົ້າ ຊາວເຢຍລະມັນ ໄດ້ຕັດສິນບຸນເດສລີກ້າ ລີກສູງສຸດຂອງເຢຍລະມັນ ໃນປີ 2017.
